മാസപ്പടി കേസില്‍ മുന്‍ മുഖ്യമന്ത്രി പിണറായി വിജയന്റെ വീട്ടിലെത്തി ചുമരില്‍ സമന്‍സ് പതിപ്പിച്ച എന്‍ഫോഴ്സ്മെന്റ് ഡയറക്ടറേറ്റിന്റെ (ഇഡി) നടപടിക്കെതിരെ രൂക്ഷവിമര്‍ശനവുമായി സിപിഎം. പിണറായിയുടെ തിരുവനന്തപുരം ബേക്കറി ജങ്ഷനിലെ സ്വകാര്യ വസതിയിലെത്തിയ മുന്‍ മന്ത്രി വി. ശിവന്‍കുട്ടി, ഇഡിയുടെ നടപടി പ്രതിഷേധാര്‍ഹമാണെന്ന് പ്രതികരിച്ചു.

പിണറായിയോ ഭാര്യയോ മകളോ വീട്ടിലില്ലാത്ത സമയത്താണ് ഉദ്യോഗസ്ഥര്‍ സമന്‍സ് പതിപ്പിച്ചതെന്നും പിടികിട്ടാപ്പുള്ളിയോടെന്ന പോലെയാണ് ഇഡിയുടെ പെരുമാറ്റമെന്നും ശിവന്‍കുട്ടി ആരോപിച്ചു. സുപ്രീംകോടതിയിലുള്ള ഹര്‍ജി പോലും പരിഗണിക്കാതെയാണ് ഇഡിയുടെ നടപടിയെന്നും അദ്ദേഹം വിമര്‍ശിച്ചു.

ഇന്ന് രാവിലെയാണ് ഇഡി ഉദ്യോഗസ്ഥര്‍ പിണറായി വിജയന്റെ വീട്ടിലെത്തി ചുമരില്‍ സമന്‍സ് പതിപ്പിച്ചത്. വെള്ളിയാഴ്ച ചോദ്യം ചെയ്യലിനായി ഹാജരാകണമെന്നാണ് സമന്‍സിലെ നിര്‍ദേശം. ഉദ്യോഗസ്ഥര്‍ എത്തുമ്പോള്‍ പിണറായിയും ഭാര്യയും മകളും വീട്ടിലുണ്ടായിരുന്നില്ല. പിണറായി നിലവില്‍ കണ്ണൂരിലാണ്. സമന്‍സ് തപാല്‍ മാര്‍ഗം ലഭിക്കുമെന്നായിരുന്നു പ്രതീക്ഷിച്ചിരുന്നതെങ്കിലും ഇഡി ഉദ്യോഗസ്ഥര്‍ നേരിട്ടെത്തി വീട്ടിലെ ചുമരില്‍ പതിപ്പിക്കുകയായിരുന്നു.

]

]