പ്രളയം തടയാനായി മണല് നീക്കാം; പുറത്തേക്ക് കൊണ്ടുപോവരുതെന്നു വനംവകുപ്പ്, മണലെടുപ്പ് കരാറില് നിന്ന് ക്ലേയ്സ് ആന്ഡ് സെറാമിക് പ്രൊഡക്ട്സ് പിന്മാറി
പമ്പയില് നിന്ന് മണല് പുറത്തേക്ക് കൊണ്ടുപോകുന്നത് വനംവകുപ്പ് വിലക്കി. പ്രളയം തടയാനായി മണല് നീക്കാം. പുറത്തേക്ക് കൊണ്ടുപോവരുതെന്നു വനംവകുപ്പ് നിർദേശിച്ചു. ഇതോടെ മണല് നീക്കം തല്ക്കാലത്തേക്ക് നിര്ത്തിവച്ചു. ഇതിനിടെ മണലെടുപ്പ് കരാറില് നിന്ന് ക്ലേയ്സ് ആന്ഡ് സെറാമിക് പ്രൊഡക്ട്സ് പിന്മാറി. മണല് വില്ക്കാന് അനുമതിയില്ലെങ്കില് പ്രയോജനമില്ലെന്ന് ചെയര്മാന് ടി.കെ.ഗോവിന്ദന് പ്രതികരിച്ചു. ഇടപാടില് അഴിമതിയില്ലെന്നും ചെയർമാൻ കൂട്ടിച്ചേർത്തു.
മുന് ചീഫ് സെക്രട്ടറി ടോം ജോസിന്റെ പമ്പ യാത്രയില് അഴിമതിയെന്ന പ്രതിപക്ഷ നേതാവിന്റെ ആരോപണത്തെ രൂക്ഷമായി വിമര്ശിച്ച് ചീഫ് സെക്രട്ടറി വിശ്വാസ് മേത്ത ഇന്ന് രംഗത്തെത്തിയിരുന്നു. ടോം ജോസിനും ഡി.ജി.പിക്കുമൊപ്പം പമ്പയില് താനും പോയെന്ന് ചീഫ് സെക്രട്ടറി വ്യക്തമാക്കി. പമ്പാ യാത്ര വിനോദയാത്രയായിരുന്നില്ല. പ്രളയത്തെ പ്രതിരോധിക്കാനായാണ് മണല് നീക്കം ചെയ്യുന്നത്. രണ്ട് വര്ഷം മുമ്പെടുത്ത തീരുമാനം ഉദ്യോഗസ്ഥര് നടപ്പാക്കാത്തതിനാലാണ് നേരിട്ട് പോയത്. കലക്ടറെയും എസ്.പിയെയും ശാസിക്കുകയും ചെയ്തു.
ടോം ജോസിന്റെ പേരില് വിവാദമുണ്ടാക്കുന്നത് ശരിയല്ലെന്നും മണല് നീക്കല് നടപടിയുമായി മുന്നോട്ടുപോകുമെന്ന് വിശ്വാസ് മേത്ത മനോരമ ന്യൂസിന് അനുവദിച്ച പ്രത്യേക അഭിമുഖത്തില് വ്യക്തമാക്കി. വിരമിക്കുന്നതിന്റെ തലേദിവസം ഡി.ജി.പിയും ടോം ജോസും നടത്തിയ ഹെലികോപ്റ്റര് യാത്ര ദുരൂഹമെന്നു പ്രതിപക്ഷ നേതാവ് രമേശ് ചെന്നിത്തലയുടെ പ്രസ്താവനയോടു പ്രതികരിക്കുകയായിരുന്നു ചീഫ് സെക്രട്ടറി.
യാത്രയ്ക്കുശേഷം ഉത്തരവിറക്കിയ പമ്പ ത്രിവേണിയിലെ മണല് കൈമാറ്റത്തില് വന് അഴിമതിയെന്നു ചെന്നിത്തല കഴിഞ്ഞ ദിവസം ആരോപിച്ചിരുന്നു. മേയ് 29 നാണ് ടോം ജോസ്, ലോക്നാഥ് ബഹ്റ എന്നിവര് പത്തനംതിട്ടയില് പൊലീസ് വാടകയ്ക്കെടുത്ത ഹെലികോപ്റ്റര് യാത്ര നടത്തിയത്. തിടുക്കപ്പെട്ട് നടത്തിയ ഈ യാത്രയ്ക്കുശേഷമാണ് പമ്പയില് കഴിഞ്ഞ പ്രളയത്തില് അടിഞ്ഞുകൂടിയ മണല് നീക്കം ചെയ്യാനുള്ള ഉത്തരവിറക്കിയത്.
ഒരു ലക്ഷത്തിലധികം മെട്രിക് ടണ് മണല് സൗജന്യമായി കണ്ണൂര് ആസ്ഥാനമായുള്ള ക്ലേ ആന്റ് സെറാമിക്സ് എന്ന പൊതുമേഘലാ സ്ഥാപനത്തിനു കൈമാറിയെന്നാണ് പ്രതിപക്ഷ നേതാവിന്റെ ആരോപണം. മാലിന്യ നിര്മാര്ജനത്തിന്റെ പേരില് പൊതുമേഘലാ സ്ഥാപനത്തെ മുന് നിര്ത്തിയുള്ള കച്ചവടമാണെന്നും പ്രതിപക്ഷ നേതാവ് ചൂണ്ടിക്കാട്ടി. പ്രളയം കഴിഞ്ഞ് രണ്ടു വര്ഷമായിട്ടും പമ്പയിലെ മണല് നീക്കാത്തതിലും ദുരൂഹതയുണ്ടെന്നും ചെന്നിത്തല ആരോപിച്ചു.
https://www.facebook.com/Malayalivartha
