കൊറോണ വൈറസ് വ്യാപനത്തിന്റെ പശ്ചാത്തലത്തില്‍ ആയുഷ് വകുപ്പിന് കീഴിലുള്ള ആയുര്‍വേദ ആശുപത്രികളില്‍ ചികിത്സയില്‍ കഴിയുന്ന രോഗികളെ ഡിസ്ചാര്‍ജ് ചെയ്യാനുള്ള സംസ്ഥാന സര്‍ക്കാരിന്റെ ഉത്തരവിനെതരേ രൂക്ഷ വിമര്‍ശനവുമായി കേന്ദ്രസഹമന്ത്രി വി. മുരളീധരന്‍. അന്താരാഷ്ട്ര വിപണിയില്‍ ഏറെ പ്രശസ്തമായ കേരളത്തിലെ ആയുര്‍വേദ ചികിത്സയുടെ നട്ടെല്ലൊടിക്കാനേ ഇത്തരം ഉത്തരവുകള്‍ വഴിവയ്ക്കുകയുള്ളൂ. ബിവറേജസ് ഔട്ട്ലെറ്റുകള്‍ അടയ്ക്കാന്‍ കക്ഷി രാഷ്ട്രീയ ഭേദമില്ലാതെ ആവശ്യമുയര്‍ന്നിട്ടും അതിനോട് മുഖം തിരിച്ച് കൊറാണ വൈറസിന്റെ സമൂഹ വ്യാപനത്തിന് കളമൊരുക്കുന്ന പിണറായി സര്‍ക്കാര്‍ ഇത്തരം ഉത്തരവുകളിലൂടെ സ്വയം പരിഹാസ്യരാകുകയാണ്. കേന്ദ്ര ആയുഷ് മന്ത്രാലയം ഈ വിഷയത്തില്‍ കൃത്യമായ മാര്‍ഗനിര്‍ദേശം ഉടന്‍ സംസ്ഥാനത്തിന് നല്‍കുമെന്ന് കരുതുന്നുതായും മുരളീധരന്‍ ഫെയ്സ്ബുക്ക് പോസ്റ്റില്‍ പറയുന്നു.

അദ്ദേഹത്തിന്റെ ഫേസബുക്ക് കുറിപ്പിന്‍എറ പൂര്‍ണരൂപം ഇങ്ങനെ:

ആയുഷ് വകുപ്പിന് കീഴിലുള്ള ആയുര്‍വേദ ആശുപത്രികളിലെ എല്ലാ രോഗികളെയും ഡിസ്ചാര്‍ജ് ചെയ്യാന്‍ നിര്‍ദേശിച്ചു കൊണ്ട്ആയുഷ് വകുപ്പ് പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫിന്റെ ഉത്തരവ് വായിച്ചു. ഗുരുതരാവസ്ഥയില്‍ ഉള്ളവര്‍ ഉണ്ടെങ്കില്‍ അടുത്തുള്ള അലോപ്പതി ആശുപത്രികളിലേക്ക് റഫര്‍ ചെയ്യണമെന്നും പനിയ്ക്കും ശ്വാസകോശ സംബന്ധമായ അസുഖങ്ങള്‍ക്കും ചികില്‍സ തേടി എത്തുന്നവരെ അലോപ്പതി ആശുപത്രികളിലേക്ക് റഫര്‍ ചെയ്യണമെന്നുമാണ് ഉത്തരവിലുള്ളത്. ആശുപത്രിക്കിടക്കകള്‍ കൊവിഡ് ചികിത്സയ്ക്കായി മാറ്റുന്നതിന്റെ ഭാഗമായുള്ള മാര്‍ഗ്ഗ നിര്‍ദ്ദേശമെന്ന് മനസിലാക്കുന്നു. പക്ഷേ, ആയുഷ് വിഭാഗം ചികിത്സ നല്‍കാന്‍ പാടില്ലെന്ന നിര്‍ദ്ദേശം കൂടി കൂട്ടിച്ചേര്‍ത്തുള്ള ഉത്തരവ് ഈ സാഹചര്യത്തില്‍ വേണ്ടിയിരുന്നോ?

കൊവിഡിന്റെ പശ്ചാത്തലത്തില്‍, ആയുര്‍വേദ മേഖലയെ പൂര്‍ണ്ണമായും അവിശ്വസിക്കുകയും ഒഴിവാക്കുകയുമായിരുന്നോ സംസ്ഥാന സര്‍ക്കാര്‍ ചെയ്യേണ്ടിയിരുന്നത്? ഗുരുതരാവസ്ഥയിലുള്ളവരടക്കം എല്ലാ രോഗികളെയും ഡിസ്ചാര്‍ജ് ചെയ്യാന്‍ പറഞ്ഞതെന്തിനാണ്? കൊവിഡ് രോഗലക്ഷണങ്ങളുള്ളവരെ അലോപ്പതി ആശുപത്രികളിലേക്ക് റഫര്‍ ചെയ്യണമെന്നായിരുന്നു ഉത്തരവെങ്കില്‍ അത് ന്യായീകരിക്കാമായിരുന്നു. പക്ഷേ ഇതെന്ത് അടിസ്ഥാനത്തിലാണ് ഇങ്ങനെയൊരു ഉത്തരവ്? പരീക്ഷണ കാലത്തെ അതിജീവിക്കാന്‍ ഒന്നിച്ചു നില്‍ക്കുന്നവര്‍ക്കിടയിലേക്ക് ഇങ്ങനെയൊരു ഉത്തരവ് വേണ്ടിയിരുന്നോ എന്ന് മുഖ്യമന്ത്രി ഒന്നു കൂടി ആലോചിക്കൂ....

അന്താരാഷ്ട്ര വിപണിയില്‍ ഏറെ പ്രശസ്തമായ കേരളത്തിലെ ആയുര്‍വേദ ചികിത്സയുടെ നട്ടെല്ലൊടിക്കാനേ ഇത്തരം ഉത്തരവുകള്‍ വഴിവയ്ക്കുകയുള്ളൂ. ബിവറേജസ് ഔട്ട്‌ലെറ്റുകള്‍ അടയ്ക്കാന്‍ കക്ഷി രാഷ്ട്രീയ ഭേദമില്ലാതെ ആവശ്യമുയര്‍ന്നിട്ടും അതിനോട് മുഖം തിരിച്ച് കൊറോണ വൈറസിന്റെ സമൂഹ വ്യാപനത്തിന് കളമൊരുക്കുന്ന പിണറായി സര്‍ക്കാര്‍ ഇത്തരം ഉത്തരവുകളിലൂടെ സ്വയം പരിഹാസ്യരാകുകയാണ്. അടിയന്തരമായി ചെയ്യേണ്ടതെന്തെന്ന് അങ്ങയുടെ ഉപദേശകര്‍ ഈ കൊവിഡ് കാലത്തെങ്കിലും മനസിലാക്കുമെന്നാണ് എന്റെ പ്രതീക്ഷ. കേന്ദ്ര ആയുഷ് മന്ത്രാലയം ഈ വിഷയത്തില്‍ കൃത്യമായ മാര്‍ഗനിര്‍ദ്ദേശം ഉടന്‍ സംസ്ഥാനത്തിന് നല്‍കുമെന്ന് കരുതുന്നു.