മകരമാസം തുടങ്ങിയതോടെ കാലം തന്നെ മാറുകയാണ്. ഇനി ഉത്സവങ്ങളുടെ കാലങ്ങള്‍ക്കാണ് ആരംഭം കുറിക്കുന്നത്. മകര ചൊവ്വ കഴിഞ്ഞതോടെ ദേവന്മാരുടെ പകല്‍ ആരംഭിച്ചുകഴിഞ്ഞു എന്നാണ് വിശ്വാസം. നവഗ്രഹങ്ങളില്‍ ഒന്നായ ചൊവ്വ ബലവാനാകുന്ന രാശിയാണ് മകരം. അതിനാല്‍ മകരമാസം ചൊവ്വയുടെ ഉച്ചക്ഷേത്രമെന്നാണ് അറിയപ്പെടുന്നത്. ചൊവ്വയുടെ സ്വാധീനശക്തി കൂടുതല്‍ ഉള്ള മകരമാസത്തിലെ മുപ്പെട്ട് ചൊവ്വ കേരളീയര്‍ ഭക്തിപൂര്‍വം ആചരിച്ചു വരുന്നു. ഹൈന്ദവ വിശ്വാസപ്രകാരം സംഹാരത്തിന്റെ ദേവതയായാണ് ഭദ്രകാളി അറിയപ്പെടുന്നത്. അതുകൊണ്ടുതന്നെ മകരമാസത്തിലെ ആദ്യത്തെ ചൊവ്വാഴ്ച, മകര ചൊവ്വയായി പ്രത്യേകിച്ച് ഭദ്രകാളി ക്ഷേത്രങ്ങളില്‍ ആഘോഷിച്ചു വരുന്നു.

ഭദ്രകാളി ക്ഷേത്രങ്ങളില്‍ ഈ ദിവസങ്ങളില്‍ വിശേഷാല്‍ പൂജകള്‍, തായമ്പക മുതലായ വാദ്യകലാപ്രകടനങ്ങള്‍, പ്രത്യേക ദീപാലങ്കാരങ്ങള്‍, പുഷ്പാലങ്കാരങ്ങള്‍, പൂമൂടല്‍, പൊങ്കാല ഉത്സവം എന്നിവ പതിവാണ്. മകര ചൊവ്വക്ക് ഭദ്രകാളീക്ഷേത്ര ദര്‍ശനം അതിമധുര പായസ നിവേദ്യം ഇവ നടത്തുന്നത് ചൊവ്വ ദോഷത്തിനുള്ള പരിഹാരവും ദേവി പ്രീതിക്ക് വളരെ നല്ലതുമാണ്. നാമജപത്തോടെ ദേവീക്ഷേത്രദര്‍ശനം നടത്തി പൂജ തൊഴുതാല്‍ സര്‍വൈശ്വര്യങ്ങളും ലഭിക്കുമെന്നും, ജീവിതത്തിലെ എല്ലാ പ്രതിസന്ധിഘട്ടങ്ങളെയും ദുരിതങ്ങളെയും തരണം ചെയ്യാന്‍ ദേവി ഭക്തനെ പ്രാപ്തനാക്കും എന്നാണ് വിശ്വാസം.

ചൊവ്വയുടെ അധിദേവതകള്‍ സുബ്രഹ്മണ്യസ്വാമിയും ഭദ്രകാളിയുമാണ്. യുഗ്മരാശിയായ മകരം ഭദ്രകാളീ പ്രീതിക്ക് പ്രാധാന്യമുള്ള കാലമാണ്. ശിവന്റെ പുത്രിയും ദാരികനാശിനിയുമായ കാളിയേയും മറ്റു ചിലയിടത്ത് ഗൗരിയുടെ അംശമായ പാര്‍വതിയെത്തന്നെ കാളിയായും ആരാധിച്ചുപോകുന്നു. ഭദ്രകാളീക്ഷേത്രങ്ങളില്‍ ദേവിയുടെ കളം വരച്ച് പൂജനടത്തുകയും, നവകം മുതലായവ ഭഗവതിയ്ക്ക് ആടി ചൈതന്യത്തെ ശക്തിപ്പെടുത്തുകയും ചെയ്യുന്നു.

മീനമാസമായതോടെ ഇനി രാത്രി പകലാകുകയാണ്. അമ്പലങ്ങള്‍ തോറും ഉത്സവങ്ങള്‍ അരങ്ങേറും. അതിനാല്‍ തന്നെ ദേവങ്ങള്‍ക്ക് രാത്രി പകലാണ്. ഈ സമയങ്ങളില്‍ ദൈവങ്ങളെ ധ്യാനിച്ചാല്‍ ഇഷ്ടകാര്യങ്ങള്‍ നടക്കുമെന്നാണ് വിശ്വാസം.

കേരളത്തിലെ ഭഗവതിക്ഷേത്രങ്ങളില്‍ അഥവാ ഭദ്രകാളി ക്ഷേത്രങ്ങളില്‍ വിശേഷപൂര്‍വ്വം ആഘോഷിക്കുന്ന ഒരു ദിവസമാണ് മീനമാസത്തിലെ ഭരണി നക്ഷത്രം. ഈ ദിവസത്തെ മീനഭരണി എന്നാണ് അറിയപ്പെടുന്നത്. സൂര്യന്‍ മീനം രാശിയില്‍ പ്രവേശിക്കുന്ന ഈ ദിവസം ദേവി അധര്‍മത്തിന് മേല്‍ വിജയം നേടിയതായി ആണ് സങ്കല്പം. ഒട്ടനവധി ക്ഷേത്രങ്ങളില്‍ അന്നേദിവസം ഉത്സവമായി ആഘോഷിക്കാറുണ്ട്. കെട്ടുകാഴ്ച, ഗരുഡന്‍ തൂക്കം, പൊങ്കാല മുതലായ ആഘോഷങ്ങളോട് കൂടിയ ഉത്സവം നടക്കാറുണ്ട്. കേരളത്തിലെ ആദികാളിക്ഷേത്രമായ കൊടുങ്ങല്ലൂര്‍ ശ്രീകുരുംബ ഭഗവതീക്ഷേത്രത്തില്‍ മീനഭരണിയോടനുബന്ധിച്ചു നടക്കുന്ന രേവതി നാളിലെ 'രേവതി വിളക്ക് ', അശ്വതി നാളിലെ 'തൃച്ചന്ദനച്ചാര്‍ത്തു പൂജ, അശ്വതി കാവ് തീണ്ടല്‍' എന്നിവ പ്രസിദ്ധമാണ്. കുംഭമാസത്തിലെ ഭരണി നാളിലെ കുംഭഭരണി സമാനമായ മറ്റൊരു വിശേഷദിവസമാണ്.

ആനിക്കാട് ഭഗവതിക്ഷേത്രം, പുത്തൂര്‍ കണിയാപൊയ്ക ഭഗവതി ക്ഷേത്രം, തട്ടയില്‍ ഒരിപ്പുറത്ത് ഭഗവതി ക്ഷേത്രം, ചാഴിക്കാറ്റ് ഭഗവതി ക്ഷേത്രം, വെള്ളനാട് ഭഗവതി ക്ഷേത്രം, ചമ്പക്കര ഭഗവതി ക്ഷേത്രം, കല്‍ക്കുളത്തുകാവ് ഭഗവതി ക്ഷേത്രം, മോര്‍ക്കുളങ്ങര ഭഗവതി ക്ഷേത്രം, കൊടുങ്ങല്ലൂര്‍ ശ്രീ കുരുംമ്പ ഭഗവതീ ക്ഷേത്രം, നന്തന്‍കോട് ഭദ്രകാളി ക്ഷേത്രം തിരുവനന്തപുരം എന്നിവയാണ് മീനഭരണി ദിനത്തില്‍ ഉത്സവമാഘോഷിക്കുന്ന ക്ഷേത്രങ്ങള്‍.

ഇപ്പോഴത്തെ ഉത്സവങ്ങള്‍ക്ക് പഴയ പകിട്ടില്ലെങ്കിലും വലിയ ആഘോഷമാണ് നടക്കാറ്. വിശ്വാസം അതാണല്ലോ എല്ലാം എന്ന് ഓര്‍മ്മിപ്പിക്കുന്നതാണ് ഈ ആഘോഷങ്ങളെല്ലാം തന്നെ.