കൂടത്തായി കൊലപാതക കേസിലെ മുഖ്യപ്രതി ജോളിയുടെ ജാമ്യാപേക്ഷ പരിഗണിക്കുന്നത് ഹൈക്കോടതി നാളത്തേയ്ക്ക് മാറ്റി. മുന്‍ ഭര്‍ത്താവ് റോയ് തോമസിനെ കൊലപ്പെടുത്തിയ കേസിലാണ് ജോളി ജാമ്യാപേക്ഷ സമര്‍പ്പിച്ചത്. പ്രതിക്ക് വേണ്ടി അഡ്വക്കേറ്റ് ബി എ ആളൂര്‍ കോടതിയില്‍ ഹാജരായി. അതേസമയം കഴിഞ്ഞ ദിവസം സിലി വധക്കേസില്‍ ഒന്നാം പ്രതി ജോളി ജോസഫ് സമര്‍പ്പിച്ച ജാമ്യാപേക്ഷയില്‍ വാദം പൂര്‍ത്തിയായി. സെഷന്‍സ് കോടതി 12നു വിധി പറയും. പ്രോസിക്യൂഷനു വേണ്ടി സ്പെഷല്‍ പ്രോസിക്യൂട്ടര്‍ എന്‍.കെ.ഉണ്ണിക്കൃഷ്ണനും പ്രതിഭാഗത്തിനു വേണ്ടി ബി.എ.ആളൂരും ഹാജരായി. കുറ്റപത്രം സമര്‍പ്പിച്ച കേസില്‍ പ്രതിയെ ഇനിയും വിചാരണത്തടവുകാരിയായി ജയിലില്‍ കഴിയേണ്ട സാഹചര്യമില്ലെന്നു പ്രതിഭാഗം ചൂണ്ടിക്കാട്ടി. പ്രതിയുടെ കുറ്റസമ്മത മൊഴിയല്ലാതെ മറ്റൊരു തെളിവും കേസിലില്ല. പ്രധാന സാക്ഷികളുടെ മൊഴിയായി കുറ്റപത്രത്തില്‍ പറയുന്ന കാര്യങ്ങളൊന്നും അവര്‍ മജിസ്ട്രേട്ടിനു നല്‍കിയ രഹസ്യമൊഴിയിലില്ല. സിലി മരിച്ചതു സയനൈഡ് ഉള്ളില്‍ ചെന്നാണെന്നും ജോളി ജോസഫാണ് കൊലപാതകം നടത്തിയത് എന്നതിനു വ്യക്തമായ തെളിവുകളുണ്ടെന്നും സ്പെഷല്‍ പ്രോസിക്യൂട്ടര്‍ ചൂണ്ടിക്കാട്ടി.

സിലിയുടെ മൃതദേഹത്തില്‍ സയനൈഡിന്റെ അംശമുണ്ടന്നു ഫൊറന്‍സിക് പരിശോധനയില്‍ കണ്ടെത്തിയിട്ടുണ്ട്. കേസിലെ ഇരുപതോളം പ്രധാന സാക്ഷികള്‍ ജോളിയുടെ അടുത്ത ബന്ധുക്കളാണ്. പ്രതി ജാമ്യത്തിലിറങ്ങിയാല്‍ ഇവരെ സ്വാധീനിക്കാന്‍ സാധ്യതയുണ്ട്. പുറത്തിറങ്ങുന്നതു പ്രതിയുടെ ജീവനു ഭീഷണിയാണ്. ജയിലില്‍ ആത്മഹത്യയ്ക്കു ശ്രമിച്ച പ്രതിയെ പുറത്തു വിടുന്നത് അപകടമാണെന്നു പ്രോസിക്യൂഷന്‍ ചൂണ്ടിക്കാട്ടി. അതേസമയം കൂടത്തായി കൊലപാതക പരമ്ബരയില്‍ വിദഗ്ധ പരിശോധനക്കായി നാല് മൃതദേഹങ്ങളുടെ അവശിഷ്ടങ്ങള്‍ കൂടി കേന്ദ്ര ഫോറന്‍സിക് ലബോറട്ടറിയിലേക്ക് അയക്കാന്‍ തീരുമാനമായി. മാത്യു മഞ്ചാടിയില്‍, ടോം തോമസ്, അന്നമ്മ തോമസ്, ആല്‍ഫൈന്‍ എന്നിവരുടെ മൃതദേഹ അവിഷ്ടങ്ങളാണ് വിദഗ്ധ പരിശോധനക്കായി കേന്ദ്ര ഫോറന്‍സിക് സയന്‍സ് ലാബിലേക്ക് അയക്കുന്നത്. റോയ് തോമസ്, സിലി വധക്കേസുകളില്‍ സയനൈഡ് സാന്നിധ്യം സ്ഥിരീകരിച്ച പശ്ചാത്തലത്തിലാണ് കൂടുതല്‍ അന്വേഷണത്തിന്റെ സാധ്യത അന്വേഷണ സംഘം പരിശോധിക്കുന്നത്.