സിനിമയില്‍ വളരെ കാലം നിലനില്‍ക്കുന്ന ആക്ഷേപമാണ് ചാന്‍സ് കിട്ടണമെങ്കില്‍ സ്ത്രീകള്‍ വിട്ടുവീഴ്ച ചെയ്യണം എന്നത്. ഹിന്ദി സിനിമാ ലോകം അധോലോകവുമായും രാഷ്ട്രീയവുമായും ഏറെ ബന്ധമുള്ളതാണ്. അതിനാല്‍ തന്നെ പലതരം കഥകള്‍ പോലും പുറത്ത് വന്നിട്ടുണ്ട്. എന്തിന് നമ്മുടെ മലയാള സിനിമയില്‍ പോലും അത്തരം പ്രവണതകള്‍ ഉണ്ടെന്നാണ് അടുത്തിടെ റിപ്പോര്‍ട്ട് സമര്‍പ്പിച്ചിട്ടുള്ളത്. അതിനിടെ വലിയൊരു വെളിപ്പെടുത്തല്‍ നടത്തുകയാണ് പ്രശസ്ത ബോളിവുഡ് താരം നീന ഗുപ്ത.

സിനിമ കൊടുക്കല്‍ വാങ്ങലുകള്‍ നടക്കുന്ന ഒരു കച്ചവടമാണെന്ന് നീന ഗുപ്ത പറഞ്ഞു. സിനിമ ഒരു വ്യവസായമാണ്. അവിടെ നിലനില്‍ക്കണമെങ്കില്‍ നിങ്ങള്‍ വില്‍ക്കാന്‍ തയാറാകണമെന്നും ഒരു ദേശീയ മാധ്യമത്തിനു നല്‍കിയ അഭിമുഖത്തില്‍ നീന ഗുപ്ത തുറന്നടിച്ചു. സാന്ത് കി ആങ്ഘ് എന്ന ചിത്രത്തില്‍ അവസരം ചോദിച്ച് സഹനിര്‍മാതാവായ അനുരാഗ് കശ്യപിനെ വിളിച്ചപ്പോള്‍ ലഭിച്ച മറുപടി കേട്ട് താന്‍ അമ്പരന്നതായും നീന പറഞ്ഞു.

ചിത്രത്തില്‍ പ്രായമുള്ള സ്ത്രീ കഥാപാത്രം ചെയ്യുന്നതിനായാണ് അനുരാഗ് കശ്യപിനെ വിളിച്ചത്. ഈ കഥാപാത്രം ചെയ്യാന്‍ തയാറാണെന്നു പറഞ്ഞു. പക്ഷേ, അപ്പോള്‍ എനിക്കു മനസിലായി , സിനിമാ മേഖല എന്നത് വ്യവസായമാണ്. നിങ്ങള്‍ക്കു വില്‍ക്കാന്‍ എന്തെങ്കിലും ഉണ്ടെങ്കില്‍ സിനിമയില്‍ അവസരം ലഭിക്കും. അല്ലാത്തവര്‍ക്ക് അവസരങ്ങള്‍ നിഷേധിക്കപ്പെടുമെന്നും നീന ഗുപ്ത പറഞ്ഞു.

തന്റെ കഥാപാത്രത്തിനു വേണ്ടത് പ്രായമായ സ്ത്രീ ആണെന്നും എന്നാല്‍ ചിത്രത്തിനായി പണം മുടക്കുന്നവര്‍ക്ക് വേണ്ടത് യുവതികളെയാണെന്നും അനുരാഗ് കശ്യപ് അറിയിച്ചതായി നീന ഗുപ്ത വ്യക്തമാക്കി. അതുകൊണ്ടാണ് ഈ മേഖല വ്യവസായമാണെന്നു പറയുന്നത്. വില്‍ക്കാനുണ്ടെങ്കില്‍ നിങ്ങള്‍ക്കു നേടാന്‍ കഴിയും.

സാന്ത് കി ആങ്ഘിന്റെ ട്രെയിലര്‍ കഴിഞ്ഞ വര്‍ഷം റിലീസ് ചെയ്തപ്പോള്‍ തന്നെ പ്രസ്തുത കഥാപാത്രം സംബന്ധിച്ച് സോഷ്യല്‍ മീഡിയയില്‍ ചര്‍ച്ച സജീവമായിരുന്നു. എന്തുകൊണ്ട് പ്രായമായ വനിതകളെ ഈ കഥാപാത്രത്തിനായി തിരഞ്ഞെടുത്തില്ല എന്നായിരുന്നു സോഷ്യല്‍ മീഡിയയില്‍ ഉയര്‍ന്ന ചോദ്യം. നീന ഗുപ്തയെ പോലുള്ളവര്‍ക്ക് ഈ കഥാപാത്രം നല്‍കാമായിരുന്നു എന്ന് പലരും അഭിപ്രായപ്പെട്ടിരുന്നു.

ഞാനും അതേപറ്റി ചിന്തിക്കുകയാണ്. എന്തുകൊണ്ട് ഈ കഥാപാത്രത്തിനായി ഷബാന ആസ്മിയെയോ ജയ ബച്ചനേയോ തിരഞ്ഞെടുത്തില്ല എന്ന് നീന ഗുപ്ത ട്വിറ്ററില്‍ കുറിച്ചു. അതേസമയം, ആര് കഥാപാത്രം ചെയ്താലും അത് നന്നായി ചെയ്യുകയാണ് വേണ്ടതെന്ന മറുപടിയുമായി ചിത്രത്തിലെ നായിക തപ്‌സി പന്നുവും രംഗത്തെത്തി.

ബോളിവുഡിലെ പ്രിയ താരമായ നീന ഗുപ്ത നാഷണല്‍ സ്‌കൂള്‍ ഓഫ് ഡ്രാമയിലെ പഠനത്തിന് ശേഷമാണ് സിനിമ ലോകത്തേക്ക് എത്തിയത്. നീനയെ ഐഎഎസ് ഓഫീസര്‍ ആക്കണമെന്നായിരുന്നു അമ്മയുടെ ആഗ്രഹം. എന്നാല്‍ ബിരുദാനന്തര ബിരുദത്തിന് ശേഷം നീന എത്തിയത് നാഷണല്‍ സ്‌കൂള്‍ ഓഫ് ഡ്രാമയിലായിരുന്നു.

സംസ്‌കൃത നാടകങ്ങളില്‍ സ്‌റ്റേജ് ടെക്‌നിക്ക് എന്നതായിരുന്നു ഗവേഷണ വിഷയം. സംസ്‌കൃതത്തില്‍ കൂടുതല്‍ പഠനം നടത്തണമെന്ന് കരുതിയിരുന്ന നീനയുടെ തീരുമാനത്തെ മാറ്റി മറിച്ചത് 1982ല്‍ പുറത്തു വന്ന ആധാര്‍ശില എന്ന ചിത്രമായിരുന്നു. സിനിമ തലക്ക് പിടിച്ചതോടെ നീന ബോംബെയിലേക്ക് എത്തുകയായിരുന്നു. നീനയുടെ സീനിയര്‍ ബാച്ച് വിദ്യാര്‍ത്ഥിയായിരുന്നു അനുപം ഖേറും സതീഷ് കൗശികും, നീനയുടെ ജൂനിയറായിരുന്നു സുഷ്മിത മുഖര്‍ജി. അന്നൊക്കെ ഒരിക്കലും നായികാ വേഷങ്ങള്‍ നീനയ്ക്ക് ലഭിച്ചിരുന്നില്ല. അന്ന് നായികമാരായവര്‍ ഇന്ന് ക്യാമറയ്ക്ക് പിന്നിലും നീന ക്യാമറയ്ക്ക് മുന്നിലും എത്തി. അതാണ് സിനിമാ ലോകം.