ഉത്രയെ മാര്‍ച്ച് രണ്ടിനു മുമ്പു തന്നെ പാമ്പിനെ കൊണ്ട് കടിപ്പിക്കാന്‍ ശ്രമം നടത്തിയിരുന്നതായി സൂരജ് പോലീസിനോട് പറഞ്ഞു. ഫെബ്രുവരി 29-നായിരുന്നു ആദ്യശ്രമം. രാത്രിയില്‍, ചാക്കില്‍ കൊണ്ടുവന്ന അണലിയെ സൂരജ് വീടിന്റെ മുകള്‍നിലയില്‍ കിടപ്പുമുറിയിലെ കട്ടിലിനടിയില്‍ ഒളിപ്പിച്ചു വച്ചു . എന്നാല്‍, പാമ്പ് ചാക്കിന് പുറത്തിറങ്ങി സ്റ്റെയര്‍കേസിലേക്ക് ഇഴഞ്ഞു പോയി . ആ സമയം മുകള്‍നിലയിലേക്കുപോയ ഉത്ര പാമ്പിനെ കണ്ട് നിലവിളിച്ചോടി. അവിടെയെത്തിയ സൂരജ് പാമ്പിനെ ചാക്കിലാക്കി വീടിന് പുറകുവശത്തേക്ക് എറിഞ്ഞെങ്കിലും കുറച്ചുകഴിഞ്ഞ് സൂരജ് പുറത്തിറങ്ങി പാമ്പിനെയെടുത്ത് ഷെഡ്ഡില്‍ ഒളിപ്പിച്ചു. പിന്നീടാണ് മാര്‍ച്ച് രണ്ടിന് ഉത്രയുടെ കാലില്‍ കടിപ്പിച്ചത്.അണലികടിച്ച് ചികിത്സയ്ക്കായി ഉത്രയെ തിരുവല്ലയിലെ സ്വകാര്യ ആശുപത്രിയിലെത്തിച്ചപ്പോള്‍ ഡോക്ടര്‍ സംഭവത്തില്‍ സംശയം പറഞ്ഞു.

ഉത്രയുടെ കാല്‍മുട്ടിനുതാഴെ മസില്‍ ഭാഗത്താണ് പാമ്പ് കടിച്ചത്. ഉത്രയ്ക്ക് പാമ്പുകടിയേറ്റത് വീടിന് പുറത്തുവെച്ചാണെന്നാണ് സൂരജും വീട്ടുകാരും ഡോക്ടറോട് പറഞ്ഞിരുന്നത്. ഈ ഭാഗത്ത് അണലി കടിക്കാന്‍ സാധ്യതയില്ലെന്ന് ഡോക്ടര്‍മാര്‍ അന്ന് ഉത്രയുടെ ബന്ധുക്കളോട് പറഞ്ഞിരുന്നു. അണലിവര്‍ഗത്തിലുള്ള പാമ്പുകള്‍ ഇത്രയും ഉയരത്തില്‍ കടിക്കാന്‍ സാധ്യത കുറവാണെന്നതായിരുന്നു കാരണം. ആദ്യമായി പാമ്പുപിടിത്തക്കാരന്‍ സുരേഷിനെ സൂരജ് വിളിക്കുന്നത് ഫെബ്രുവരി 12-നാണ്. ഫെബ്രുവരി 18-ന് ചാത്തന്നൂരില്‍ ഇരുവരും കണ്ടുമുട്ടി. എലിയെ പിടിക്കാന്‍ ഒരു പാമ്പിനെ വിലയ്ക്കു തരണമെന്ന് സൂരജ് ആവശ്യപ്പെട്ടു. ഇതനുസരിച്ച് ഫെബ്രുവരി 26-ന് ഏനാത്ത് സുരേഷ് സൂരജിന് പാമ്പിനെ കൈമാറിയത്.