കൊറോണ വൈറസ് ബാധ; സൗദിയിലെ നഴ്സുമാരുടെ വിഷയത്തില് നടപടി ആവശ്യപ്പെട്ട് കേന്ദ്രത്തിന് മുഖ്യമന്ത്രി പിണറായി വിജയൻ കത്തയച്ചു
സൗദി അറേബ്യയിലുള്ള മലയാളി നഴ്സുമാര് കൊറോണ വൈറസ് ഭീഷണി നേരിടുന്ന സാഹചര്യം ചൂണ്ടിക്കാട്ടി അടിയന്തിര നടപടി ആവശ്യപ്പെട്ട് മുഖ്യമന്ത്രി പിണറായി വിജയന് കേന്ദ്രത്തിന് കത്തയച്ചു. സൗദിയിലെ അസിര് അബാ അല് ഹയാത്ത് ആശുപത്രിയിലെ നഴ്സുമാര്ക്ക് കൊറോണ വൈറസ് ബാധയുണ്ടായ സംഭവം ഗൗരവമായിക്കണ്ട് നടപടി സ്വീകരിക്കണമെന്ന് ആവശ്യപ്പെട്ടുകൊണ്ടാണ് വിദേശകാര്യമന്ത്രി എസ് ജയശങ്കറിന് അയച്ച കത്തില് മുഖ്യമന്ത്രി വിജയൻ അഭ്യർത്ഥിച്ചത്. രോഗബാധയുള്ളവര്ക്ക് വിദഗ്ധ ചികിത്സയും സംരക്ഷണവും ഉറപ്പാക്കുന്നത് ഉള്പ്പെടെയുള്ള നടപടികള് സ്വീകരിക്കണമെന്നാണ് മുഖ്യമന്ത്രി കേന്ദ്രത്തോട് അഭ്യർത്ഥിച്ചത്.
സൗദി അറേബ്യയിലെ അബഹയില് കൊറോണ വൈറസ് ബാധിച്ച ഫിലിപ്പൈന്സ് യുവതിയെ ചികിത്സിച്ച 30 മലയാളി നഴ്സുമാരെ പ്രത്യേക മുറിയിലേക്ക് മാറ്റി. ഇവര്ക്ക് മതിയായ ചികിത്സയോ കൃത്യമായ ഭക്ഷണമോ ലഭിക്കുന്നില്ല എന്ന പരാതി ഉയര്ന്നിരുന്നു. ഫിലിപ്പൈന്സ് യുവതിയെ ചികിത്സിച്ച ഏറ്റുമാനൂര് സ്വദേശിനിയായ നഴ്സിന് കൊറോണ വൈറസ് ബാധ സ്ഥിതീകരിച്ചു. ഈ സാഹചര്യത്തിലാണ് മുഖ്യമന്ത്രി കേന്ദ്രത്തിനു കത്തയച്ചത്.
കൊറോണ വൈറസ് വിഷയത്തില് കേന്ദ്ര സിവില് വ്യോമയാന മന്ത്രാലയവും ആരോഗ്യ കുടുംബക്ഷേമ മന്ത്രാലയവും ചൈനയിലെ ഇന്ത്യന് കോണ്സുലേറ്റുകളും മാര്ഗനിര്ദ്ദേശങ്ങള് പുറപ്പെടുവിച്ചിട്ടുണ്ടെന്ന് കേന്ദ്ര വിദേശകാര്യ മന്ത്രാലയ വക്താവ് രവീഷ് കുമാര് വാര്ത്താ സമ്മേളനത്തില് അറിയിച്ചു. ചൈനയില്നിന്ന് എത്തുന്നവരെ വിമാനത്താവളങ്ങളില് കര്ശന പരിശോധനയ്ക്ക് വിധേയരാക്കുന്നുണ്ടെന്നും അദ്ദേഹം വാർത്താസമ്മേളനത്തിൽ വെളിപ്പെടുത്തി.
https://www.facebook.com/Malayalivartha