ഇറ്റലിയിൽ നിന്ന് റാന്നിയിലെത്തിയ കൊറോണ ബാധിതർ ഭക്ഷണം കഴിച്ചെന്ന വ്യാജപ്രചാരണത്തിൽ ആളുകയറാതെ കോന്നിയിലെ ഒരു ഹോട്ടൽ. ഫെയ്സ്ബുക്കിലൂടെയാണ് വ്യാജപ്രചരണം നടന്നത്. പ്രചരിപ്പിച്ചയാൾക്കെതിരെ ഹോട്ടലുടമകൾ പൊലീസിൽ പരാതി നൽകിയിട്ടുണ്ട്. റാന്നിയിലെ കുടുംബം പുനലൂരിലേക്ക് പോകും വഴി ഈ റസ്റ്ററന്റിൽ കയറിയെന്നാണ് പ്രചരണം. ഇതോടെയാണ് ഹോട്ടലിൽ ആളു കയറാതെയായത്. കോന്നി മുറിഞ്ഞമംഗലം സ്വദേശിക്കെതിരെയാണ് പരാതി. ഹോട്ടൽ ഉടമ ഡോ. ജോൺസൺ വർഗീസ് ഏബ്രഹാം കോന്നി പൊലീസിലും ജില്ലാ പൊലീസ് മേധാവിക്കും പരാതി നൽകിയിട്ടുണ്ട്. കൊറോണയുമായി ബന്ധപ്പെട്ട് വ്യാജ വാർത്ത പ്രചരിപ്പിക്കുന്നവർക്കെതിരെ നടപടിയെടുക്കുമെന്ന് നേരത്തെ ആരോഗ്യമന്ത്രി വ്യക്‌തമാക്കിയിരുന്നു. കൊറോണയുടെ പേരിൽ വ്യാജവാർത്ത പ്രചരിപ്പിച്ചതിന് സംസ്ഥാനത്ത് ഇതുവരെ മൂന്ന് പേരെ പൊലീസ് അറസ്റ്റ് ചെയ്‌തിട്ടുണ്ട്. ജേക്കബ് വടക്കാഞ്ചേരിയടക്കം മൂന്നുപേർക്കെതിരെ വ്യാജ വാർത്ത പ്രചരിപ്പിച്ചതിന്റെ പേരിൽ കേസെടുത്തിട്ടുണ്ട്.

മറ്റൊരു സംഭവത്തിൽ, ഹരിപ്പാട് ഗവ. ആശുപത്രിയിൽ രണ്ടുപേർ കൊറോണ വൈറസ് നിരീക്ഷണത്തിലാണെന്ന് പറഞ്ഞ് ഫെയ്‌സ്‌ബുക്കിൽ പോസ്റ്റിട്ട ആളിനെതിരേ പോലീസ് കേസെടുത്തു. സുരേഷ് എന്ന ആളിന്റെ പേരിലുള്ള അക്കൗണ്ടിലാണിത്. സംഭവമറിഞ്ഞപ്പോൾ തന്നെ ആരോഗ്യമന്ത്രി കെ.കെ.ശൈലജ ഡി.എം.ഒ.യോട് റിപ്പോർട്ട് ആവശ്യപ്പെട്ടു. ഡി.എം.ഒ. വിവരം തേടിയതിനെത്തുടർന്ന് ഹരിപ്പാട് ആശുപത്രിയിൽ കൊറോണ സംശയിക്കുന്ന ആരും ചികിത്സ തേടിയിട്ടില്ലെന്ന് സൂപ്രണ്ട് ഡോ. എസ്.സുനിൽ മറുപടി നൽകി.

ആരോഗ്യവകുപ്പിന്റെ പരാതിയെത്തുടർന്ന് ഫെയ്‌സ്‌ബുക്ക് അക്കൗണ്ട് ഉടമയ്ക്കെതിരേ നടപടി സ്വീകരിക്കാൻ പോലീസിന്റെ സൈബർവിഭാഗം തിങ്കളാഴ്ച വൈകുന്നേരത്തോടെ തന്നെ അന്വേഷണം തുടങ്ങി. ജനങ്ങളെ ഭയപ്പെടുത്താനുള്ള വ്യാജപ്രചാരണത്തിനെതിരേ നടപടി ആവശ്യപ്പെട്ട് ഡി.വൈ.എഫ്.ഐ. സംസ്ഥാന കമ്മിറ്റി അംഗം എം.എം.അനസ് അലി ഹരിപ്പാട് പോലീസിൽ പരാതി നൽകി. സംഭവം വിവാദമായപ്പോൾ ഈ പോസ്റ്റ് നീക്കംചെയ്തു. എന്നാൽ, ഇതിന്റെ സ്‌ക്രീൻ ഷോട്ട് സമൂഹമാധ്യമങ്ങളിലൂടെ വ്യാപകമായി പ്രചരിക്കുകയാണ്.

അതേ സമയം, ഇറ്റലിയില്‍ നിന്നെത്തിയവരുമായി നേരിട്ടോ അല്ലാതെയോ ഇടപഴകിയ 733പേരെ തിരിച്ചറിഞ്ഞിട്ടുണ്ട്. ഇവരെ നിരീക്ഷണത്തിലാക്കിയിട്ടുണ്ടെന്ന് ജില്ലാകളക്ടര്‍ പി.ബി. നൂഹ് പറഞ്ഞു. ഐസൊലേഷന്‍ വാര്‍ഡില്‍ നിന്ന് യുവാവ് ചാടിപ്പോയതിനെയും അദ്ദേഹം വിമര്‍ശിച്ചു. അയാള്‍ എവിടെയൊക്കെ പോയി, ആരെയൊക്കെ കണ്ടു തുടങ്ങിയവ കണ്ടെത്തി അവരെയൊക്കെ നിരീക്ഷണത്തിന്‍കീഴില്‍ ആക്കേണ്ടിവരും. ഇത്തരത്തില്‍ നിര്‍ദ്ദേശങ്ങള്‍ക്ക് വിരുദ്ധമായി ഉത്തരവാദിത്തമില്ലാതെ പെരുമാറുന്നവര്‍ക്കെതിരെ പൊതുജനാരോഗ്യ നിയമപ്രകാരം കേസെടുക്കാനാണ് സര്‍ക്കാര്‍ തീരുമാനം. രോഗം ബാധിച്ചവരുടെ ചിത്രങ്ങള്‍ സമൂഹമാധ്യമങ്ങളില്‍ പ്രചരിപ്പിക്കുന്നവര്‍ക്കെതിരെയും വ്യാജ വിവരങ്ങള്‍ പ്രചരിപ്പിക്കുന്നവര്‍ക്കെതിരെയും നിയമനടപടിയുണ്ടാകുമെന്നും അദ്ദേഹം വ്യക്തമാക്കി.

കോവിഡ് -19 റിപ്പോര്‍ട്ട് ചെയ്യപ്പെട്ട പത്തനംതിട്ടയില്‍ രണ്ട് വയസുള്ള കുട്ടിയെ ഐസൊലേഷന്‍ വാര്‍ഡില്‍ പ്രവേശിപ്പിച്ചിരിക്കുകയാണ്. രോഗം സ്ഥിരീകരിച്ച വ്യക്തിയുമായി ഇടപഴകിയ കുട്ടിക്കാണ് നിരീക്ഷണം ഏര്‍പ്പെടുത്തിയിരിക്കുന്നത്. പത്തനംതിട്ടയില്‍ അഞ്ചുപേര്‍ക്കാണ് നിലവില്‍ കോവിഡ് -19 വൈറസ് ബാധ സ്ഥിരീകരിച്ചിട്ടുള്ളത്. രോഗം വ്യാപകമായ ഇറ്റലിയില്‍ നിന്നെത്തിയ റാന്നി ഐത്തലയിലെ മൂന്നുപേരും ഇവരുമായി ഇടപഴകിയ കുടുംബാംഗങ്ങളിലുമാണ് രോഗം സ്ഥിരീകരിച്ചിരിക്കുന്നത്. ഇവരുടെ മാതാപിതാക്കളെ കോട്ടയം മെഡിക്കല്‍ കോളേജിലെ ഐസൊലേഷന്‍ വാര്‍ഡില്‍ പ്രവേശിപ്പിച്ചിരിക്കുകയാണ്.