കൊവിഡ് പശ്ചാത്തലത്തിൽ കര്‍ശന നിയന്ത്രണങ്ങൾ ഏർപ്പെടുത്തി ഇടുക്കി ജില്ലാ ഭരണകൂടം. പൊതു ഇടങ്ങളിൽ നിന്ന് പരമാവധി ആളുകളെ മാറ്റി നിര്‍ത്താനുള്ള നിര്‍ദ്ദേശങ്ങളാണ് കളക്ടറുടെ ഉത്തരവിൽ പറയുന്നത് . മതപരമായ ചടങ്ങുകൾ, ഉത്സവങ്ങൾ, പെരുനാളുകൾ, വിവാഹം, ഗൃഹപ്രവേശം, മുതലായ ചടങ്ങുകളിൽ പരമാവധി 10 പേരിൽ കൂടുതൽ പങ്കെടുക്കരുത് എന്നാണ് നിർദേശം.

ജില്ലയിലെ വ്യാപാര സ്ഥാപനങ്ങളുടെ പ്രവർത്തനം തിങ്കളാഴ്ച മുതൽ 10 മുതൽ വൈകീട്ട് ആറ് വരെയാക്കി ചുരുക്കി . ഇത് സംബന്ധിച്ച് വ്യാപാരികൾക്ക് ജില്ല ഭരണകൂടം നിർദ്ദേശം നൽകി. വിനോദ സഞ്ചാര മേഖലയിലടക്കം കര്‍ശന സുരക്ഷയും ജാഗ്രതയുമാണ് പ്രഖ്യാപിച്ചിരിക്കുന്നത്.

ഇടുക്കി പെരുവന്താനം വള്ളിയങ്കാവ് ക്ഷേത്രത്തിൽ നിയന്ത്രണം ലംഘിച്ച് പൂജയ്ക്ക് ആൾക്കൂട്ടമെത്തിയത് വലിയ ആശയക്കുഴപ്പത്തിനിടയാക്കിയിരിക്കുകയാണ് . ക്ഷേത്രം അഡ്മിനിസ്ട്രേറ്റീസ് ഓഫീസർ എം രവികുമാറിനെതിരെ പൊലീസ് കേസെടുത്തിട്ടുണ്ട്. സ്പെഷ്യൽ ബ്രാഞ്ച് റിപ്പോർട്ട് അനുസരിച്ചാണ് നടപടി സ്വീകരിച്ചത്. തിരുവിതാംകൂർ ദേവസ്വം ബോർഡ് ജീവനക്കാരനാണ് രവികുമാർ. വിലക്ക് ലംഘിച്ച് നൂറിലധികം പേരാണ് വള്ളിയങ്കാവ് ക്ഷേത്രത്തിൽ പൂജയിൽ പങ്കെടുക്കാൻ എത്തിയത്.