ഗവ. ചീഫ് വിപ് സ്ഥാനവും എംഎല്‍എ സ്ഥാനവും നഷ്ടപ്പെടാതിരിക്കാന്‍ പിസി ജോര്‍ജ് സമ്മര്‍ദ്ദ തന്ത്രവുമായി രംഗത്ത്. ചീഫ് വിപ്പ് സ്ഥാനത്തു നിന്നും പിസി ജോര്‍ജിനെ മാറ്റണമെന്ന കേരള കോണ്‍ഗ്രസ് (എം) ആവശ്യമാണ് ജോര്‍ജ് നിസഹായനായത്. ഇതു സംബന്ധിച്ചു യുഡിഎഫ് നേതൃത്വം നടത്തിയ അനുരഞ്ജന ശ്രമങ്ങള്‍ വഴിമുട്ടി. 
തീരുമാനത്തില്‍ മാറ്റമില്ലെന്ന നിലപാടില്‍ മന്ത്രി കെ.എം. മാണിയും തനിക്കു സ്ഥാനം തന്നതു മാണിയല്ല, നീക്കണമെങ്കില്‍ യുഡിഎഫ് തീരുമാനിക്കണമെന്ന നിലപാടില്‍ ജോര്‍ജും ഉറച്ചുനില്‍ക്കുകയാണ്. ഇതേസമയം, പ്രശ്‌നം രമ്യമായി പരിഹരിക്കാന്‍ കഴിയുമെന്നും കേരള കോണ്‍ഗ്രസിന്റെ ആവശ്യത്തില്‍ എല്ലാവരുമായും ചര്‍ച്ചചെയ്തു തീരുമാനിക്കുമെന്നും മുഖ്യമന്ത്രി ഉമ്മന്‍ ചാണ്ടി പ്രതികരിച്ചു. നാളെ ദുബായ്ക്കു പോകുന്ന ഉമ്മന്‍ ചാണ്ടി വ്യാഴാഴ്ചയേ മടങ്ങിയെത്തൂ. 
കേരള കോണ്‍ഗ്രസ് (എം) വൈസ് ചെയര്‍മാനായ ജോര്‍ജിനെ ഗവ. ചീഫ് വിപ് സ്ഥാനത്തു നിന്നും യുഡിഎഫ് ഉന്നതാധികാര സമിതിയില്‍ നിന്നും നീക്കണമെന്ന പാര്‍ട്ടി നിയമസഭാകക്ഷി യോഗത്തിന്റെ തീരുമാനത്തില്‍ വിട്ടുവീഴ്ചയില്ലെന്ന് ഇന്നലെ ഉമ്മന്‍ ചാണ്ടിയുമായും മന്ത്രി പി.കെ. കുഞ്ഞാലിക്കുട്ടിയുമായും നടത്തിയ ചര്‍ച്ചകളില്‍ മാണി അറിയിച്ചു. ജോര്‍ജിനെ പാര്‍ട്ടിയില്‍ നിന്നു പുറത്താക്കില്ലെന്നും അദ്ദേഹം വ്യക്തമാക്കി. 
എന്നാല്‍, ചീഫ് വിപ് സ്ഥാനം കാണിച്ചു തന്നെ ഭീഷണിപ്പെടുത്തരുതെന്നും ധൈര്യമുണ്ടെങ്കില്‍ പാര്‍ട്ടി സെക്രട്ടേറിയറ്റ് യോഗം വിളിക്കാനും ആവശ്യപ്പെട്ടു ജോര്‍ജ് തിരിച്ചടിച്ചു. താന്‍ യുഡിഎഫിന്റെ ഭാഗമായി തുടരും, അതു കേരള കോണ്‍ഗ്രസ് (സെസക്യുലര്‍) പുനരുജ്ജീവിപ്പിച്ചു കൊണ്ടാവും - ജോര്‍ജ് വ്യക്തമാക്കി. പുതിയ പാര്‍ട്ടിയുമായി ജോര്‍ജിനെ യുഡിഎഫില്‍ നിലനിര്‍ത്താന്‍ അനുവദിക്കില്ലെന്നു മാണിയും നിലപാടെടുത്തു. 
തന്റെ ഔദ്യോഗിക വസതിയായ ക്ലിഫ് ഹൗസിലേക്കു ജോര്‍ജിനെ വരുത്തി മുഖ്യമന്ത്രി ചര്‍ച്ച നടത്തി. രാജിക്കത്തും പോക്കറ്റിലിട്ടാണു മുഖ്യമന്ത്രിയെ കണ്ടതെന്നാണു സ്വകാര്യവാഹനത്തിലെത്തിയ ജോര്‍ജ് മാധ്യമങ്ങളോടു പറഞ്ഞത്. 
മുന്നണി നേതൃത്വം ആവശ്യപ്പെട്ടാല്‍ ചീഫ് വിപ് സ്ഥാനം രാജിവയ്ക്കാമെന്നും കേരള കോണ്‍ഗ്രസ്-എമ്മില്‍ ഇനി തുടരാന്‍ പറ്റില്ലെന്നും മുഖ്യമന്ത്രിയെ ജോര്‍ജ് അറിയിച്ചു. തന്റെ പഴയ പാര്‍ട്ടി പുനരുജ്ജീവിപ്പിക്കുന്ന കാര്യവും ആവര്‍ത്തിച്ചു. 
ജോര്‍ജ് എത്തിയതിനു പിന്നാലെ കുഞ്ഞാലിക്കുട്ടിയും മന്ത്രി രമേശ് ചെന്നിത്തലയും മുഖ്യമന്ത്രിയുടെ വസതിയിലെത്തി ചര്‍ച്ചയില്‍ പങ്കാളികളായി. തുടര്‍ന്നു കുഞ്ഞാലിക്കുട്ടി, മാണിയുടെ വീട്ടിലെത്തി ജോര്‍ജുമായി നടത്തിയ ചര്‍ച്ചയുടെ വിശദാംശങ്ങള്‍ അറിയിച്ചു. എന്നാല്‍ ജോര്‍ജിന്റെ കാര്യത്തില്‍ ഒരു വിട്ടുവീഴ്ചയ്ക്കുമില്ലെന്ന നിലപാട് മാണി ആവര്‍ത്തിച്ചു. 
ഇതിനുശേഷം ചര്‍ച്ചകള്‍ മുഖ്യമന്ത്രിയുടെ ഓഫിസിലേക്കു മാറി. മന്ത്രിമാരായ രമേശ് ചെന്നിത്തല, കുഞ്ഞാലിക്കുട്ടി, മാണി എന്നിവര്‍ വീണ്ടും കൂടിയാലോചനകള്‍ നടത്തി. മാണി നിലപാടുമാറ്റാന്‍ തയാറാകാത്തതിനാല്‍ ചര്‍ച്ച ഫലം കണ്ടില്ല. ജോര്‍ജിനെയും പിന്നീട് ഓഫിസിലേക്കു വിളിച്ചുവരുത്തി മുഖ്യമന്ത്രി ചര്‍ച്ച നടത്തിയെങ്കിലും അതും വിഫലമായി. ഇതോടെ പ്രശ്‌നപരിഹാരത്തിനുള്ള പുതിയ ഫോര്‍മുല തേടുകയാണ് യുഡിഎഫിലെ ക്രൈസിസ് മാനേജര്‍മാര്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha