ഈ സർക്കാർ മുത്താണ്! തനി നാടന്‍ രുചിയില്‍ ചോറ്, ഉപ്പേരി, സാമ്പാർ, അച്ചാര്‍, പപ്പടം, മോര് അല്ലെങ്കില്‍ രസം! ഊണിനൊപ്പം ഹെല്‍ത്തി ടിപ്‌സായി കഞ്ഞിവെള്ളവും; വിശപ്പുരഹിത കാന്റീന്‍ ഏറ്റെടുത്ത് കുന്നംകുളം ഗ്രാമം
കുന്നംകുളം നഗരസഭയിൽ ജില്ലയിലെ ആദ്യത്തെ വിശപ്പുരഹിത കാന്റീൻ ഉദ്ഘാടനം ചെയ്ത് പി തിലോത്തമൻ. പുതു രുചിയ്‌ക്കൊപ്പം ഒട്ടേറെ പുതുമകളുമായി കുന്നംകുളം നഗരസഭയുടെ വിശപ്പുരഹിത കാന്റീന്‍ പ്രവര്‍ത്തനം ആരംഭിച്ചത്. 20 രൂപയ്ക്ക് സുഭിക്ഷമായി ഊണ്‍ കഴിക്കാമെന്നതാണ് കാന്റീനിന്റെ പ്രത്യേകത. ആധുനിക രീതിയിലുള്ള അടുക്കള ഉപകരണങ്ങള്‍ ഉപയോഗിച്ചുള്ളതും തികച്ചും സ്ത്രീ സൗഹൃദവുമാണ് ഈ കാന്റീന്‍. ചോറ്, സാമ്ബാര്‍, ഉപ്പേരി, അച്ചാര്‍, പപ്പടം, മോര് അല്ലെങ്കില്‍ രസം എന്നിവയാണ് പ്രധാന മെനു. എല്ലാം തനി നാടന്‍ രുചിയില്‍. ഊണിനൊപ്പം ഹെല്‍ത്തി ടിപ്‌സായി കഞ്ഞിവെള്ളവും ആവശ്യക്കാര്‍ക്ക് ലഭിക്കും. പ്രായമായവരെ ഉദ്ദേശിച്ചാണ് പ്രധാനമായും ഇത് തയ്യാറാക്കുന്നത്. ഉച്ചയ്ക്ക് 12.30 മുതല്‍ ആരംഭിക്കുന്ന ഉച്ചയൂണ് നേരത്തെ തന്നെ തയ്യാറാകും. എന്നാല്‍ രണ്ട് മണിക്ക് ശേഷം ചെന്നാലും ചൂടോടെ ഭക്ഷണം കഴിക്കാം. സ്റ്റീമര്‍ ഉപയോഗിച്ച്‌ എല്ലാ വിഭവങ്ങളും പാചകം ചെയ്യുന്നതിനാലാണ് എപ്പോഴും ഭക്ഷണത്തില്‍ ചൂട് നിലനില്‍ക്കുന്നത്. ഗ്രൈന്‍ഡര്‍ അടക്കമുള്ളവ ഫുഡ് സേഫ്റ്റി 304 ഗ്രാന്‍ഡ് ക്വാളിറ്റിയിലുള്ളതാണ്. നിലവാരമുള്ള സ്റ്റീല്‍ ഉപയോഗിച്ചു നിര്‍മിച്ചവയാണ് ഇവിടുത്തെ പാത്രങ്ങള്‍. പച്ചക്കറികള്‍ അരിഞ്ഞെടുക്കാനുള്ള പുതിയ സംവിധാനങ്ങളുമുണ്ട്. കുറഞ്ഞ എണ്ണയില്‍ മീന്‍ വറുക്കുന്നതിനുള്ള ഷാലോ ഫാറ്റ് ഫിഷര്‍ ഉപകരണമാണ് മറ്റൊരു സവിശേഷത. യന്ത്ര സഹായത്തോടെ മുറിച്ച മീന്‍ മുളകു ചേര്‍ത്ത് സൂക്ഷിക്കുന്ന പുത്തന്‍ സൗകര്യവുമുണ്ട്. ഹൂഡ് എന്ന പുകരഹിത അടുപ്പുകളാണ് അടുക്കളയിലുള്ളത്. അടുക്കളയുടെ പുറത്ത് പ്രത്യേക സ്ഥലത്താണ് ഗ്യാസ് സംവിധാനം ഒരുക്കിയിട്ടുള്ളത്. ഒരു ഗ്യാസ് കണക്ഷനില്‍ നിന്ന് ഒരേസമയം ഒട്ടേറെ കണക്ഷനുകള്‍ പ്രവര്‍ത്തിക്കും. ഇതോടൊപ്പം സാധാരണ രീതിയില്‍ പ്രവര്‍ത്തിക്കുന്ന അടുക്കളയുമുണ്ട്. 100 ലേറെ പേര്‍ക്ക് ഒരേ സമയം ഉച്ചയൂണ് കഴിക്കാനുള്ള സൗകര്യമാണ് കാന്റീനിലുള്ളത്. ട്രോളിയിലാണ് ഭക്ഷണ പദാര്‍ത്ഥങ്ങള്‍ വിതരണം ചെയ്യുന്നത്. കാന്റീനില്‍ ബെയ്ന്‍ മാരി ട്രോളിയില്‍ ഉച്ചയൂണും അനുബന്ധ പദാര്‍ത്ഥങ്ങളും നിരയായി വെയ്ക്കാനും ആവശ്യത്തിന് എടുത്തുപയോഗിക്കാനും സംവിധാനങ്ങളുണ്ട്. പരിശീലനം ലഭിച്ച പത്തോളം കുടുംബശ്രീ പ്രവര്‍ത്തകരാണ് വിഭവങ്ങള്‍ തയ്യാറാക്കുന്നത്. നഗരസഭയിലെ തുമ്ബപ്പൂ കുടുംബശ്രീയ്ക്ക് വേണ്ട മാര്‍ഗ നിര്‍ദേശവുമായി യുവ സംരംഭകരായ ഐഫ്രം ഗ്രൂപ്പും ഒപ്പമുണ്ട്. നിശ്ചിത സമയം വരെ മാത്രമാണ് 20 രൂപയ്ക്ക് ഊണു ലഭിക്കുക. സ്പെഷ്യല്‍ വിഭവങ്ങള്‍ വാങ്ങുന്നവര്‍ അതിനുള്ള പൈസയും നല്‍കണം. ഭക്ഷണം കഴിക്കാന്‍ നിര്‍വാഹമില്ലാത്തവര്‍ക്കും രോഗികള്‍ക്കുമായി പത്ത് സൗജന്യ ഭക്ഷണമാണ് നഗരസഭ ദിവസവും നല്‍കുക. നഗരസഭയിലെ ഒരു ചാക്ക് പ്ലാസ്റ്റിക് മാലിന്യം വേര്‍തിരിച്ച്‌ നല്‍കുന്നവര്‍ക്കും സൗജന്യ ഭക്ഷണം നല്‍കും. നഗരസഭ സെക്രട്ടറി മുഖേന കര്‍ഷകര്‍ക്ക് പച്ചക്കറികള്‍ നല്‍കാനുള്ള സംവിധാനവും നഗരസഭ ഒരുക്കിയിട്ടുണ്ട്. കാന്റീനിലെ ആദ്യ ദിനത്തില്‍ ആയിരത്തോളം പേരാണ് ഭക്ഷണം കഴിച്ചത്. ഉദ്ഘാടന ചടങ്ങിനു ശേഷം ഭക്ഷ്യ പൊതുവിതരണ മന്ത്രി പി തിലോത്തമനും തദ്ദേശ സ്വയം ഭരണ മന്ത്രി എസി മൊയ്തീനും കാന്റീനില്‍ നിന്ന് ഭക്ഷണം കഴിച്ചു. നഗരസഭ ചെയര്‍പേഴ്സന്‍ സീതാ രവീന്ദ്രന്‍, വൈസ് പ്രസിഡന്റ് പിഎം സുരേഷ്, സ്ഥിരം സമിതി അംഗങ്ങള്‍, കൗണ്‍സിലര്‍മാര്‍, ഉദ്യോഗസ്ഥര്‍, പൊതുജനങ്ങള്‍ തുടങ്ങിയവരും 20 രൂപ നല്‍കി ഭക്ഷണം കഴിച്ചു.
https://www.facebook.com/Malayalivartha
