കോവിഡ് 19 നെ പ്രതിരോധിക്കാനുള്ള ശ്രമങ്ങള്‍ക്ക് ശക്തിയാര്‍ജ്ജിക്കുകയാണ് . എങ്കിലും കോവിഡ് പരത്തുന്ന ഭീതിയിലാണ് എല്ലാവരും. നിരവധി വിദേശികളെത്തുന്ന കേരളത്തില്‍ നിയന്ത്രങ്ങള്‍ ശക്തമായതോടെ നാട്ടുകാര്‍ക്കൊപ്പം തന്നെ വലയുകയാണ് വിദേശികളും .ദുരിത കാലത്തിനു സമാനമായ അവസ്ഥ.

ശനിയാഴ്ച വാഗമണ്ണിലെത്തിയ വിദേശ പൗരനു താമസസൗകര്യം കിട്ടാതെ ശ്മശാനത്തില്‍ കിടന്നുറങ്ങിയശേഷം മടങ്ങേണ്ടിവന്നു. റിസോര്‍ട്ടുകളിലും ഹോട്ടലുകളിലും മുറി കിട്ടിയില്ല. വിവരമറിഞ്ഞ് പൊലീസ് തേടിയിറങ്ങിയെങ്കിലും കണ്ടെത്തനായില്ല. ഇന്നലെ രാവിലെ 6.30നു പള്ളിയിലേക്കു പോയവര്‍ വാഗമണ്‍ പുള്ളിക്കാനം റോഡിലെ ചര്‍ച്ച് ഓഫ് ക്രൈസ്റ്റിന്റെ ശ്മശാനത്തില്‍നിന്ന് ആള്‍ ഇറങ്ങിവരുന്നതു കണ്ടു പൊലീസിനു വിവരം കൈമാറി. പക്ഷേ പൊലീസ് എത്തുന്നതിനു തൊട്ടുമുന്‍പു വിദേശി ബസില്‍ കയറി പോക്കുകയായിരുന്നു.
ഫ്രഞ്ച് പൗരനായ മറ്റൊരാളെ വാഗമണ്ണില്‍നിന്നു നിരീക്ഷണത്തിനു ഇടുക്കി മെഡിക്കല്‍ കോളജിലെ ഐസലേഷന്‍ വാര്‍ഡിലേക്കു മാറ്റി. ബല്‍ജിയം സ്വദേശികളായ 7 പേരെ മടക്കി അയച്ചു. ആരോഗ്യവകുപ്പിന്റെ പരിശോധനകള്‍ക്കു ശേഷമാണ് ഇവര്‍ തിരികെ പോയത്.കോട്ടയത്തു സ്‌പെയിന്‍ സ്വദേശികളായ ഡേവിഡ്, ലയ എന്നിവരെ പാലാ ജനറല്‍ ആശുപത്രിയിലെ നിരീക്ഷണ കേന്ദ്രത്തിലേക്കു മാറ്റി. പന്ത്രണ്ടരയോടെ കെഎസ്ആര്‍ടിസി സൂപ്പര്‍ ഫാസ്റ്റില്‍ മൂന്നാറിനു ടിക്കറ്റെടുത്ത ഇവരെ കണ്ടു സഹയാത്രക്കാര്‍ പരിഭ്രാന്തരായി.

ജില്ലാ പൊലീസ് മേധാവി ജി. ജയ്‌ദേവിന്റെ നിര്‍ദേശ പ്രകാരം ബസ് തടഞ്ഞ കുറവിലങ്ങാട് പൊലീസ് ഇവരെ ആരോഗ്യ വകുപ്പ് അധികൃതര്‍ക്കു കൈമാറി. ഇരുവര്‍ക്കും രോഗലക്ഷണങ്ങളില്ലെങ്കിലും 28 ദിവസം ഹോം ക്വാറന്റീനില്‍ തുടരാനാണ് ആരോഗ്യ വകുപ്പിന്റെ നിര്‍ദേശം. താമസ സ്ഥലം ലഭിക്കാന്‍ ബുദ്ധിമുട്ടായിരിക്കുമെന്നു ചൂണ്ടിക്കാട്ടിയതോടെ പാലാ ജനറല്‍ ആശുപത്രിയിലേക്കു പോകാന്‍ ഇരുവരും തയാറായി.

3 ദിവസം ഭക്ഷണം പോലും കിട്ടാതെ അലഞ്ഞ വിദേശികളായ യുവതിയും യുവാവും നാലാം ദിവസം പട്ടിണി മൂലം വാവിട്ടു കരഞ്ഞതോടെ തുണയായത് പൊലീസും പയ്യന്നൂര്‍ നഗരസഭാ അധികൃതരും താലൂക്ക് ആശുപത്രി അധികൃതരും. ഫ്രാന്‍സില്‍ നിന്നെത്തിയ സലീനയും ഇറ്റലിയില്‍ നിന്നെത്തിയ മൗറയുമാണു വലഞ്ഞത്. 11നു കണ്ണൂരില്‍ എത്തിയ ഇവര്‍ക്ക് ഹോട്ടലുകളിലും ലോഡ്ജുകളിലും മുറി കിട്ടിയില്ല.

ഇന്നലെ സന്ധ്യയോടെ പയ്യന്നൂരിലെത്തി. പൊലീസാണ് ഇവരെ താലൂക്ക് ആശുപത്രിയില്‍ എത്തിച്ചത്. നഗരസഭാ അധ്യക്ഷന്‍ ശശി വട്ടക്കൊവ്വലും ആരോഗ്യ സ്ഥിരം സമിതി അധ്യക്ഷന്‍ എം.സഞ്ജീവനും ആശുപത്രിയില്‍ എത്തി. 3 ദിവസമായി ഭക്ഷണം കഴിച്ചിട്ടില്ലെന്ന് അറിഞ്ഞതോടെ ഡ്യൂട്ടി ഡോക്ടര്‍ ആദ്യം ഭക്ഷണം എത്തിച്ചു. പിന്നീട് തലശ്ശേരി ആശുപത്രിയിലേക്കു മാറ്റി. ഇരുവര്‍ക്കും രോഗലക്ഷണങ്ങള്‍ ഒന്നുമില്ല. മുംബൈയിലും ഗോവയിലും മധുരയിലുമൊക്കെ യാത്ര ചെയ്താണ് ഇവര്‍ കേരളത്തില്‍ എത്തിയത്.

അതേസമയം മൂന്നാറിലേക്കും ഇടുക്കി ജില്ലയിലെ മറ്റ് വിനോദസഞ്ചാര കേന്ദ്രങ്ങളിലേക്കുമുള്ള വിനോദ സഞ്ചാരം നിരോധിച്ചു. ആഭ്യന്തര സഞ്ചാരികളെയും പ്രവേശിപ്പിക്കില്ല എന്നാണ് നിലവിലെ തീരുമാനം. ഈ മാസം 31 വരെയാണ് നിരോധനം.കേരളത്തില്‍ ഇപ്പോള്‍ 5150 വിദേശ സഞ്ചാരികള്‍ ഉണ്ടെന്നാണു കണക്ക്. റിസോര്‍ട്ടുകള്‍, ഹോം-സ്റ്റേകള്‍, ഹോട്ടലുകള്‍ എന്നിവിടങ്ങളില്‍ കഴിയുന്ന വിദേശികളുടെ യാത്രാവിവരം അതതു സ്ഥാപന നടത്തിപ്പുകാര്‍ ജില്ലാ ഭരണകൂടത്തെ അറിയിക്കണം എന്ന് നിര്‍ദേശമുണ്ട്.നിര്‍ദേശങ്ങള്‍ പാലിക്കാത്തവര്‍ക്ക് നേരെ കര്‍ശന നടപടി ഉണ്ടാകും