മേലുകാവ് സ്വദേശി ജോണ്‍സണ്‍ ജോബിയുടെ ദുരൂഹ മരണത്തിന്റെ ചുരുളഴിച്ച് പോലീസ്!! മകനെ തലയ്ക്കടിച്ച്‌ കൊന്ന് കൊക്കയില്‍ തള്ളിയത് പിതാവ്... ക്രൂരതയ്ക്ക് സാക്ഷിയായ മാതാവ് കുഴഞ്ഞുവീണു മരിച്ചു!! സംഭവം കോട്ടയത്ത്...
മകനെ കൊലപ്പെടുത്തി കൊക്കയില്‍ തള്ളിയ കേസില്‍ പിതാവ് അറസ്റ്റില്‍. മേലുകാവ് സ്വദേശി ജോണ്‍സണ്‍ ജോബി (35) ആണു മരിച്ചത്. സംഭവത്തില്‍ പിതാവ് ചാക്കോയെ (പാപ്പന്‍ -68) പൊലീസ് അറസ്റ്റ് ചെയ്തു. കൊലപാതകത്തിനു ദൃക്സാക്ഷിയായ, ചാക്കോയുടെ മാതാവ് മറിയാമ്മ (91) കുഴഞ്ഞുവീണു മരിച്ചു. മേലുകാവ് ഇരുമാപ്രയില്‍ കൊക്കയില്‍ യുവാവിന്റെ ജീര്‍ണിച്ച മൃതദേഹം കണ്ടെത്തിയ സംഭവത്തില്‍ പൊലീസ് നടത്തിയ അന്വേഷണത്തിലാണു കൊലപാതകത്തിന്റെ ചുരുളഴിഞ്ഞത്. മദ്യപാനും ലഹരിക്ക് അടിമയുമായ ജോണ്‍സണ്‍ വെള്ളറയിലെ വീട്ടിലായിരുന്നു താമസം.
ചാക്കോയും ഭാര്യയും ചാക്കോയുടെ മാതാവും മൂന്നിലവ് എട്ടൊന്നില്‍ വാടകവീട്ടിലായിരുന്നു താമസം. ഈ മാസം 9-ാം തിയതി ചാക്കോയുടെ വീട്ടിലെത്തിയ ജോണ്‍സണും പിതാവും തമ്മില്‍ വാക്കേറ്റമുണ്ടായി. 11നു രാത്രി ഒന്‍പതോടെ വീണ്ടും മൂന്നിലവിലെ വീട്ടിലെത്തിയ ജോണ്‍സണ്‍ വീട്ടുപകരണങ്ങള്‍ നശിപ്പിച്ചു. ഇതിനിടെ ജോണ്‍സനെ ചാക്കോ ചുറ്റിക കൊണ്ട് അടിച്ചതായി പൊലീസ് പറഞ്ഞു. വഴക്കിനിടെ ചാക്കോയുടെ മാതാവ് കുഴഞ്ഞുവീണു. ഉടന്‍തന്നെ ഈരാറ്റുപേട്ടയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മാതാവിന്റെ മൃതദേഹം ബന്ധുവീട്ടിലെത്തിച്ച ശേഷം ചാക്കോ മകന്റെ മൃതദേഹം കൊക്കയില്‍ തള്ളിയെന്നു പൊലീസ് പറയുന്നു.
പുലര്‍ച്ചെ മൂന്നോടെ ജോണ്‍സന്റെ മൃതദേഹം പ്ലാസ്റ്റിക് കയര്‍ കെട്ടി ജീപ്പില്‍ കയറ്റി കൊക്കയില്‍ തള്ളുകയായിരുന്നു. മകന്‍ സ്ഥിരമായി മദ്യപിച്ചെത്തി വീട്ടില്‍ ആക്രമണം നടത്തിയതിനെതുടര്‍ന്നാണ് കൊലപ്പെടുത്തിയതെന്ന് ചാക്കോ മൊഴി നല്‍കി. ഇയാളുടെ വീട്ടില്‍ നിന്നു രക്തക്കറയും കെട്ടിവലിക്കാന്‍ ഉപയോഗിച്ച കയറിന്റെ ഭാഗങ്ങളും കണ്ടെടുത്തു. പ്രതിയെ ഇന്നു കോടതിയില്‍ ഹാജരാക്കും.
https://www.facebook.com/Malayalivartha
