പണം തട്ടാൻ ശ്രമിച്ച കേസിൽ നടിയുടെ വീട്ടിലും വ്യാപാര സ്ഥാപനത്തിലും റെയ്ഡ്.നടി ലീന മരിയ പോളിന്റെ കൊച്ചിയിലെ ബ്യൂട്ടിപാര്‍ലറിലും ചെന്നൈയിലെ വീട്ടിലും ആണ് സി.ബി.ഐ. റെയ്ഡ് നടന്നത് . ഹൈദരാബാദിലെ വ്യവസായിയില്‍നിന്നും പണം തട്ടാന്‍ കേസിലാണ് സി.ബി.ഐ. റെയ്ഡ് നടത്തിയത്. തട്ടിപ്പു കേസിലെ മുഖ്യ പ്രതികളായ ഹൈദരാബാദ് സ്വദേശിയായ മണിവര്‍ണ റെഡ്ഡി, മധുര സ്വദേശി സെല്‍വം രാമരാജന്‍ എന്നിവരുമായി ലീന മരിയ പോളിനും ഭര്‍ത്താവ് സുകേഷ് ചന്ദ്രശേഖറിനും ബന്ധമുണ്ടെന്ന് കണ്ടെത്തിയതിനെ തുടര്‍ന്നാണ് ഇവരുടെ ചെന്നെയിലെ വീട്ടിലും കൊച്ചിയിലെ ബ്യൂട്ടി പാര്‍ലറിലും സി ബി ഐ റെയ്ഡ് നടത്തിയത്.

ഒരു ബാങ്ക് തട്ടിപ്പ് കേസില്‍ സി.ബി.ഐ. പ്രതിയാക്കിയ ഹൈദരാബാദ് വ്യവസായി സാംബശിവ റാവുവില്‍നിന്ന് സി.ബി.ഐ. ഓഫീസര്‍ ആണെന്ന വ്യാജേന രണ്ടുപേര്‍ പണം തട്ടാൻ ശ്രമിച്ചിരുന്നു. മണിവര്‍ണ റെഡ്ഡി, സെല്‍വം രാമരാജന്‍ എന്നിവരായിരുന്നു പണം തട്ടാൻ ശ്രമിച്ചവർ. സാംബശിവ റാവുവിനെ കേസില്‍നിന്ന് രക്ഷപ്പെടുത്താമെന്ന വ്യാജേന മണിവര്‍ണ റെഡ്ഡിയും സെല്‍വം രാമരാജനും സാംബശിവ റാവുവിനെ കബളിപ്പിക്കുകയായിരുന്നു. സി.ബി.ഐ.യുടെ ഔദ്യോഗിക നമ്പര്‍ ആധുനിക സാങ്കേതികവിദ്യ ഉപയോഗിച്ച് സ്പൂഫ് ചെയ്താണ് ഇവര്‍ സാംബശിവ റാവുവിനെ ബന്ധപ്പെട്ടത്. തുടര്‍ന്ന് ഇതിനെതിരേ സാംബശിവൻ ഇവർക്കെതിരെ പരാതി നൽകി. തുടർന്ന് സ് ബി ഐ കേസ് ഏറ്റെടുക്കുകയായിരുന്നു.

നേരത്തെ സമാനമായ ബാങ്ക് തട്ടിപ്പ് കേസിലും നടിയെയും ഭർത്താവിനെയും സി.ബി.ഐ. അറസ്റ്റ് ചെയ്തിരുന്നു. കൊച്ചിയിലും ചെന്നൈയിലും കൂടാതെ ഹൈദരാബാദ്, മധുര എന്നിവിടങ്ങളിലും സിബിഐ പരിശോധന നടത്തി.