കോഴിക്കോട് തൊട്ടില്‍പാലത്തുനിന്ന് ദുരൂഹസാഹചര്യത്തില്‍ കാണാതായ മൊയിലോത്തറ ജി.എല്‍.പി.എസിലെ അധ്യാപിക അനുമോളെ അന്വേഷണ സംഘം കണ്ടെത്തി. ആണ്‍സുഹൃത്ത് വടകര തോടന്നൂര്‍ സ്വദേശി അബ്ദുള്‍ സമദിനൊപ്പം പാലക്കാട് പുതുശേരിയിലെ വാടകവീട്ടില്‍ നിന്നാണ് പൊലീസ് കണ്ടെത്തിയത്. അഞ്ചാം തീയതി സ്‌കൂളിലേക്ക് പോയ അനുമോളെ കാണാതായതോടെ കുടുംബം പൊലീസില്‍ പരാതിപ്പെടുകയായിരുന്നു. തുടര്‍ന്നുണ്ടായ ഊര്‍ജിതമായ അന്വേഷണമാണ് ഒടുവില്‍ വഴിത്തിരിവിലെത്തിയത്.

കാണാതായ അഞ്ചാം തീയതിക്കുശേഷം അനുമോളുടെ ഫോണ്‍ സ്വിച്ച് ഓണ്‍ ആയിരുന്നില്ലെങ്കിലും, വൈഫൈ കണക്ഷന്‍ വഴി വാട്സ്ആപ്പ് മാത്രം ഉപയോഗിക്കുന്നുണ്ടെന്ന് അന്വേഷണ സംഘം കണ്ടെത്തിയിരുന്നു. ഈ വാട്സ്ആപ്പ് ലൊക്കേഷന്‍ കേന്ദ്രീകരിച്ച് നടത്തിയ ശാസ്ത്രീയമായ നീക്കമാണ് പാലക്കാട് പുതുശേരിയില്‍ ഇരുവരും വാടകയ്ക്ക് താമസിക്കുന്ന വീട് കണ്ടെത്താന്‍ പൊലീസിനെ സഹായിച്ചത്. നാദാപുരം ഡിവൈഎസ്പിയുടെ നേതൃത്വത്തിലുള്ള പ്രത്യേക അന്വേഷണ സംഘമാണ് ഇരുവരെയും കസ്റ്റഡിയിലെടുത്തത്.

പത്തുവര്‍ഷം മുന്‍പ് മാരക രോഗത്തെത്തുടര്‍ന്ന് ഭര്‍ത്താവിന്റെ കരള്‍ മാറ്റിവച്ച അനുമോളുടെ തിരോധാനം വലിയ രീതിയിലുള്ള ദുരൂഹതകള്‍ക്കും ആശങ്കകള്‍ക്കും വഴിവെച്ചിരുന്നു. വടകര തോടന്നൂര്‍ സ്വദേശിയായ അബ്ദുള്‍ സമദുമായുള്ള ബന്ധം അധ്യാപിക ജോലി ചെയ്തിരുന്ന സ്‌കൂളിലെ സഹപ്രവര്‍ത്തകര്‍ക്ക് നേരത്തെ തന്നെ അറിയാമായിരുന്നു എന്ന വിവരവും പുറത്തുവന്നിട്ടുണ്ട്. പലപ്പോഴായി സമദ് അനുമോളെ കാണാനായി സ്‌കൂളില്‍ എത്തിയിരുന്നതായി സഹപ്രവര്‍ത്തകര്‍ പൊലീസിന് മൊഴി നല്‍കിയിട്ടുണ്ട്.

അബ്ദുള്‍ സമദിന്റെ പേരിലുണ്ടായിരുന്ന വ്യത്യസ്ത സിം കണക്ഷനുകളും മറ്റ് കോള്‍ വിവരങ്ങളും സൈബര്‍ സെല്ലിന്റെ സഹായത്തോടെ പൊലീസ് പരിശോധിച്ചുവരികയായിരുന്നു. ഇതിനിടെ അനുമോളുടെ കുടുംബം ഹൈക്കോടതിയില്‍ ഹേബിയസ് കോര്‍പസ് ഹര്‍ജിയും സമര്‍പ്പിച്ചിരുന്നു. ഈ ഹര്‍ജി കോടതി പരിഗണിക്കാനിരിക്കെയാണ് പൊലീസ് സംഘം പാലക്കാട്ടുനിന്നും ഇരുവരെയും കണ്ടെത്തിയത്. കൗണ്‍സിലിംഗിനു വിധേയമാക്കിയ ശേഷം അനുമോളെ കോടതിയില്‍ ഹാജരാക്കാനാണ് പൊലീസിന്റെ തീരുമാനം.

അബ്ദുല്‍ സമദും അനുമോളും ഒരുമിച്ചാണുള്ളതെന്ന് നേരത്തെ പൊലീസിന് വിവരം ലഭിച്ചിരുന്നു. സമദിന്റെ പേരില്‍ ഏഴ് സിം കണക്ഷനുകളുണ്ടെന്നാണ് കണ്ടെത്തല്‍. ഈ നമ്പറുകളിലെ കോള്‍ വിവരങ്ങള്‍ ശേഖരിക്കുന്നതിനായി തൊട്ടില്‍പ്പാലം പൊലീസ് സൈബര്‍ സെല്ലിനെ സമീപിച്ചിരുന്നു.