സംസ്ഥാനത്ത് കോവിഡ് 19 പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് ആരോഗ്യവകുപ്പ് തലകുത്തി മറിയുമ്പോള്‍ തദ്ദേശ സ്വയംഭരണ സ്ഥാപനങ്ങള്‍ ഉറക്കത്തില്‍... സര്‍ക്കാര്‍ തദ്ദേശസ്വയംഭരണ വകുപ്പിന്റെ നേതൃത്വത്തില്‍ സ്വീകരിക്കേണ്ട നടപടികള്‍ സംബന്ധിച്ച് ഉത്തരവിറക്കി
സംസ്ഥാനത്ത് കോവിഡ് 19 പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് ആരോഗ്യവകുപ്പ് തലകുത്തി മറിയുമ്പോള്‍ തദ്ദേശ സ്വയംഭരണ സ്ഥാപനങ്ങള്‍ ഉറക്കത്തില്‍. ഇക്കാര്യം മനസിലാക്കിയ സര്‍ക്കാര്‍ തദ്ദേശസ്വയംഭരണ വകുപ്പിന്റെ നേതൃത്വത്തില്‍ സ്വീകരിക്കേണ്ട നടപടികള്‍ സംബന്ധിച്ച് ഉത്തരവിറക്കി. അവധി ദിവസങ്ങളില്‍ തുറക്കാത്ത പഞ്ചായത്തുകളും നഗരസഭാ സോണല്‍ ഓഫീസുകളും നിരവധിയാണ്.
വ്യക്തി ശുചിത്വവുമായി ബന്ധപ്പെട്ട് ആരോഗ്യ വകുപ്പ് നിര്‍ദ്ദേശിച്ചിട്ടുള്ള മാര്‍ഗ്ഗങ്ങള്‍ പൊതുജനങ്ങളെ ബോധവത്കരിക്കുന്നതിന് വിപുലമായ ക്യാമ്പയിന്‍ തദ്ദേശ സ്ഥാപനങ്ങള്‍ വീടു വീടാന്തരം സംഘടിപ്പിക്കണമെന്നാണ് ഒരു നിര്‍ദ്ദേശം.
വയോജന ബോധവത്കരണത്തിന് പ്രത്യേക ശ്രദ്ധ നല്‍കണം. ഇതിനായി സ്നേഹിത കാളിംഗ് ബെല്‍, വയോക്ലബ്, വയോജന അയല്‍ക്കൂട്ടം, വയോമിത്രം തുടങ്ങിയവയുടെ സേവനം പ്രയോജനപ്പെടുത്തണം. ഇതരസംസ്ഥാന തൊഴിലാളികള്‍ അടക്കമുള്ളവരെ ബോധവത്കരിക്കുന്നതിനായി കുടുംബശ്രീ സംവിധാനം പ്രയോജനപ്പെടുത്തണം. ആരോഗ്യസ്ഥാപനങ്ങളുമായി ബന്ധപ്പെടുന്നവര്‍ ഇന്‍ഫക്ഷന്‍ കണ്‍ട്രോള്‍ പ്രോട്ടോകോള്‍ സംബന്ധിച്ച പരിശീലനം, മാര്‍ഗ്ഗനിര്‍ദ്ദേശങ്ങള്‍ എഴുതി പ്രദര്‍ശിപ്പിക്കല്‍ തുടങ്ങിയ നടപടികളും തദ്ദേശതലത്തില്‍ സ്വീകരിക്കണം. സ്വകാര്യ ആരോഗ്യ സ്ഥാപനങ്ങള്‍, ക്ലിനിക്കല്‍ ലാബുകള്‍, കണ്‍സള്‍ട്ടിംഗ് സെന്ററുകള്‍ തുടങ്ങിയ സ്ഥലങ്ങളിലും ഇന്‍ഫക്ഷന്‍ കണ്‍ട്രോള്‍ പ്രോട്ടോക്കോള്‍ പാലിക്കുന്നത് ഉറപ്പാക്കണം. വൈറസ് ബാധിത പ്രദേശങ്ങളില്‍ നിന്നും എത്തുന്നവരുടെയും അവരുമായി അടുത്തിടപഴകുന്നവരുടെയും പട്ടിക തദ്ദേശ സ്ഥാപനങ്ങള്‍ തയ്യാറാക്കണം. അവര്‍ക്ക് ഹോം ഐസൊലേഷന് പ്രോട്ടോക്കോള്‍ ക്വാറന്റൈന്‍ സംബന്ധിച്ച വിവരങ്ങള്‍ നല്‍കുകയും പാലിക്കുന്നുവെന്ന് ഉറപ്പുവരുത്തുകയും ചെയ്യണം. തദ്ദേശ സ്ഥാപനങ്ങളുടെ നിയന്ത്രണത്തിലുള്ള ആശുപത്രികളില്‍ രോഗബാധിതര്‍ക്ക് ചികിത്സ സത്വരമായി ലഭ്യമാക്കുന്നതിന് ഐസൊലേഷന് ഉറപ്പാക്കി മരുന്നുകള്‍ ഉള്‍പ്പെടെയുള്ള സംവിധാനങ്ങള്‍ക്ക് കുറവ് വരാതെ ശ്രദ്ധിക്കണം.
രോഗം റിപ്പോര്‍ട്ട് ചെയ്താല്‍ ഐസൊലേഷന് വിധേയമാകുന്ന സാമ്പത്തികമായി പിന്നാക്കം നില്‍ക്കുന്ന കുടുംബങ്ങള്‍ക്ക് ദൈനംദിന ജീവിതസഹായം ലഭ്യമാക്കണം. രോഗം പകരുന്നത് തടയുന്നതിനുളള സാധനസാമഗ്രികള്‍ രോഗിയുടെ കുടുംബത്തിന് ആവശ്യമെങ്കില്‍ വാങ്ങി നല്‍കണം. പരിചരണത്തിന് സഹായിയെ ലഭ്യമാക്കേണ്ടിവന്നാല്‍ ആവശ്യമായ ക്രമീകരണം ചെയ്യണം. ആവശ്യമായ തുക തദ്ദേശസ്വയംഭരണ സ്ഥാപനങ്ങളുടെ തനത്/ വികസന ഫണ്ടില്‍ നിന്ന് ലഭ്യമാക്കുന്നതിന് വകുപ്പ് അനുമതി നല്‍കി.
തദ്ദേശ സ്വയം ഭരണ വകുപ്പിന്റെ പ്രവര്‍ത്തനങ്ങള്‍ മുഖ്യമന്ത്രിയാണ് ഇപ്പോള്‍ ഏകോപിപ്പിക്കുന്നത്. ജീവനക്കാര്‍ കൃത്യമായി ഓഫീസിലെത്താനുള്ള നിര്‍ദ്ദേശം തദ്ദേശ സ്വയംഭരണ വകുപ്പ് തീരുമാനിച്ചിട്ടുണ്ട്.
"
https://www.facebook.com/Malayalivartha
