കളി കൈവിടുമ്പോള്... അച്ചടക്കം പഠിപ്പിക്കുമെന്ന് കെ.പി.സി.സി. പ്രസിഡന്റ് മുല്ലപ്പള്ളി രാമചന്ദ്രന് പറയുമ്പോഴും കോണ്ഗ്രസില് പോര് രൂക്ഷം; കൂടുതല് ശക്തമായി കെ. മുരളീധരന് തിരിച്ചെത്തുന്നു; ബി.ജെ.പി. സ്ഥാനാര്ഥിയായി മത്സരിച്ച മോഹന് ശങ്കറിനെ വൈസ് പ്രസിഡന്റാക്കിയതില് കടുത്ത എതിര്പ്പ്
തികഞ്ഞ അച്ചടക്കത്തോടെ കോണ്ഗ്രസില് പിടിച്ചു നിന്ന കോണ്ഗ്രസ് നേതാവ് കെ. മുരളീധരന് ശക്തമായി തിരിച്ചടിക്കുകയാണ്. കോണ്ഗ്രസില് ഏറെ തഴയപ്പെട്ട മുരളീധരന് തുടര്ച്ചയായി വട്ടിയൂര്ക്കാവില് നിന്നും ജയിച്ചു വന്നതോടും സിപിഎമ്മിന്റെ പി. ജയരാജനെ തോല്പ്പിച്ച് എംപിയായതോടുമാണ് യോഗം തെളിഞ്ഞത്. പഴയ വീര്യത്തോടെ എല്ലാത്തിനും അഭിപ്രായം പറഞ്ഞ് ആഞ്ഞടിക്കുകയാണ്. ഇപ്പോള് കോണ്ഗ്രസ് സ്ഥാനാര്ത്ഥിപ്പട്ടികയെ ചൊല്ലിയാണ് തര്ക്കം. പ്രസിഡന്റ് മുല്ലപ്പള്ളി രാമചന്ദ്രനും കെ. മുരളീധരന് എം.പിയുമായുള്ള വാക്പോരിനേത്തുടര്ന്നാണു പുനഃസംഘടനയേച്ചൊല്ലിയുള്ള ഭിന്നത മറനീക്കിയത്.
ആദ്യഘട്ടം പുനഃസംഘടനയിലെ അതൃപ്തി സെക്രട്ടറിമാരെ നിയമിക്കുന്നതോടെ പരിഹരിക്കാമെന്നായിരുന്നു കെ.പി.സി.സി. നേതൃത്വത്തിന്റെ കണക്കുകൂട്ടല്. എന്നാല്, രണ്ടാംഘട്ടം പട്ടിക വരുന്നതിനുമുമ്പേ പലരും പരസ്യമായി രംഗത്തെത്തി.
കെ. കരുണാകരനൊപ്പം നിന്നവരെ ഇക്കുറിയും അവഗണിച്ചെന്നു മുരളീധരപക്ഷത്തിനു പരാതിയുണ്ട്. ഗ്രൂപ്പുകള്ക്കു തുല്യപ്രാധാന്യം ലഭിച്ചെങ്കിലും പട്ടികയില് കടന്നുകൂടിയതു പതിവുമുഖങ്ങളാണെന്ന വികാരം പൊതുവിലുണ്ട്. പുനഃസംഘടനയേത്തുടര്ന്ന് മലപ്പുറം ജില്ലയില് എ ഗ്രൂപ്പിനുള്ളിലും ഭിന്നത രൂക്ഷമായി. അതൃപ്തിയുണ്ടെങ്കിലും സെക്രട്ടറിമാരുടെ പട്ടിക വരുന്നതുവരെ മൗനം പാലിക്കാനാണ് ഐ ഗ്രൂപ്പിന്റെ തീരുമാനം.
യുവാക്കളെയും വനിതകളെയും അവഗണിച്ചെന്ന പതിവുപരാതിയും ബാക്കി. 34 ജനറല് സെക്രട്ടറിമാരില് വനിതാ പ്രാതിനിധ്യം ഒന്നില് ഒതുങ്ങിയതിനെതിരേ മഹിളാ കോണ്ഗ്രസ് രംഗത്തെത്തി. മുമ്പ് ബി.ജെ.പി. സ്ഥാനാര്ഥിയായി മത്സരിച്ച മോഹന് ശങ്കറിനെ വൈസ് പ്രസിഡന്റാക്കിയതില് മലബാറില്നിന്നുള്ള നേതാക്കള്ക്കു കടുത്ത എതിര്പ്പുണ്ട്. അതാണു കെ. മുരളീധരന് പ്രകടിപ്പിച്ചത്. മുരളീധരന്റെ വിമര്ശനത്തിനു മറുപടിയുമായി മുല്ലപ്പള്ളിയും എ.ഐ.സി.സി. ജനറല് സെക്രട്ടറി കെ.സി. വേണുഗോപാലും രംഗത്തെത്തി. പരസ്യവിമര്ശനത്തില്നിന്ന് ഒഴിഞ്ഞുനില്ക്കാനുള്ള കര്ശനതാക്കീതാണു കെ.പി.സി.സി. മുന് അധ്യക്ഷന് കൂടിയായ മുരളിക്ക് ഇരുവരും നല്കിയത്.
പാര്ട്ടിയില് അച്ചടക്കമില്ലാതെ മുന്നോട്ട് പോവാനാവില്ലെന്നാണ് വിമര്ശനങ്ങള്ക്കെതിരെ മുല്ലപ്പള്ളി രാമചന്ദ്രന് പറഞ്ഞത്. കാര്യങ്ങള് പറയേണ്ട സ്ഥലത്ത് പറയണം. പുറത്ത് പറയുന്നത് പാര്ട്ടിക്ക് ഗുണമല്ലെന്നും മുല്ലപ്പള്ളി വ്യക്തമാക്കി.
അതേസമയം കെപിസിസി പുനഃസംഘടന സംബന്ധിച്ച് പരസ്യപ്രസ്താവന അനുവദിക്കാനാവില്ലെന്നു പറഞ്ഞ കെപിസിസി പ്രസിഡന്റ് മുല്ലപ്പള്ളി രാമചന്ദ്രനെ കടന്നാക്രമിച്ച് കെ.മുരളീധരന് വീണ്ടും രംഗത്തെത്തി. പുനഃസംഘനയെക്കുറിച്ചു പറഞ്ഞതില് ഉറച്ചുനില്ക്കുന്നു. തന്നോടുകാട്ടുന്ന ശൗര്യം പിണറായിയോടും മോദിയോടും കാണിക്കണം. പുറകോട്ടു തിരിഞ്ഞു നോക്കിയെങ്കിലും ഒന്നും കണ്ടില്ലെന്നു കെ.മുരളീധരന് പരിഹസിച്ചു. മനുഷ്യ മഹാശൃംഖലയില് പങ്കെടുത്ത യുഡിഎഫ് അണികളെ തിരികെ കൊണ്ടുവരണം.
പരസ്യപ്രസ്തവന ഏതു ഭാഗത്തുനിന്നു വന്നാലും അച്ചടക്കനടപടിയെടുക്കണമെന്നാണ് തന്റെയും അഭിപ്രായമെന്നു മുരളീധരന് പറഞ്ഞു.
മുഖ്യമന്ത്രി പിണറായി വിജയനു ബിജെപിയുമായി ധാരണയുണ്ടോ എന്നു സംശയിക്കുന്നു. ഗവര്ണര്ക്കെതിരായ പ്രമേയത്തെ പിന്തുണയ്ക്കാത്തത് സംശയകരമാണ്. മനുഷ്യച്ചങ്ങലയ്ക്കു പിന്നാലെ പിണറായി ഗവര്ണറുടെ സല്ക്കാരത്തിന് പോയെന്നും കെ.മുരളീധരന് ആരോപിച്ചു.
"
https://www.facebook.com/Malayalivartha