ലോകത്ത് 115 ലധികം രാജ്യങ്ങളില്‍ കോവിഡ് 19 ബാധയുണ്ടായ സാഹചര്യത്തല്‍ ലോകം മുഴവനും ജാഗ്രതയിലാണ്. നിരവധി പേര്‍ക്ക് കൊറോണ വൈറസ് ബാധിച്ച സ്ഥിതിക്ക് കേരളവും അതീവ ജാഗ്രതയിലാണ്. കേരളത്തിലെ പ്രധാന ആശുപത്രികളിലെല്ലാം ഐസൊലേഷന്‍ വാര്‍ഡുകള്‍ തയ്യാറാണ്. പ്രത്യേക സുരക്ഷ മാനദണ്ഡങ്ങള്‍ പാലിച്ചാണ് ആരോഗ്യ പ്രവര്‍ത്തകര്‍ ഐസൊലേഷന്‍ വാര്‍ഡുകളില്‍ പ്രവേശിക്കുന്നത്.

പ്രാര്‍ഥനയോടെയാണ് ഓരോ ദിവസവും വാര്‍ഡില്‍ കയറുന്നതെന്നാണ് പരിയാരം മെഡിക്കല്‍ കോളജിലെ കൊറോണ ഐസലേഷന്‍ വാര്‍ഡിലെ ചുമതലയിലുള്ള നഴ്‌സ് പറയുന്നത്. അണുബാധയെ പ്രതിരോധിക്കാനുള്ള വസ്ത്രം ധരിച്ചു ഡ്യൂട്ടിക്കു കയറുന്നതു മുതല്‍ ഡ്യൂട്ടി കഴിഞ്ഞു കുളിച്ചു പുറത്തിറങ്ങുന്നതു വരെ ജാഗ്രതയാണ്. ആപത്തൊന്നും സംഭവിക്കാതെ ഓരോ ദിവസവും കടന്നു പോകണേ എന്നാണു പ്രാര്‍ഥന.

പുറമേ നിന്നു കാണുന്നതു പോലെയല്ല, കിറ്റിനകത്തെ കൊടും ചൂടില്‍ വെന്തുരുകിയാണ് ഓരോ ആരോഗ്യപ്രവര്‍ത്തകന്റെയും നില്‍പ്പ്. മുഖത്തു നിന്നുള്ള ആവി അടിച്ച് ഗ്ലാസിലെ കാഴ്ച മങ്ങും. പക്ഷേ ഗ്ലാസിലോ മാസ്‌കിലോ തൊടാന്‍ പാടില്ല. ഡ്യൂട്ടി കഴിഞ്ഞ് ഇറങ്ങുമ്പോഴേക്കും ശരീരം ചുട്ടുപൊള്ളുന്ന രീതിയില്‍ ആയിക്കഴിഞ്ഞിട്ടുണ്ടാകും. വാര്‍ഡിലൂടെ സഞ്ചരിക്കുമ്പോള്‍ വാതിലിലോ ചുമരിലോ എവിടെയെങ്കിലും കൈ അറിയാതൊന്നു സ്പര്‍ശിച്ചാല്‍ കൈ വീണ്ടും ഉരച്ചു കഴുകണം.

ഒരു രോഗിക്കു വേണ്ടി ഉപയോഗിച്ച ഗ്ലൗസ് മാറ്റി പുതിയതു ധരിച്ചു മാത്രമേ അടുത്തയാളുടെ അടുത്തക്കു പോകൂ. 6 മണിക്കൂര്‍ ഡ്യൂട്ടി അവസാനിച്ചാല്‍ ഐസലേഷന്‍ വാര്‍ഡില്‍ തന്നെ ഒരുക്കിയ പ്രത്യേക ബക്കറ്റില്‍ കിറ്റ് ഊരിക്കളയും. വാര്‍ഡില്‍ തന്നെ ഒരുക്കിയ പ്രത്യേക കുളിമുറിയില്‍ കുളിച്ചതിനു ശേഷമേ പുറത്തിറങ്ങൂ. എന്നാലും ചിലര്‍ക്കൊക്കെ ടെന്‍ഷനാണ്, കുട്ടികള്‍ക്കും വീട്ടുകാര്‍ക്കും ആര്‍ക്കെങ്കിലും നമ്മള്‍ കാരണം രോഗമുണ്ടാകുമോ എന്ന ടെന്‍ഷനുണ്ട്. എന്തു വന്നാലും നമ്മള്‍ കൊറോണയെയും അതിജീവിക്കുമെന്ന ആത്മവിശ്വാസത്തിലാണു ഡോക്ടര്‍മാരും നഴ്‌സുമാരും ശുചീകരണ ജീവനക്കാരും അടക്കമുള്ള ഐസലേഷന്‍ വാര്‍ഡിലെ ആരോഗ്യപ്രവര്‍ത്തകര്‍.

അതേസമയം നിരീക്ഷണത്തിലുള്ളവരും തികഞ്ഞ ആത്മവിശ്വാസത്തിലാണ്. ഞങ്ങള്‍ക്ക് ആര്‍ക്കും അസുഖ ലക്ഷണങ്ങള്‍ ഒന്നുമില്ല, എന്നാലും ജാഗ്രത പുലര്‍ത്തുന്നതിന്റെ ഭാഗമായാണു കണ്ണൂര്‍ ജില്ലാ ആശുപത്രിയില്‍ എത്തിയത്. ഖത്തറില്‍ നിന്നു രണ്ടു ദിവസം മുന്‍പ് വന്ന ഉമ്മ ജില്ലാ ആശുപത്രിയില്‍ എത്തി റിപ്പോര്‍ട്ട് ചെയ്തു. വീട്ടില്‍ നിരീക്ഷണത്തില്‍ കഴിയുമ്പോള്‍ ചെയ്യേണ്ട കാര്യങ്ങളെക്കുറിച്ചൊക്കെ ഇവിടെ നിന്നു ഡോക്ടര്‍മാര്‍ പറഞ്ഞു തന്നിട്ടുണ്ട്. ഇനി 14 ദിവസം അതു പോലെ തന്നെ ചെയ്യാനാണു തീരുമാനം.

പുറത്തൊന്നും പോകാതെ 14 ദിവസം വീട്ടിലെ പ്രത്യേക മുറിയില്‍ കഴിയാനാണ് ഉമ്മയോട് നിര്‍ദേശിച്ചിട്ടുള്ളത്. ഭക്ഷണം ആ മുറിയില്‍ നിന്നു തന്നെ കഴിക്കണം, ഉമ്മ ഉപയോഗിക്കുന്ന ശുചിമുറി മറ്റുള്ളവര്‍ ഉപയോഗിക്കരുത് എന്നു പറഞ്ഞിട്ടുണ്ട്. നല്ല ഒരു കാര്യത്തിനു വേണ്ടി 14 ദിവസം ഒഴിഞ്ഞിരിക്കുന്നതിലൊന്നും ആരും ബുദ്ധിമുട്ട് വിചാരിക്കരുത് എന്നാണു പറയാനുള്ളത്. വീട്ടിലെത്തി ആശവര്‍ക്കര്‍മാര്‍ വിവരം ശേഖരിക്കുമ്പോള്‍ എല്ലാവരും കാര്യങ്ങള്‍ തുറന്നു പറയുന്നുണ്ട്. ആശുപത്രികളില്‍ എത്തുകയും ഡോക്ടര്‍മാരുടെ നിര്‍ദേശങ്ങള്‍ അനുസരിച്ചു പ്രവര്‍ത്തിക്കുകയും ചെയ്യുന്നുണ്ട്.

അതേസമയം 800 പേര്‍ക്കുള്ള ക്ഷണക്കത്ത്, പന്തല്‍, ഭക്ഷണ സാമഗ്രികള്‍, വാടക പാത്രങ്ങള്‍, കേറ്ററിങ് യൂണിറ്റ്, വിവാഹത്തിനു വേണ്ടി മാസങ്ങളായി നടത്തിയ ഒരുക്കങ്ങളൈല്ലാം വേണ്ടെന്നു വച്ചിരിക്കുകയാണു പാറക്കാടി കീയച്ചാലിലെ കെ.സി.മുഹമ്മദിന്റെ മകന്‍ മഹ്‌റൂഫ്.

ചടങ്ങുകളെല്ലാം വെട്ടിക്കുറച്ച് എല്ലാവരുടെയും അനുഗ്രഹം മാത്രം തേടി മഹ്‌റൂഫും വളക്കൈ സ്വദേശിനിയും ഇന്നു വിവാഹിതരാകും. കൊറോണ ആശങ്ക പടര്‍ന്നതോടെ ദൂരെ നിന്നു വരാനുള്ള ബന്ധുക്കളോടു യാത്ര ഒഴിവാക്കാന്‍ നിര്‍ദേശിച്ചു. നാട്ടുകാരെ മാത്രം വിളിച്ചു നടത്തിയാലോ എന്നാലോചിച്ചെങ്കിലും അവസാന നിമിഷം അതും ഒഴിവാക്കി. വരന്റെയും വധുവിന്റെയും വീട്ടുകാര്‍ അടങ്ങുന്ന 20 പേര്‍ മാത്രമാണു ചടങ്ങില്‍ പങ്കെടുക്കുക. വധുവിന്റെ വീട്ടുകാരും ചടങ്ങുകള്‍ ലളിതമാക്കിയിട്ടുണ്ട്. അങ്ങനെ ഒറ്റക്കെട്ടായി എല്ലാവരും കൊറോണയെ തുരത്താനുള്ള ശ്രമത്തിലാണ്.