2019 ൽ മന്ത്രി തോമസ് ഐസക് നിയമസഭയിൽ നൽകിയ മറുപടിയിൽ സാമ്പത്തിക പ്രതിസന്ധി കാരണം അടച്ചുപൂട്ടലിന്റെ വക്കിലെത്തിയ യെസ് ബാങ്കിൽ ഉൾപ്പെടെ കേരള സർക്കാർ നിക്ഷേപിച്ചത് 2001 കോടി രൂപ. മോട്ടോർ വാഹന സെസ്, ഇന്ധന സെസ് എന്നീ ഇനത്തിൽ ലഭിച്ച രൂപയാണ് സർക്കാർ സ്വകാര്യ ബാങ്കിൽനിക്ഷേപിച്ചത്. കൊട്ടക് മഹേന്ദ്ര, യെസ് ബാങ്ക്, ആക്സിസ്, ഐ.സി ഐ സി ഐ,ഇൻഡസ് ഇൻസ് ബാങ്കുകളിലാണ് സർക്കാർ തുക നിക്ഷേപിച്ചത്. ഉയർന്ന പലിശ എന്ന വാഗ്ദാനമാണ് ബാങ്കുകൾ മുന്നോട്ടുവച്ചത്. പലിശയായി 129 കോടി രൂപ ലഭിക്കുമെന്ന് തോമസ് ഐസക് അന്ന് നിയമസഭയെ അറിയിച്ചിരുന്നു.

2018 ൽ 281 കോടിയാണ് കേരള സർക്കാർ യെസ് ബാങ്കിൽ സ്ഥിരം നിക്ഷേപമായി നൽകിയത്. 7.37 ശതമാനമായിരുന്നു പലിശ നിരക്ക്. മറ്റ് ബാങ്കുകളെ അപേക്ഷിച്ച് ഇത് കുറഞ്ഞ പലിശ നിരക്കാണ്. രണ്ട് തുകയും സർക്കാർ ഇതിനകം പിൻവലിച്ചോ എന്ന കാര്യത്തിൽ വ്യക്തയില്ല. കുറഞ്ഞ പലിശനിരക്ക് നൽകിയിട്ടും യസ് ബാങ്കിൽ പണം നിക്ഷേപിക്കാൻ ചരടുവലിച്ചത് ആരാണെന്നും അറിയില്ല.

സാമ്പത്തിക പ്രതിസന്ധിയിലായ യെസ് ബാങ്കിൽ സർക്കാർ നിക്ഷേപിച്ച കോടികൾ പിൻവലിച്ചിട്ടില്ലെന്നാണ് ധനവകുപ്പിലെ ഉന്നതർ പറയുന്നത് . തുക പിൻവലിച്ചതായി സർക്കാർ അവകാശപ്പെടുന്നുണ്ടെങ്കിലും അക്കാര്യത്തിൽ ഒരു തെളിവും സർക്കാർ നൽകിയിട്ടില്ല. കൂടുതൽ പലിശ കിട്ടുന്നതിനാണ് സ്വകാര്യ ബാങ്കുകളിൽ പണം നിക്ഷേപിക്കുന്നതെന്നാണ് സർക്കാർ പറയുന്നത്. എന്നാൽ അതിന്റെ സുരക്ഷിതത്വത്തെ കുറിച്ച് സർക്കാർ ചിന്തിക്കുന്നേയില്ല.

കഴിഞ്ഞ യു ഡി എഫ് സർക്കാരിന്റെ കാലത്ത് യെസ് ബാങ്ക് ഉൾപ്പെടെയുള്ള ബാങ്കുകളിൽ സർക്കാർ ഫണ്ട് നിക്ഷേപിക്കാനുള്ള നീക്കം സി പി എം തടഞ്ഞിരുന്നു. വൻ പ്രതിഷേധമാണ് ഇതിന്റെ പേരിൽ ഉണ്ടായത്. തുടർന്ന് സർക്കാർ അത്തരമൊരു നീക്കത്തിൽ നിന്ന് പിൻമാറി. എന്നാൽ ഇടതു മുന്നണി സർക്കാർ അത്തരമൊരു നീക്കം നടത്തിയപ്പോൾ യു ഡി എഫ് അക്കാര്യം അറിഞ്ഞതുപോലുമില്ല.

സ്വകാര്യ ബാങ്കുകളിൽ സർക്കാർ ഫണ്ട് നിക്ഷേപിക്കുന്നതിന് പിന്നിൽ വലിയൊരു മാഫിയ തന്നെ പ്രവർത്തിക്കുന്നുണ്ട് എന്നാണ് വിവരം. സർക്കാർ ഫണ്ടിലാണ് സ്വകാര്യ ബാങ്കുകളുടെ കണ്ണ്. സ്വകാര്യ ബാങ്കുകൾ സർക്കാർ ഉദ്യോഗസ്ഥരെ മാത്രമല്ല ഭരണ തലവൻമാരെയും പ്രീണിപ്പിക്കും. ഇതിന് ആവശ്യമായ സമ്മാനങ്ങൾ അവർ തത്പരകക്ഷികൾക്ക് നൽകും. അങ്ങനെ കോടികൾ കരസ്ഥമാക്കിയ ശേഷം അതും കൊണ്ടു മുങ്ങുന്നതാണ് പതിവ്.

പണം സർക്കാരിന്റേതായതിനാൽ റിസർവ് ബാങ്ക് ഇടപെടലിലൂടെ തിരികെ ലഭിക്കാൻ ഇടയുണ്ട്. എന്നാൽ നഷ്ടപ്പെടുന്ന പലിശയെ കുറിച്ച് ആരെങ്കിലും ആലോചിച്ചിട്ടുണ്ടെന്ന് തോന്നുന്നില്ല.യെസ് ബാങ്കിന് പിന്നാലെ മറ്റ് ബാങ്കുകളും പൊളിയാനിടയുണ്ട്. എന്നാൽ അതിനെ കുറിച്ച് ആലോചിച്ച് വ്യാകുലപ്പെടാൻ സർക്കാരിന് നേരമില്ല.