നിരവധി ജനകീയ പരിപാടികളുമായി സജീവമാണ് പത്തനംതിട്ട കോന്നിയിലെ ജനമൈത്രി പോലീസ്. ഇപ്പോഴിതാ കോവിഡ് പ്രതിരോധത്തിന്റെ ഭാഗമായി പ്രദേശത്തെ അന്യസംസ്ഥാന തൊഴിലാളികൾക്ക് ക്യാമ്പയിൻ സംഘടിപ്പിച്ചിരിക്കുകയാണ് കോന്നി ജനമൈത്രി പോലീസ് . അന്യ സംസ്ഥാന തൊഴിലാളികൾക്ക് വേണ്ടിയുള്ള കോവിഡ് 19 ബോധവൽക്കരണ പരിപാടിയിൽ വൈറസ് ബാധയെയും അതിന്റെ പ്രസരണ വഴികളെയും പാലിക്കേണ്ട നിയന്ത്രണങ്ങളെ കുറിച്ചും ഹിന്ദിയിൽ തന്നെ അവരെ പറഞ്ഞു മനസിലാക്കാൻ പോലീസിന് സാധിച്ചു എന്നതാണ് ശ്രദ്ധേയം. കോന്നി കുമ്മണ്ണൂർ സ്വദേശിയും എക്സ് മിലിട്ടറി ക്കാരനുമായ റഷീദാണ് ബോധവത്കരണ പരിഭാഷ നടത്തിയത്. . 

കേരളാപോലീസിന്റെ പദ്ധതിയായ ക്രൈം ഡ്രൈവിലെ ഇ - രേഖ എന്ന അപ്ലിക്കേഷനിൽ മാസങ്ങൾക്കു മുൻപ് തന്നെ കോന്നി ജനമൈത്രി സ്റ്റേഷൻ പരിധിയിലുള്ള ബഹുഭൂരിപക്ഷം അന്യ സംസ്ഥാന തൊഴിലാളികളുടെയും വിശദ വിവരങ്ങൾ രേഖപെടുത്തിയിരുന്നു. തൊഴിലുടമകളെകുറിച്ചും ഇവർ താമസിക്കുന്ന വീട്ടുടമസ്ഥരെക്കുറിച്ചും അതുപോലെ ഈ തൊഴിലാളികളുടെ കുടുംബാംഗങ്ങളെ കുറിച്ചുമൊക്കെയുള്ള കോൺടാക്ട് നമ്പർ ഉൾപ്പെടെയുള്ള വ്യക്തമായ വിവരങ്ങൾ ഈ ഇ- രേഖ അപ്ലിക്കേഷനിൽ രേഖപ്പെടുത്തിയിട്ടുണ്ട് .അതുകൊണ്ടുതന്നെ കോന്നി പൊലീസിന് ഈ ബോധവത്കരണ പരിപാടി സംഘടിപ്പിക്കുമ്പോൾ സ്റ്റേഷന് കീഴിലുള്ള ഇതര സംസ്ഥാന തൊഴിലാളികളെ കണ്ടെത്താനും നിഷ്പ്രയാസം സാധിച്ചിരുന്നു.
സർക്കാർ പദ്ധതിയായ ബ്രേക്ക് ദി ചെയിനിന്റെ ഭാഗമായി അന്യ സംസ്ഥാന തൊഴിലാളികൾ താമസിക്കുന്ന സ്ഥലങ്ങളിൽ ഹാൻഡ് സാനിറ്റൈസർ നിർബന്ധമാക്കണമെന്ന് വീട്ടുടമസ്ഥരോട് നിർദേശം നൽകിയിട്ടുണ്ട് എന്ന് കോന്നി പോലീസ് പറഞ്ഞു.
ജോലി സ്ഥലങ്ങളിലേക്ക് പോകുമ്പോഴും തിരിച്ചു വരുമ്പോഴും കൈകൾ വൃത്തിയായി 20 സെക്കൻ്റ് കഴുകുക,
രാവിലെ ജോലി തേടി നിൽക്കുന്ന സ്ഥലങ്ങളിൽ കൂട്ടം കൂടി നിൽക്കാതിരിക്കുക, പനിയും മറ്റും വന്നാൽ സ്വയം ചികിത്സിക്കാതെ ഹോസ്പിറ്റലുകളിൽ ചികിത്സ തേടുക, സ്വയം ശുചിത്വം പാലിക്കുക തുടങ്ങിയ നിർദേശങ്ങളാണ് അന്യസംസ്ഥാന തൊഴിലാളികൾക്ക് പോലീസിന്റെ നേതൃത്വത്തിൽ നൽകിയത്.
എസ് എച്ച് ഒ അഷാദ് ,എസ് ഐ ബിനു ജനമൈത്രി ബീറ്റ് ഓഫീസർമാരായ സുബീക് റഹീം ,ജയശ്രീ എന്നിവരാണ് ഈ ബോധവത്കരണ പരിപാടിക്ക് നേതൃത്വം നൽകിയത്. കോന്നി ജനമൈത്രി പോലീസ് സംഘടിപ്പിച്ച ഈ ബോധവത്കരണ പരിപാടിയെ കുറിച്ച് ബീറ്റ് ഓഫീസർ സുബീക് റഹീം മലയാളി വാർത്തയോട് സംസാരിക്കുന്നു..വീഡിയോ കാണാം ..