ഭക്ഷ്യസാധനങ്ങളുടെ വിതരണം മുടക്കമില്ലാതെ നടത്താന്‍ ആവശ്യമായ സംവിധാനം ഒരുക്കുമെന്ന് മുഖ്യമന്ത്രി ... ജനങ്ങള്‍ക്ക് കടയില്‍വന്ന് സാധനം വാങ്ങാന്‍ ബുദ്ധിമുട്ട് നേരിട്ടാല്‍ വീടുകളില്‍ എത്തിക്കണം
ഭക്ഷ്യസാധനങ്ങളുടെ വിതരണം മുടക്കമില്ലാതെ നടത്താന്‍ ആവശ്യമായ സംവിധാനം ഒരുക്കുമെന്ന് മുഖ്യമന്ത്രി പിണറായി വിജയന്‍. ഭക്ഷ്യവസ്തുക്കളുടെയും മറ്റ് അവശ്യവസ്തുക്കളുടെയും ലഭ്യത ഉറപ്പാക്കാന്‍ വ്യാപാരി-വ്യവസായി സംഘടനാ പ്രതിനിധികളുമായി നടത്തിയ വീഡിയോ കോണ്‍ഫറന്‍സിലാണ് മുഖ്യമന്ത്രി ഇക്കാര്യം അറിയിച്ചത്. സര്‍ക്കാര്‍ സ്വീകരിക്കുന്ന എല്ലാ നടപടികള്‍ക്കും സംഘടനാപ്രതിനിധികള്‍ പൂര്‍ണ പിന്തുണ അറിയിച്ചു.
ഇതുവരെ ഒരു ആക്ഷേപവും ഈ രംഗത്ത് ഉണ്ടായിട്ടില്ല. സാമൂഹ്യപ്രതിബദ്ധതയോടെയാണ് വ്യാപാരി-വ്യവസായി സമൂഹം പ്രവര്‍ത്തിക്കുന്നത്. കരിഞ്ചന്തയും പൂഴ്ത്തിവയ്പും ഒഴിവാക്കി നിലവിലെ സാഹചര്യം നിലനിര്‍ത്തണം. ജനങ്ങള്‍ക്ക് കടയില്‍വന്ന് സാധനം വാങ്ങാന്‍ ബുദ്ധിമുട്ട് നേരിട്ടാല്‍ വീടുകളില്‍ എത്തിക്കണം. കച്ചവടക്കാര്‍കൂടി ഉള്‍ക്കൊള്ളുന്ന പ്രാദേശിക പൊതുസംവിധാനം ഇതിനായി ഒരുക്കണം.
ഓണ്‍ലൈന്‍ വഴിയോ വാട്‌സാപ് വഴിയോ ഓര്‍ഡര്‍ സ്വീകരിച്ച് വീടുകളില്‍ സാധനം എത്തിക്കാന്‍ സംവിധാനം ഉണ്ടാക്കണം. ഡെലിവറിക്ക് പ്രത്യേകം ആളുകളെ നിയോഗിക്കണം. അയല്‍സംസ്ഥാനങ്ങളില്‍നിന്ന് ചരക്കുലോറി വരുന്നതിനുള്ള തടസ്സം പരിഹരിക്കാന്‍ സര്‍ക്കാര്‍ ഇടപെടും.
പൊതു ഉടമസ്ഥതയിലുള്ള കെട്ടിടങ്ങളില്‍ കട നടത്തുന്നവരുടെ വാടക ഇളവിന്റെ കാര്യം സര്‍ക്കാര്‍ ആലോചിക്കും. വ്യാപാരി സംഘടനകളുടെ കെട്ടിടങ്ങളാണെങ്കില്‍ അത് സംഘടനകള്‍ പരിഗണിക്കണം. അരി, പയര്‍വര്‍ഗങ്ങള്‍, പഞ്ചസാര, ഉപ്പ് മുതലായ അവശ്യവസ്തുക്കളുടെ വില നിയന്ത്രിക്കണം. മാസ്‌ക്, സാനിറ്റൈസര്‍ എന്നിവയ്ക്ക് കേന്ദ്രസര്‍ക്കാര്‍ നിശ്ചയിച്ച വിലയില്‍ കൂടുതല്‍ ഈടാക്കരുത്. ചുരുങ്ങിയത് രണ്ടാഴ്ചത്തേക്കുള്ള അവശ്യസാധനങ്ങളുടെ സ്റ്റോക്ക് വ്യാപാരികള്‍ ഉറപ്പാക്കണം. നിര്‍മാണപ്രവൃത്തികള്‍ക്ക് തടസ്സമില്ല. എന്നാല്‍, പൊതുവായ ക്രമീകരണങ്ങള്‍ ഇതിനും ബാധകമായിരിക്കും. അയല്‍സംസ്ഥാനങ്ങളില്‍ നിന്ന് ലോറി വരാന്‍ തടസ്സമുണ്ടായാല്‍ കേരളത്തില്‍ മറ്റാവശ്യങ്ങള്‍ക്ക് ഓടുന്ന ലോറികള്‍ ഉപയോഗിക്കാം. ഇതിന് സംഘടനകള്‍ മുന്‍കൈയെടുക്കണം. അതിഥിത്തൊഴിലാളികള്‍ക്ക് ആരോഗ്യസുരക്ഷയുള്ള താമസ കേന്ദ്രങ്ങളൊരുക്കണം.
https://www.facebook.com/Malayalivartha
