ഇനി കളികള് നേരിട്ട്... കേന്ദ്രവിരുദ്ധ പരാമര്ശങ്ങള് കുത്തിനിറച്ച നയപ്രഖ്യാപന പ്രസംഗം ഗവര്ണര്ക്ക് നല്കാനൊരുങ്ങുന്നു; തിരുത്താന് ആവശ്യപ്പെട്ട് ഗവര്ണര് തിരികെ അയച്ചാലും വഴങ്ങേണ്ടെന്നു മന്ത്രിമാര്; എഴുതി വായിക്കുന്നത് റബ്ബര് സ്റ്റാമ്പല്ലെന്ന് കാണിക്കാന് ഗവര്ണറും
ഗവര്ണര് ആരിഫ് മുഹമ്മദ് ഖാന്റെ നിയമസഭയിലെ നയ പ്രഖ്യാപന പ്രസംഗത്തിന് കേവലം ഒരാഴ്ചയാണ് ഉള്ളത്. ഈ മാസം 29നാണ് നയ പ്രഖ്യാപന പ്രസംഗം നടക്കുന്നത്. സര്ക്കാര് നല്കുന്ന നയപ്രഖ്യാപന പ്രസംഗം അതുപോലെ വായിക്കുമോ അതില് തിരുത്ത് വരുത്തി തന്റെ നിലപാടുകള് കൂട്ടിച്ചേര്ക്കുമോ എന്നാണ് കേരളം ഏറെ ആകാംക്ഷയോടെ കാത്തിരിക്കുന്നത്.
അതേസമയം പൗരത്വ ഭേദഗതി നിയമത്തിനെതിരായ കേന്ദ്രവിരുദ്ധ പരാമര്ശങ്ങള് ഉള്പ്പെട്ട സംസ്ഥാനത്തിന്റെ നയപ്രഖ്യാപന പ്രസംഗ കരടിന് ഇന്നലെ സംസ്ഥാന മന്ത്രിസഭാ യോഗം അംഗീകാരം നല്കി. കേന്ദ്ര സര്ക്കാരിന് എതിരായ പരാമര്ശങ്ങള് നീക്കാന് ഗവര്ണര് ആവശ്യപ്പെട്ടാല് വഴങ്ങേണ്ട കാര്യമില്ലെന്നും മന്ത്രിസഭാ യോഗത്തില് ഭൂരിപക്ഷ അഭിപ്രായം.
അതേസമയം പൗരത്വ ഭേദഗതി നിയമത്തിനെതിരേയുള്ള കേരള നിയമസഭയുടെ പ്രമേയം നയപ്രഖ്യാപനത്തില് ഉള്പ്പെടുത്തണമെന്ന പ്രതിപക്ഷ നേതാവിന്റെ ആവശ്യം അതേപടി പരിഗണിച്ചിട്ടില്ലെന്നു സൂചന. കേരളത്തിന് പ്രളയാനന്തര ധനസഹായം നല്കുന്നതിലടക്കം കേന്ദ്രസര്ക്കാര് കാട്ടുന്ന അവഗണന ഉള്പ്പെടെ രാഷ്ട്രീയ വിമര്ശനമായി പ്രസംഗത്തില് ചേര്ത്തിട്ടുണ്ടെന്നാണു സൂചന. പൗരത്വ ഭേദഗതി വിഷയത്തില് സംസ്ഥാന സര്ക്കാരിനോട് ഇടഞ്ഞു നില്ക്കുന്ന ഗവര്ണര് നയപ്രഖ്യാപനത്തോട് സ്വീകരിക്കുന്ന സമീപനമെന്താകുമെന്നതു സംബന്ധിച്ച് ഇന്നലെ മന്ത്രിസഭായോഗം വിശദമായി ചര്ച്ച ചെയ്തു.
തിരുത്തല് വേണമെന്ന ആവശ്യവുമായി ഗവര്ണര് മടക്കിയാലും രണ്ടാമത് സര്ക്കാര് അയച്ചാല് അത് അദ്ദേഹത്തിന് അംഗീകരിക്കാ തിരിക്കാനാവില്ലെന്നു മുഖ്യമന്ത്രി പിണറായി വിജയന് യോഗത്തില് ചൂണ്ടിക്കാട്ടി. തിരുത്തല് ആവശ്യപ്പെട്ടാല് അതിനു സര്ക്കാര് വഴങ്ങേണ്ടതില്ലെന്നായിരുന്നു ഭൂരിഭാഗം മന്ത്രിമാരുടെയും അഭിപ്രായം.
നയപ്രഖ്യാപനം വായിക്കുകയെന്ന ഭരണഘടനാ ബാധ്യത അദ്ദേഹത്തിന് നിറവേറ്റാതിരിക്കാനാവില്ലെന്നും മന്ത്രിസഭ വിലയിരുത്തി. വിയോജിപ്പുള്ള ഭാഗങ്ങള് അദ്ദേഹം വായിക്കാതെ വിടാനിടയുണ്ട്. എങ്കിലും മുഴുവന് വായിച്ചില്ലെങ്കിലും തുടക്കവും ഒടുക്കവും വായിച്ചാല് നയപ്രഖ്യാപനം സഭയില് അവതരിപ്പിച്ചതായി കണക്കാക്കാമെന്നതിന് മുന്കാല റൂളിങ്ങുകളും കീഴ്വഴക്കങ്ങളുമുണ്ടെന്നും യോഗത്തില് ചൂണ്ടിക്കാണിക്കപ്പെട്ടു.
എന്നാല് ഗവര്ണര് ആരിഫ് മുഹമ്മദ് ഖാന് വിട്ടുവീഴ്ചയ്ക്ക് തയ്യാറാവില്ലെന്നാണ് അറിയുന്നത്. താന് റബ്ബര് സ്റ്റാമ്പ് അല്ലെന്നാണ് ആദ്യം മുതല് പറയുന്നത്. ഭരണഘടനയ്ക്കകത്തു നിന്നുകൊണ്ട് തന്നെ നയപ്രസംഗം പൊളിച്ചടുക്കാനാണ് ഗവര്ണറുടെ ശ്രമം.
പൗരത്വ നിയമ ഭേദഗതിക്കെതിരെ സുപ്രീം കോടതിയില് ഹര്ജി നല്കിയതില് സംസ്ഥാന സര്ക്കാര് നല്കിയ വിശദീകരണം തള്ളി നേരത്തെ ഗവര്ണര് രംഗത്തെത്തിയിരുന്നു. ഒരു വിശദീകരണവും തൃപ്തികരമല്ലെന്ന് ഗവര്ണര് ആരിഫ് മുഹമ്മദ് ഖാന് പറഞ്ഞത്. ഒരു ന്യായീകരണവും സ്വീകാര്യമല്ല.
സര്ക്കാരിന്റെ നിയമ വിരുദ്ധ നടപടിയാണ് ചൂണ്ടിക്കാട്ടിയത്. ഇത് ഈഗോ ക്ലാഷല്ല. വ്യക്തിപരമായ പ്രശ്നങ്ങളുമില്ല. ഗവര്ണറെ അറിയിക്കാതെയാണ് സര്ക്കാര് സുപ്രീം കോടതിയെ സമീപിച്ചത്. നിയമപരമായി അത് ശരിയല്ല. ജനാധിപത്യത്തില് വ്യക്തികള്ക്ക് അധികാരമുണ്ട്. ആ അധികാരം നിയമങ്ങള് ലംഘിക്കാനുള്ള ലൈസന്സല്ല. ഗവര്ണറെ അറിയിക്കാതെ സുപ്രീം കോടതിയെ സമീപിക്കാന് സര്ക്കാരിനാവില്ലെന്നുമാണ് അദ്ദേഹം വ്യക്തമാക്കിയത്. ഇതില് ഉറച്ചു നില്ക്കുന്ന ഗവര്ണര് നയപ്രഖ്യാപന പ്രസംഗത്തിലും ഉറച്ചുനില്ക്കുമെന്നാണ് കരുതുന്നത്. സംസ്ഥാന സര്ക്കാരിനെതിരെ നിയമസഭയില് ആഞ്ഞടിച്ചാല് അത് മറ്റൊരു വിവാദത്തിനിടയാക്കും.
"
https://www.facebook.com/Malayalivartha
