കോവിഡ് കേരളത്തിലും ആശങ്ക വളർത്തുന്നു... കേരളത്തിൽ ഇന്നലെ മാത്രം 12 പുതിയ കേസുകൾ റിപ്പോർട്ട് ചെയ്തതോടെയാണ് കൊറോണ ഭീതി വർധിച്ചത്. ഇതോടെ കൊവിഡ്-19 ബാധിരുടെ എണ്ണം 40 ആയി ഉയർന്നു. വിവിധ ജില്ലകളിൽ നിരീക്ഷണത്തിലുള്ളവരുടെ എണ്ണം ഇതിലും എത്രയോ അധികമാണ് . അത് കൂടി കണക്കിലെടുത്താൽ കോവിഡ് ഉയർത്തുന്ന ഭീഷണി തള്ളിക്കളയാനാവില്ല .

വെള്ളിയാഴ്ച വൈകീട്ട് വരെയുള്ള കണക്കുകൾ പ്രകാരം 44390 ആളുകളാണ് സംസ്ഥാനത്താകെ നിരീക്ഷണത്തിലുള്ളത്. ഇതിൽ കൂടുതൽ പേരും വീടുകളിലാണ് നിരീക്ഷണത്തിൽ കഴിയുന്നത്. കേരളത്തിൽ മൂന്ന് പേരാണ് ഇതുവരെയും രോഗം ഭേദപ്പെട്ട് ഡിസ്ചാർജ് ആയത്. ഇവർ മൂന്നും വുഹാനിൽ നിന്നുള്ള വിദ്യാർഥികളായിരുന്നു. ഇത് മൂന്നുമായിരുന്നു രാജ്യത്തെ ആദ്യത്തെ കൊറോണ കേസുകൾ.

അതേസമയം രാജ്യത്ത് കൊറോണ വൈറസ് ബാധിതരുടെ എണ്ണം 271 ആയി ഉയർന്നു. ഇതിൽ 39 പേർ വിദേശികളാണെന്നും കേന്ദ്ര ആരോഗ്യ മന്ത്രാലയം അറിയിച്ചു. 22 സംസ്ഥാനങ്ങളിലാണ് നിലവിൽ കൊവിഡ് 19 സ്ഥിരീകരിച്ചിട്ടുള്ളത്.