കൊറോണയ്ക്കിടെ കേരളം ഏറ്റവുമധികം ചര്‍ച്ച ചെയ്യുന്ന വിഷയമാണ് ഡോ. രജിത്കുമാര്‍. താടി കളഞ്ഞ് തലമുടിയും മീശയും കറുപ്പിച്ചുള്ള രജിത് കുമാറിന്റെ ബിഗ് ബോസിലേക്കുള്ള വരവ് സകലരേയും ഞെട്ടിപ്പിച്ചിരുന്നു. ആരാധകരെ വേദനിപ്പിച്ച് രജത്കുമാറിനെ ഔട്ടാക്കിയതിന് വന്‍ വിലയാണ് ചാനലും ബിഗ് ബോസും കൊടുക്കേണ്ടി വന്നത്. എന്തിന് മോഹന്‍ലാല്‍ പോലും സൈബര്‍ അറ്റാക്ക് നേരിടുകയാണ്. എറണാകുളത്ത് വന്നിറങ്ങിയ രജത് കുമാറിന് കിട്ടിയ സ്വീകരണം പോലും പലര്‍ക്കും അസ്വസ്തതയുണ്ടാക്കുന്നതാണ്. ബിഗ് ബോസിന് മുമ്പ് താടി വളര്‍ത്തിയിരുന്ന രജിത് കുമാര്‍ ബിഗ് ബോസ് കഴിഞ്ഞ സ്ഥിതിക്ക് ഇനി താടി വളര്‍ത്തുമോ എന്നാണ് ഏവരും ചോദിക്കുന്ന ചോദ്യം.

വയസനായ രജത്കുമാറില്‍ നിന്നുള്ള ചെറുപ്പക്കാരനായ മേക്കോവറിന്റെ കാരണവും രജിത്കുമാര്‍ മോഹന്‍ലാലിനോട് നേരത്തെ വെളിപ്പെടുത്തിയിരുന്നു. ബിഗ് ബോസ് മലയാളം സീസണ്‍ രണ്ട് മത്സരാര്‍ഥികളില്‍ കാണികളില്‍ ഏറ്റവും കൗതുകമുണര്‍ത്തിയ എന്‍ട്രിയായിരുന്നു രജിത് കുമാറിന്റേത്. പ്രഭാഷണകലയില്‍ മികവ് പുലര്‍ത്തുന്ന രജിത്ത് പലപ്പോഴും ചില പ്രസ്താവനകളുടെ പേരില്‍ വിവാദങ്ങളുടെ കേന്ദ്രസ്ഥാനത്ത് നിന്നിട്ടുള്ളയാളുമാണ്. വന്‍ മേക്കോവറിലാണ് രജിത് കുമാര്‍ ബിഗ് ബോസ് വേദിയില്‍ എത്തിയത്. തൂവെള്ളത്താടിയും വെളുത്ത വസ്ത്രങ്ങളുമായാണ് അദ്ദേഹം മുന്‍പ് വേദികളില്‍ പ്രത്യക്ഷപ്പെട്ടിരുന്നതെങ്കില്‍ അതെല്ലാം മാറ്റിയാണ് പുതിയ രജിത് കുമാര്‍ എത്തിയത്.

താടി കളഞ്ഞ് തലമുടിയും മീശയും കറുപ്പിച്ചിട്ടുണ്ട് അദ്ദേഹം. പുതിയ മേക്കോവറിന്റെ കാരണവും രജിത്കുമാര്‍ മോഹന്‍ലാലിനോട് വെളിപ്പെടുത്തി. അമ്മയ്ക്കുവേണ്ടി ജീവിക്കുന്നയാളാണ് താനെന്നും അമ്മ ആവശ്യപ്പട്ടതനുസരിച്ചാണ് താടി എടുത്തതെന്നും രജിത് കുമാര്‍ മോഹന്‍ലാലിനോട് പറഞ്ഞു. രണ്ട് ആവശ്യങ്ങളാണ് അമ്മ പറഞ്ഞിരുന്നത്. ഒന്ന് വിവാഹം കഴിച്ച് ഒരു കുട്ടിയൊക്കെ ആവണമെന്നതായിരുന്നു. രണ്ടാമത്തേത് താടി എടുക്കണമെന്നും. ആദ്യത്തേത് വേണ്ടെന്ന് തീരുമാനിച്ചതാണ്. അതിനാല്‍ രണ്ടാമത്തെ ആവശ്യം അനുസരിച്ചെന്നും രജിത്കുമാര്‍ പറഞ്ഞു.

രജിത്കുമാറിനെ പ്രശസ്തി തേടിയെത്തുന്നത് ആറ് വര്‍ഷങ്ങള്‍ക്ക് മുന്‍പാണ്. അതും നീണ്ടൊരു കൂവലിന്റെ രൂപത്തിലാണ്. അദ്ദേഹമന്ന് ശ്രീശങ്കര കോളെജിലെ ബോട്ടണി ലക്ചറര്‍ ആയിരുന്നു. ആര്യ എന്ന ബിരുദ വിദ്യാര്‍ഥിനി ആയിരുന്നു അന്നത്തെ കൂവല്‍ പ്രതിഷേധക്കാരി. പ്രഭാഷണത്തിനിടെ രജിത്കുമാര്‍ നടത്തിയ ചില പരാമര്‍ശങ്ങള്‍ സ്ത്രീവിരുദ്ധമാണെന്ന് ആക്ഷേപിച്ചായിരുന്നു കൂവല്‍. ആ പ്രതിഷേധം ആര്യയ്ക്ക് കൈയടികള്‍ നേടിക്കൊടുത്തു. രജിത്കുമാറിന് തുടര്‍ച്ചയായി പ്രഭാഷണങ്ങള്‍ക്കുള്ള അവസരങ്ങളും.

അതേസമയം കോവിഡ് 19 പശ്ചാത്തലത്തില്‍ സിയാല്‍ പുറപ്പെടുവിച്ച വിലക്ക് ലംഘിച്ച് പ്രതിഷേധിച്ച രജിത് ഫാന്‍സിനെതിരെ കേസെടുത്തിട്ടുണ്ട്. പേരറിയുന്ന നാല് പേര്‍ക്കെതിരെയും കണ്ടാലറിയുന്ന 75 പേര്‍ക്കെതിരെയുമാണ് കേസെടുത്തത്.

കോവിഡ് 19 ഭീതിയുടെ പശ്ചാത്തലത്തില്‍ സന്ദര്‍ശകര്‍ക്ക് ഇരു ടെര്‍മിനല്‍ കെട്ടിടത്തിലും സിയാല്‍ ഏര്‍പ്പെടുത്തിയ വിലക്ക് ലംഘിച്ചാണ് രജിത് കുമാര്‍ ആരാധകരെന്ന പേരില്‍ ഒരു കൂട്ടം ആളുകള്‍ വിമാനത്താവളത്തിലെത്തിയത്. കൂട്ടമായെത്തിയ ഇവര്‍ ടെര്‍മിനല്‍ കെട്ടിടത്തില്‍ കൂടി നിന്ന് മുദ്രാവാക്യങ്ങള്‍ മുഴക്കി. പൊലീസുകാരും സുരക്ഷാ ഉദ്യോഗസ്ഥരും പിന്‍തിരിപ്പിക്കാന്‍ ശ്രമിച്ചുവെങ്കിലും ആള്‍ക്കൂട്ടം പിരിഞ്ഞ് പോകാന്‍ തയ്യാറായില്ല. അറസ്റ്റ് ചെയ്യട്ടേ എന്ന് വിളിച്ച് പറഞ്ഞ് കൊണ്ട് പലരും സോഷ്യല്‍ മീഡിയയില്‍ ലൈവിടുകയും ചെയ്തു.

വിമാനത്താവളത്തില്‍ ഒരുമിച്ച് കൂടിയവരോട് തിരികെ പോകാന്‍ ആവശ്യപ്പെടണമെന്ന് പൊലീസ് രജിത് കുമാറിന് നിര്‍ദേശം നല്‍കിയിരുന്നു. എന്നാല്‍ സ്വീകരണമൊരുക്കിയ ശേഷം മാത്രമാണ് ആള്‍ക്കൂട്ടം പിരിഞ്ഞ് പോയത്. വിലക്കുകള്‍ ലംഘിച്ച് ആള്‍ക്കൂട്ടം കാണിച്ച് കൂട്ടിയ എല്ലാ ആഘോഷകള്‍ക്കും ഒപ്പം നിന്ന ശേഷം ആഘോഷങ്ങള്‍ ഒഴിവാക്കണമെന്ന് ആവശ്യപ്പെട്ട് രജിത് കുമാര്‍ ഫേസ് ബുക്ക് ലൈവിലെത്തി.

വിവാദങ്ങള്‍ പുകയുമ്പോഴും രജിത്കുമാര്‍ വീണ്ടും താടി വളര്‍ത്തുമോയെന്നാണ് എല്ലാവര്‍ക്കും അറിയേണ്ടത്. അതിനുള്ള ചോദ്യത്തിന് ഉത്തരം ഒരു ചിരി മാത്രം...