പട്ടിണിക്കിട്ട് കൊലപ്പെടുത്താൻ ശ്രമം; സന്യാസിനി സഭക്കെതിരെ ശബ്ദമുയർത്തിയതിന്റെ പേരിൽ നേരിടുന്ന ക്രൂരതകൾ വെളിപ്പെടുത്തി സിസ്റ്റർ ലൂസി കളപ്പുര
സന്യാസിനി സഭക്കെതിരേ ആരോപണങ്ങള് ഉയര്ത്തിയതിന്റെ പേരില് നിരവധി പീഡനങ്ങൾ സഹിക്കേണ്ടി വന്ന സിസ്റ്റര് ലൂസി കളപ്പുരയെ പട്ടിണിക്കിടുകയാണെന്ന് ആരോപണം. സിസ്റ്റര് ലൂസി തന്നെയാണ് ഇത്തരമൊരു ആരോപണവുമായി രംഗത്തെത്തിയിരിക്കുന്നത്. സഭയില് നിന്ന് പുറത്താക്കിയതിനെതിരെ ഇവര് നല്കിയ അപ്പീല് വത്തിക്കാന് പോലും തള്ളിയിരുന്നു.
വത്തിക്കാനില് നിന്നുള്ള മറുപടി വന്നതിന് ശേഷം, തന്നെ മഠത്തില് നിന്ന് പുറത്താക്കിയ രീതിയിലാണ് മറ്റ് കന്യാസ്ത്രീകള് പെരുമാറുന്നത്. പത്തോളം കന്യാസ്ത്രീകളുള്ള മഠത്തില് തനിക്കുള്ള ഭക്ഷണം മാത്രം മാറ്റി വയ്ക്കുന്നില്ല. ഇവര്ക്കൊപ്പമല്ല ഭക്ഷണം കഴിക്കുന്നത്. വേണമെങ്കില് സ്വന്തമായി ഭക്ഷണം ഉണ്ടാക്കി കഴിക്കാനാണ് നിര്ദേശമെന്നും സിസ്റ്റര് പറയുന്നു . സിസ്റ്റര് താമസിക്കുന്ന മുറിയുടെ വാതിലൊഴികെ ബാക്കിയെല്ലാ വാതിലുകളും അടച്ചിടുകയാണ്. തനിക്ക് പുറത്തേക്കോ അകത്തേക്കോ പോകാനുള്ള സാഹചര്യമില്ലെന്നും പിന്വാതിലൂടെയാണ് അകത്ത് കയറുന്നതെന്നും സിസ്റ്റര്. ആരെങ്കിലും കാണാന് വന്നാല് പോലും കയറാനുള്ള സാഹചര്യമില്ല.
പൊലീസില് നല്കിയ പരാതികളില് ഇനിയും തീരുമാനമായിട്ടില്ലെന്നും പൊലീസും മഠം അതികൃതര്ക്കൊപ്പമാണെന്നും സിസ്റ്റര് ലൂസി ആരോപിക്കുന്നു. കന്യാസ്ത്രികള്ക്കും നവമാധ്യമങ്ങളിലൂടെ തന്നെ അപമാനിച്ച നോബിള് തോമസ് പാറക്കലിനുമെതിരെ പൊലീസില് നല്കിയ പരാതിയില് നടപടിയെടുത്തില്ലെന്നും, പൊലീസും മഠം അധികൃതര്ക്കൊപ്പമെന്ന് സംശയിക്കേണ്ടിയിരിക്കുന്നുവെന്നും സിസ്റ്റര് പറഞ്ഞു. സഭയില് തുടരാന് അനുവദിക്കണമെന്നാവശ്യപ്പെട്ട് സിസ്റ്റര് നല്കിയ അപേക്ഷ വത്തിക്കാന്റെ പരിഗണനയിലാണ്.
ഇതിനുശേഷം സഭക്കകത്തെ സ്ഫോടനാത്മകമായ വിവരങ്ങള് തുറന്നു പറഞ്ഞ് അവര് ആത്മകഥയും എഴുതിയിരുന്നു. ഇതും സഭയിലുള്ളവരെ ചൊടിപ്പിച്ചിട്ടുണ്ട്. സിസ്റ്റര് ലൂസി താമസിക്കുന്ന മഠത്തിലുള്ളവര് ഭക്ഷണം പോലും നല്കാറില്ലെന്നും ഇതുമൂലം താന് പട്ടിണിയിലാണെന്നുമാണ് സിസ്റ്ററുടെ ആരോപണം. പോലീസും സഭക്കൊപ്പമാണ്. പലതരത്തിലും മഠത്തിലുള്ളവര് പീഡിപ്പിച്ച് അപായപ്പെടുത്താന് ശ്രമിക്കുകയാണ്. മഠത്തിന്റെ അധികൃതർ മഠത്തില്നിന്ന് ഇറങ്ങിപോകാന് നിരന്തരമായി ആവശ്യപ്പെടുന്നതായും സിസ്റ്റര് ആരോപിച്ചു
എന്ത് വന്നാലും മഠം വിട്ട് താന് പുറത്തേക്ക് ഇറങ്ങില്ലെന്ന് അവര് നേരത്തെ വ്യക്തമാക്കിയിരുന്നു. ഒരു ഫോണ്കോളില് പോലും തനിക്ക് പറയാനുള്ളതെന്തെന്ന് കേള്ക്കാന് സഭ തയ്യാറായിരുന്നില്ല. ഈ സാഹചര്യത്തില് തനിക്ക് മഠത്തില് തുടരാന് അവകാശമുണ്ടെന്നും സിസ്റ്റര് ലൂസി പറഞ്ഞിരുന്നു. ഈ സാഹചര്യത്തില് തന്നെയാണ് അവര് മഠത്തില് തുടരുന്നത്. നേരത്തേയും സിസ്റ്റര് ലൂസിക്കെതിരായി നിരവധി ആരോപണങ്ങളാണ് സന്യാസിനി സഭ ഉയര്ത്തിയിരുന്നത്. ബിഷപ്പ് ഫ്രാങ്കോ മുളയ്ക്കല് കന്യാസ്ത്രീയെ ബലാത്സംഗം ചെയ്ത കേസില് ഇരയ്ക്ക് നീതി തേടി കൊച്ചിയില് നടത്തിയ സമരത്തില് പങ്കെടുത്ത് അഭിപ്രായം തുറന്നു പറഞ്ഞ ശേഷമാണ് ഇവര്ക്കെതിരെ കടന്നാക്രമണം ശക്തമായത്. 'സ്നേഹമഴയില്' എന്ന പുസ്തകമെഴുതുക കൂടി ചെയ്തതോടെ, സിസ്റ്ററെ സഭയില് നിന്ന് പുറത്താക്കിയതായി സഭ ഉത്തരവ് പുറപ്പെടുവിച്ചു. 11 കാരണങ്ങളായിരുന്നു സിസ്റ്റര് ലൂസിയുടെ അപ്പീല് തള്ളാനായി കത്തില് അക്കമിട്ട് നിരത്തിയിരുന്നത്.
മുന്നറിയിപ്പുകള് നല്കിയിട്ടും സഭയുടെ നിയമങ്ങള് പാലിക്കാത്ത വിധമുള്ള ജീവിത ശൈലി തുടരുന്നുവെന്ന് ചൂണ്ടിക്കാട്ടിയാണ് നേരത്തെ എഫ്സിസി സന്യാസി സമൂഹത്തില് നിന്നും സിസ്റ്റർ ലൂസിയെ പുറത്താക്കിയത്. എന്നാല് മാനന്തവാടി മുന്സിഫ് കോടതി ഈ നടപടിയെ താല്കാലികമായി മരവിപ്പിച്ചിരുന്നു. ഈ ഹര്ജി കോടതി ഈ മാസം 29ന് വീണ്ടും പരിഗണിക്കാനിരിക്കുകയാണ്.
https://www.facebook.com/Malayalivartha
