ശബരിമല സ്വര്‍ണ പ്പാളി കേസില്‍ കരട് കുറ്റപത്രം സമര്‍പ്പിച്ചു
ശബരിമല സ്വര്‍ണ കട്ടിളപ്പാളി കേസില്‍ കരട് കുറ്റപത്രം പ്രത്യേക അന്വേഷണ സംഘം ഹൈക്കോടതിയില്‍ സമര്‍പ്പിച്ചു. വാതില്‍പ്പാളികളിലെ സ്വര്‍ണം കവര്‍ന്ന കേസിലാണ് 292 സാക്ഷികളെ ഉള്‍പ്പെടുത്തി കരട് കുറ്റപത്രം തയ്യാറാക്കിയത്. അന്തിമ കുറ്റപത്രം സമര്‍പ്പിക്കുന്നതിനുള്ള നടപടികള്‍ വേഗത്തില്‍ പൂര്‍ത്തിയാക്കണമെന്ന് ഹൈക്കോടതി നിര്‍ദേശിച്ചു. ശബരിമല ദ്വാരപാലക സ്വര്‍ണ്ണക്കൊള്ള കേസ് അന്തിമ റിപ്പോര്‍ട്ട് അടുത്ത മാസം 25 ഓടെ സമര്‍പ്പിക്കാമെന്നും അന്വേഷണ ഉദ്യോഗസ്ഥന്‍ അറിയിച്ചു. ഇത് അംഗീകരിച്ച കോടതി സമയപരിധി പാലിക്കണമെന്ന നിര്‍ദ്ദേശം നല്‍കി.
അഴിമതി നിരോധന നിയമപ്രകാരം കുറ്റം ചുമത്തിയിട്ടുള്ളതിനാല്‍ പ്രോസിക്യൂഷന്‍ അനുമതി ആവശ്യമാണ്. അനുമതിക്കായി ബന്ധപ്പെട്ട അധികാരികളെ സമീപിക്കാന്‍ പ്രത്യേക അന്വേഷണസംഘത്തിന് കോടതി നിര്‍ദേശം നല്‍കി. വാതില്‍പ്പാളികളിലെയും ദ്വാരപാലക പാളികളിലെയും സ്വര്‍ണം സംബന്ധിച്ച കേസുകളില്‍ ശാസ്ത്രീയ പരിശോധനാ ഫലം ലഭിക്കാനുണ്ടെന്ന് അന്വേഷണസംഘം അറിയിച്ചു. പരിശോധനാ ഫലം ഈ മാസം 12ന് ലഭിക്കുമെന്നാണ് പ്രതീക്ഷിക്കുന്നത്. ഫലം ലഭിക്കുന്നതോടെ ഈ മാസം 25ന് അന്തിമ കുറ്റപത്രം സമര്‍പ്പിക്കാനാകുമെന്ന് എസ്.ഐ.ടി ഹൈക്കോടതിയെ അറിയിച്ചു.
https://www.facebook.com/Malayalivartha
