നെടുമ്പാശേരിയില്‍ മിനി കൂപ്പര്‍ കാര്‍ ഇടിച്ച് മൂന്നു പേര്‍ മരിച്ച കേസില്‍ പ്രതികള്‍ക്ക് ജാമ്യം നിഷേധിച്ച അങ്കമാലി ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയുത്തരവ് പുറത്ത്. ഒന്നാം പ്രതി സുഹൈല്‍ സജീവ് മദ്യപിച്ച് വാഹനമോടിച്ചുവെന്ന് രക്തപരിശോധനയില്‍ തെളിഞ്ഞു. ഇത് സംബന്ധിച്ച് ദൃക്‌സാക്ഷി മൊഴികളും സിസിടിവി ദൃശ്യങ്ങളുമുണ്ട്. പ്രതി മദ്യപിച്ചിട്ടുണ്ടെന്ന് അറിഞ്ഞിട്ടും മറ്റ് മൂന്ന് പ്രതികളും വേഗത്തില്‍ വാഹനമോടിക്കാന്‍ പ്രേരിപ്പിച്ചു. പ്രതികള്‍ പുറത്തിറങ്ങിയാല്‍ സാക്ഷികളെ സ്വാധീനിക്കും. തെളിവ് നശിപ്പിക്കും, ഒളിവില്‍പ്പോകാനും സാദ്ധ്യതയുണ്ട്. അതിനാല്‍ ജാമ്യം നിഷേധിക്കുന്നുവെന്ന് കോടതി ഉത്തരവില്‍ പറയുന്നു.

കേസിലെ ഒന്നാംപ്രതിയും വാഹനമോടിച്ചിരുന്നയാളുമായ സുഹൈല്‍ സജീവ് (19), കാറില്‍ ഒപ്പം യാത്ര ചെയ്ത നിനവ് (19), ജോയല്‍ (19), അമീര്‍ (19) എന്നിവരുടെ ജാമ്യാപേക്ഷയാണ് തള്ളിയത്. ഒക്ടോബര്‍ 11നുണ്ടായ അപകടത്തില്‍ വയനാട് സ്വദേശി ദേവിക, പാലക്കാട് സ്വദേശി ഗോപിക, കര്‍ണാടക സുള്ള്യ സ്വദേശി ഇയാസ് എന്നിവര്‍ മരണമടഞ്ഞിരുന്നു. ഒന്നാംപ്രതിക്കെതിരെ നരഹത്യാ കുറ്റവും ബാക്കി മൂന്നുപേര്‍ക്കുമെതിരെ പ്രേരണാ കുറ്റവുമാണ് ചുമത്തിയത്.

കടുത്ത ലഹരിയിലായിരുന്ന ഒന്നാം പ്രതി മണിക്കൂറില്‍ 100 കിലോമീറ്ററിലധികം വേഗതയില്‍ മറ്റ് പ്രതികളുടെ അകമ്പടിയോടെ വാഹനം ഓടിച്ചത് പൊതുസുരക്ഷയോടും മറ്റ് യാത്രികരുടെ ജീവനോടുമുള്ള നിരുത്തരവാദപരമായ സമീപനവും നിയമലംഘനവുമാണെന്ന് കോടതി വിലയിരുത്തി. എഫ്.ഐ.ആറില്‍ എല്ലാ കാര്യങ്ങളും വിശദമായി ഉണ്ടായിരിക്കണമെന്നില്ലെന്നും തുടരന്വേഷണത്തിലാണ് കൂടുതല്‍ വിവരങ്ങളും പ്രതികളുടെ പങ്കും വ്യക്തമാകുന്നതെന്നും കോടതി ചൂണ്ടിക്കാട്ടി.