തമിഴ്‌നാട് മുഖ്യമന്ത്രി സി. ജോസഫ് വിജയ് തിരഞ്ഞെടുപ്പ് സത്യവാങ്മൂലത്തില്‍ 30 കോടി രൂപയുടെ ആസ്തികള്‍ വെളിപ്പെടുത്തിയില്ലെന്ന ഹര്‍ജിയില്‍ ചോദ്യങ്ങളുമായി മദ്രാസ് ഹൈക്കോടതി. വിജയുടെ പെരമ്പൂര്‍ വിജയം ചോദ്യം ചെയ്ത് വോട്ടറായ എസ്. ദിനേശാണ് തിരഞ്ഞെടുപ്പ് ഹര്‍ജി നല്‍കിയത്. സത്യവാങ്മൂലത്തില്‍ വിജയ് നല്‍കിയ സാമ്പത്തിക വിവരങ്ങളില്‍ പൊരുത്തക്കേടുകളുണ്ടെന്നാണ് ആരോപണം.

600 കോടി രൂപയുടെ ആസ്തികള്‍ വെളിപ്പെടുത്തിയിട്ടുള്ള തമിഴ്‌നാട് മുഖ്യമന്ത്രി 30 കോടി രൂപയുടെ ആസ്തികള്‍ വെളിപ്പെടുത്താതിരുന്നത് അഴിമതിയായി കണക്കാക്കാനാകുമോ എന്ന് കേസ് പരിഗണിച്ച ജസ്റ്റിസ് വി. ലക്ഷ്മിനാരായണന്‍ ചോദിച്ചു. പെരമ്പൂര്‍ നിയമസഭാ മണ്ഡലത്തിലെ വിജയുടെ തിരഞ്ഞെടുപ്പ് വിജയത്തെ ചോദ്യം ചെയ്ത് സമര്‍പ്പിച്ച ഹര്‍ജി തള്ളണമെന്നാവശ്യപ്പെട്ട് വിജയ് നല്‍കിയ ഹര്‍ജി പരിഗണിക്കുന്നതിനിടെയാണ് കോടതിയുടെ ചോദ്യം.

നടനെന്ന നിലയില്‍ വിജയ്ക്ക് നിരവധി സ്വത്തുക്കളും നിക്ഷേപങ്ങളും ഉണ്ടായിരിക്കാമെന്ന് വാദത്തിനിടെ കോടതി ചൂണ്ടിക്കാട്ടി. ആസ്തികളുടെ പട്ടിക വിജയ് നേരിട്ട് തയ്യാറാക്കിയത് ആകണമെന്നില്ലെന്നും ചാര്‍ട്ടേഡ് അക്കൗണ്ടന്റിനെ ആശ്രയിച്ചിരിക്കാമെന്നും കോടതി നിരീക്ഷിച്ചു. ചാര്‍ട്ടേഡ് അക്കൗണ്ടന്റിന്റെ പിഴവോ വീഴ്ചയോ മാത്രം തിരഞ്ഞെടുപ്പ് അസാധുവാക്കാന്‍ മതിയായ കാരണമാകുമോയെന്നും ജസ്റ്റിസ് ചോദിച്ചു. ആസ്തി വെളിപ്പെടുത്താതിരുന്നത് പെരമ്പൂരിലെ വോട്ടര്‍മാരുടെ തീരുമാനത്തെ സ്വാധീനിച്ചിട്ടുണ്ടോ എന്നും കോടതി ആരാഞ്ഞു.