കേന്ദ്രം ഒരു വരവങ്ങ് വരും കേരളത്തില് അഴിമതിക്കാര് ജാഗ്രതൈ; അനധികൃത നിര്മാണമെന്ന് കണ്ടെത്തി മരടിലെ ഫ്ളാറ്റെല്ലാം ഇടിച്ചുനിരത്തിയിട്ടും ഉത്തരവാദികളെ നിയമത്തിന് മുന്നില് കൊണ്ടുവരാനുള്ള നീക്കത്തില് സര്ക്കാരിന് മെല്ലെപ്പോക്ക്
അനധികൃത നിര്മാണമെന്ന് കണ്ടെത്തി മരടിലെ ഫ്ളാറ്റെല്ലാം ഇടിച്ചുനിരത്തിയിട്ടും ഉത്തരവാദികളെ നിയമത്തിന് മുന്നില് കൊണ്ടുവരാനുള്ള നീക്കത്തില് സര്ക്കാരിന് മെല്ലെപ്പോക്ക്. പഞ്ചായത്ത് മുന് പ്രസിഡന്റും സിപിഎം നേതാവുമായ കെ.എ.ദേവസിയെ പ്രതിചേര്ത്ത് അന്വേഷണം നടത്താന് അനുമതിക്കായുള്ള ക്രൈംബ്രാഞ്ചിന്റെ അപേക്ഷ ഒരു നടപടിയുമില്ലാതെ ഒന്നരമാസം പൂഴ്ത്തിയതിന് തെളിവ്.
അതേസമയം പഞ്ചായത്ത് ഭരണസമിതിയിലെ മുന് അംഗങ്ങള് അടക്കം സിപിഎമ്മുകാര് ദേവസിക്കെതിരെ മജിസ്ട്രേറ്റിന് മുന്നില് രഹസ്യമൊഴി നല്കാന് തുടങ്ങി. ഈ പടുകൂറ്റന് കെട്ടിടങ്ങളെല്ലാം അനധികൃതമെന്ന് കണ്ടെത്തി ഇങ്ങനെ ഇടിച്ചുനിരത്താന് സുപ്രീംകോടതി ഉത്തരവിട്ടിട്ട് എട്ടു മാസമാകുന്നു. ഇവയ്ക്ക് അനുമതി നല്കിയവര്ക്കെതിരെ നടപടിയെടുക്കാനും നിര്ദേശിച്ചതു പ്രകാരം അന്വേഷണം അന്ന് തുടങ്ങിയതാണ്. കാര്യങ്ങളെല്ലാം പകല്പോലെ വ്യക്തമായിരിക്കെ മരട് മുനിസിപ്പാലിറ്റിയില് നിന്ന് അക്കാലത്തെ രേഖകള് കസ്റ്റഡിയിലെടുത്ത് അന്വേഷണം തുടങ്ങിയ ക്രൈംബ്രാഞ്ച് പിന്നെ അന്നത്തെ ഭരണസമിതി അംഗങ്ങളെയും ചോദ്യംചെയ്ത് നിഗമനത്തിലെത്തി. അങ്ങനെയാണ് 2005 മുതല് 2010 വരെ പഞ്ചായത്ത് പ്രസിഡന്റ്് ആയിരുന്ന കെ.എ.ദേവസിക്കെതിരെ നടപടിക്ക് സര്ക്കാരിന്റെ അനുമതി തേടിയത്. പ്രത്യേക അന്വേഷണ സംഘം ഡിവൈഎസ്പി ജോസി ചെറിയാന് ക്രൈംബ്രാഞ്ച് മേധാവി ടോമിന് തച്ചങ്കരിക്ക് ഈ കത്തയച്ചത് കഴിഞ്ഞവര്ഷം ഡിസംബര് അഞ്ചിന്. തൊട്ടടുത്ത ദിവസം തന്നെ ക്രൈംബ്രാഞ്ച് മേധാവി സര്ക്കാരിലേക്ക് അയച്ചതിന്റെ പകര്പ്പാണിത്. ഒന്നരമാസം ഇതിന്മേല് ഒരു നടപടിക്കും സര്ക്കാര് തയ്യാറായില്ല. അന്വേഷണം വഴിമുട്ടിയെന്ന മട്ടില് വാര്ത്തകള് പുറത്തുവരാന് തുടങ്ങിയതോടെ വിവാദം ഭയന്ന് ഇക്കഴിഞ്ഞ തിങ്കളാഴ്ച ഇത് പൊടിതട്ടിയെടുത്ത ആഭ്യന്തരവകുപ്പ് പക്ഷെ നിയമോപദേശം തേടാന് നിര്ദേശിച്ച് ഫയല് അയച്ചതിന്റെ രേഖയാണിത്. ഡയറക്ടര് ജനറല് ഓഫ് പ്രോസിക്യുഷനോടാണ് ഉപദേശം തേടുന്നത്.
പഞ്ചായത്ത് പ്രസിഡന്റെന്ന പദവിയിലിരിക്കെ നടത്തിയ ക്രമക്കേടായതിനാല് അന്വേഷണത്തിന് മുന്കൂര് അനുമതി വേണമെന്നത് സുപ്രീംകോടതി നിര്ദേശമാണ്. കുറ്റകൃത്യത്തില് ദേവസിയുടെ പങ്ക് വ്യക്തമാക്കി വിശദമായ റിപ്പോര്ട്ട് ക്രൈംബ്രാഞ്ച് സര്ക്കാരിന് നല്കിയിട്ടുമുണ്ട്. സാഹചര്യം ഇതായിരിക്കെ ഇപ്പോഴത്തെ നീക്കം നടപടി വൈകിക്കാനാണെന്ന് വ്യക്തം. എന്നാല് ഇതിനിടയിലും ദേവസിയുടെ കുരുക്ക് മുറുകുകയാണ്. ഭരണസമിതിയില് ഒപ്പം ഉണ്ടായിരുന്ന മൂന്നു സിപിഎം അംഗങ്ങളുടെ രഹസ്യമൊഴികള് രേഖപ്പെടുത്തുകയാണ് ഈ ദിവസങ്ങളില്. വി വിജയകുമാര്, പികെ രാജു എന്നിവര് ചൊവ്വയും ബുധനുമായി മജിസ്ട്രേറ്റിന് മുന്നിലെത്തി മൊഴി നല്കി.
https://www.facebook.com/Malayalivartha
