പോലീസ് നവീകരണത്തിൻ്റെ മറവിൽ ടെണ്ടർ ചട്ടങ്ങളും നിയമങ്ങളും കാറ്റിൽ പറത്തി സ്വകാര്യ കമ്പനികൾക്ക് അഴിമതിയിലൂടെ 151.41 കോടി രൂപയുടെ അവിഹിത സാമ്പത്തിക നേട്ടമുണ്ടാക്കി കൊടുത്ത് സംസ്ഥാന ഖജനാവിന് നഷ്ടം വരുത്തിയതിന് സംസ്ഥാന ഡി ജി പി അടക്കം 7 പേർക്കെതിരെ വിജിലൻസ് കേസെടുക്കണമെന്നാവശ്യപ്പെട്ടുള്ള പരാതിയിൽ അന്വേഷണം തുടങ്ങാൻ സർക്കാർ അനുമതി തേടിയിട്ടുണ്ടെന്ന് വിജിലൻസ് തിരുുവനന്തപുരം വിജിലൻസ് കോടതിയിൽ റിപ്പോർട്ട് സമർപ്പിച്ചു.

15 ന് ലഭിച്ച പരാതി 17 ന് ലെറ്റർ നമ്പർ സി_ 5369/2020 / ഡി വി എ സി ബി കത്ത് പ്രകാരമാണ് സർക്കാരിൻ്റെ അനുമതിക്കായി നൽകിയത്. ഹർജി സർക്കാരിൻ്റെ പരിഗണനയിലാണെന്നും അനുവാദം ലഭിക്കാത്ത സാഹചര്യത്തിൽ കോടതിയുടെ നിരീക്ഷണം ആവശ്യപ്പെട്ടുള്ള ഹർജി തള്ളളണമെന്നും സർക്കാർ കോടതിയിൽ ആവശ്യമുന്നയിച്ചു. തുടർന്ന് കോടതി മാർച്ച് 9ന് ഹർജി പരിഗണിക്കാനായി മാറ്റി.

ബെഹ്റക്കെതിരായ പരാതിയിൽ എടുത്ത നടപടി വിശദമാക്കി തൽസ്ഥിതി റിപ്പോർട്ട് ഹാജരാക്കാൻ തിരുവനന്തപുരം വിജിലൻസ് കോടതി 17 ന് ഉത്തരവിട്ടിരുന്നു. പരാതിയുടെ തൽസ്ഥിതി റിപ്പോർട്ട് ബുധനാഴ്ച ഹാജരാക്കാൻ വിജിലൻസ് ഡയറക്ടറോടാണ് വിജിലൻസ് ജഡ്ജി എം.ബി.സ്നേഹലത ഉത്തരവിട്ടത്.
സംസ്ഥാന ഖജനാവ് കൊള്ളയടിച്ചവർക്കെതിരെ സംസ്ഥാന മുഖ്യമന്ത്രി പിണറായി വിജയനും വിജിലൻസ് ഡയറക്ടർ അനിൽ കാന്തിനും പരാതി നൽകിയിട്ടും നടപടിയുണ്ടാകാത്തതിനാൽ അന്വേഷണം കോടതിയുടെ നിരീക്ഷണത്തിലാക്കണമെന്നാവശ്യപ്പെട്ട് അഡ്വ.നെയ്യാറ്റിൻകര. പി. നാഗരാജാണ് കോടതിയെ സമീപിച്ചത്.

സ്റ്റേറ്റ് പോലീസ് ചീഫ് ലോക് നാഥ് ബെഹ്റ , അഡീ.ഡി ജി പി ( നവീകരണം ) , ചട്ടവിരുദ്ധമായി ഉപകരണങ്ങൾ വാങ്ങാൻ ബെഹ്റ ചുമതലപ്പെടുത്തി സാങ്കേതിക സമിതി അംഗങ്ങൾ , പജേറോ കാറു വാങ്ങിയ ഹിന്ദുസ്ഥാൻ മോട്ടോഴ്സ് ഫിനാൻസ് കോർപ്പറേഷൻ എം ഡി , പാനസോണിക് ഇന്ത്യ കമ്പനി എം ഡി , ന്യൂ ഡെൽഹി ആസ്ഥാനമായ എൽ എ റ്റി കമ്പനി എം ഡി , സർക്കാർ പൊതുമേഖലാ സ്ഥാപനമായ കെൽട്രോൺ കമ്പനി എം ഡി എന്നിവർക്കെതിരെ വിജിലൻസ് കേസെടുക്കണമെന്നാണ് പരാതിയിലെ ആവശ്യം. പൊതുസേവകരായ സർക്കാർ ഉദ്യോഗസ്ഥർ തങ്ങളുടെ ഒദ്യോഗിക പദവി ദുരുപയോഗം ചെയ്ത് മൂന്നാം കക്ഷികളായ സ്വകാര്യ കമ്പനികളെ അവിഹിതമായി സഹായിച്ച് ഖജനാവിന് അന്യായ നഷ്ടം വരുത്തിയെന്നാണ് പരാതി. ബുള്ളറ്റ് പ്രൂഫ് വാഹനങ്ങൾ , ആഡംബര വാഹനങ്ങൾ , ജി പി എസ് സിസ്റ്റം , വോയ്സ് ലോഗർ സിസ്റ്റം , എക്സ്സ്റേ ബാഗേജ് ഇൻസ്പെക്ഷൻ സിസ്റ്റം , ശബരിമലയിലേക്കുള്ള സുരക്ഷാ സിസ്റ്റം , മൊബൈൽ ഡിജിറ്റൽ ഇൻവെസ്റ്റിഗേഷൻ പ്ലാറ്റ്ഫോം എന്നിവ വാങ്ങിയതിലും വില്ലകൾ പണിതതിലും അഴിമതി നടത്തിയെന്ന് പരാതിയിൽ പറയുന്നു.

കംട്രോളർ ആൻ്റ് ആഡിറ്റർ ജനറൽ എസ്. സുനിൽരാജാണ് സാക്ഷിപ്പട്ടികയിലെ ഒന്നാം സാക്ഷി. ആഴത്തിലുള്ള അന്വേഷണം ഭരണ കക്ഷിയിലെ ഉന്നതരെക്കൂടി പ്രതിക്കൂട്ടിലാക്കുമെന്നതിനാലാണ് സർക്കാർ അന്വേഷണം അട്ടിമറിക്കുന്നതെന്ന ആക്ഷേപവും ഉയരുന്നുണ്ട്.