സംസ്ഥാനം കൊറോണ ഭീതിയിലായിരിക്കെ കേരളത്തെ ഞെട്ടിച്ച് കടന്നുകളയാന്‍ ശ്രമിച്ച് വിദേശി. ബ്രിട്ടനില്‍ നിന്ന് കേരളത്തിലെത്തിയ വിനോദസഞ്ചാരിക്ക് കൊവിഡ് 19 സ്ഥിരീകരിച്ച വിവരം വരുന്നതിന് മുമ്പേയാണ് കടന്ന് കളഞ്ഞത് . മൂന്നാറിലെത്തിയ വിനോദ സഞ്ചാരിക്കാണ് രോഗം സ്ഥിരീകരിച്ചത്. മൂന്നാറിലെ ഹോട്ടലില്‍ ഇയാള്‍ നിരീക്ഷണത്തിലായിരുന്നു. അധികൃതരുടെ കണ്ണ് വെട്ടിച്ച് വിമാനത്തില്‍ കയറി കടന്നുകളയാന്‍ ശ്രമിച്ച ഇയാളടങ്ങുന്ന സംഘത്തെ നെടുമ്പാശ്ശേരിയില്‍ തിരിച്ചിറക്കി. 19 അംഗ സംഘമാണ് രോഗിക്കൊപ്പമുണ്ടായിരുന്നത്.

ദുബായ് എമിറേറ്റ്‌സ് വിമാനത്തില്‍ ആണ് ഇയാള്‍ കയറിയത്. ഇയാള്‍ കയറിയ വിമാനത്തിലെ 270 പേരെയും തിരിച്ചിറക്കി. വിമാനത്തിലുണ്ടായിരുന്ന എല്ലാ യാത്രക്കാരെയും പരിശോധിക്കും. എല്ലാവരെയും ആശുപത്രിയിലെത്തിച്ചാണ് പരിശോധിക്കുക. എന്നാല്‍, നെടുമ്പാശ്ശേരി വിമാനത്താവളം അടയ്‌ക്കേണ്ട സാഹചര്യം ഇല്ലെന്ന് മന്ത്രി വി എസ് സുനില്‍ കുമാര്‍ പ്രതികരിച്ചു. വീഴ്ച വരുത്തിയവര്‍ക്കെതിരെ നടപടിയുണ്ടാകുമെന്ന് മന്ത്രി പറഞ്ഞു.

രോഗ ലക്ഷണങ്ങള്‍ ഉണ്ടെന്ന് കണ്ടെത്തി നിരീക്ഷണത്തില്‍ കഴിയുന്ന വിനോദ സഞ്ചാരി അധികൃതരുടെ കണ്ണ് വെട്ടിച്ചാണ് മൂന്നാറില്‍ നിന്ന് കൊച്ചിയിലേക്ക് കടന്ന് കളഞ്ഞത്. കെടിഡിസി ഹോട്ടലിലായിരുന്നു ഇയാളും സംഘവും നിരീക്ഷണത്തിലുണ്ടായിരുന്നത്. രോഗ ലക്ഷണങ്ങള്‍ കൂടി കണ്ടെത്തിയ സാഹചര്യത്തില്‍ സബ് കളക്ടറുടെ സംഘം സഞ്ചാരികളെ നേരിട്ട് കണ്ട് കാര്യങ്ങള്‍ ധരിപ്പിച്ചിരുന്നു. എന്നാല്‍, ആരോഗ്യ പ്രവര്‍ത്തകരുടെയും ജില്ലാ ഭരണകൂടത്തിന്റെയും കണ്ണ് വെട്ടിച്ച് സംഘം മൂന്നാറില്‍ നിന്ന് കൊച്ചിയിലെത്തി.

ഹോട്ടല്‍ അധികൃതര്‍ അറിയാതെ ഇവര്‍ക്കെങ്ങനെ ബാഗേജുകളുമായി കടന്നു കളയാന്‍ കഴിഞ്ഞു, അവര്‍ സഞ്ചരിച്ച വാഹനം, ആഹാരം കഴിക്കാന്‍ അടക്കം ഇവര്‍ എവിടെയെങ്കിലും ഇറങ്ങിയിരുന്നോ, ആളുകളുമായി സമ്പര്‍ക്കം പുലര്‍ത്തിയോ തുടങ്ങിയ ഒട്ടേറെ കാര്യങ്ങളിലാണ് ഇപ്പോഴും വലിയ ആശങ്ക നിലനില്‍ക്കുന്നത്.

അതേസമയം കൊവിഡ് ഭീതി കേരളത്തിന്റെ സാമ്പത്തിക മേഖലയെ ബാധിച്ചെന്ന് ധനമന്ത്രി തോമസ് ഐസക്. ടൂറിസം വിനോദ മേഖലകളിലാണ് വലിയ പ്രതിസന്ധി നേരിടുന്നതെന്ന് തോമസ് ഐസക് അഭിപ്രായപ്പെട്ടു. വൈറസ് വ്യാപനം അടുത്തഘട്ടത്തിലേക്ക് കടന്നാല്‍ സ്ഥാപനങ്ങള്‍ അടച്ചിടേണ്ട സ്ഥിതി ഉണ്ടാകുമെന്നും സംസ്ഥാന ധനമന്ത്രി അഭിപ്രായപ്പെട്ടു.

ലോക സാമ്പത്തിക രംഗം 2008ലേതിന് സമാനമായ തകര്‍ച്ചയിലേക്ക് നീങ്ങുകയാണെന്നാണ് തനിക്ക് തോന്നുന്നതെന്നും ധനമന്ത്രി പറഞ്ഞു. ഓഹരി വിപണയിലെ തകര്‍ച്ച ഇതിലേക്കാണ് വിരല്‍ ചൂണ്ടുന്നതെന്നും ധനമന്ത്രി അഭിപ്രായപ്പെട്ടു.

രോഗം പടരാതിരിക്കാന്‍ വേണ്ട മുന്‍കരുതല്‍ നടപടികള്‍ സ്വീകരിക്കുകയാണ് ഇപ്പോള്‍ വേണ്ടതെന്നും ഐസക് പറഞ്ഞു. ഏതാനം ആളുകളുടെ നിരുത്തരവാദിത്തപരമായ സമീപനം നമ്മളെ നിലവിലെ സാഹചര്യത്തിലെച്ചുവെങ്കിലും സ്ഥിതിഗതികള്‍ കൈവിട്ട് പോയിട്ടിലെന്നും ഐസക് അഭിപ്രായപ്പെട്ടു.