കേരളത്തില്‍ രോഗവ്യാപനത്തിന്റെ അടിസ്ഥാനമായ പുനരുല്‍പാദന നിരക്ക് (ബേസിക് റീപ്രൊഡക്ഷന്‍ റേറ്റ്- ആര്‍) ഇപ്പോള്‍ 1.35 ആണെന്നാണു യുഎസിലെ മിഷിഗന്‍ സര്‍വകലാശാലയിലെ വിദഗ്ധരുടെ വിലയിരുത്തല്‍. പകര്‍ച്ചവ്യാധി നിയന്ത്രണ വിധേയമാകണമെങ്കില്‍ ഇത് ഒന്നില്‍ താഴെ എത്തണം. തന്മൂലം കേരളത്തില്‍ കോവിഡ് പ്രതിരോധ നടപടികള്‍ കര്‍ശനമാക്കിയില്ലെങ്കില്‍ രോഗവ്യാപനം സെപ്റ്റംബറിലേക്കു നീണ്ടേക്കുമെന്നാണ് മുന്നറിയിപ്പ്.

ജൂലൈ-4 ആകുമ്പോഴേക്കും കേരളത്തിലെ മൊത്തം കോവിഡ് രോഗികളുടെ എണ്ണം ചുരുങ്ങിയത് 11,000 ആകുമെന്നാണ് മിഷിഗന്‍ വാഴ്‌സിറ്റി ടീമിന്റെ ഇന്നലത്തെ നിഗമനം. ഇതു പരമാവധി 43,000 വരെയാകാം. ഇന്ത്യയൊട്ടാകെയുള്ള രോഗികളുടെ എണ്ണം അപ്പോഴേയ്ക്കും 6 ലക്ഷം മുതല്‍ 9 ലക്ഷം വരെയാകും. മരണം രണ്ടാഴ്ച കൂടുമ്പോള്‍ ഇരട്ടിയാകും.

വാഴ്‌സിറ്റിയിലെ സ്‌കൂള്‍ ഓഫ് പബ്ലിക് ഹെല്‍ത്തിലെ ബയോ സ്റ്റാറ്റിസ്റ്റിക്‌സ് പ്രഫസര്‍ ഇന്ത്യക്കാരി ഡോ. ഭ്രമര്‍ മുഖര്‍ജിയുടെ നേതൃത്വത്തിലുള്ള സംഘമാണ് പഠനം നടത്തുന്നത്.

മിഷിഗന്‍ വാഴ്‌സിറ്റിയിലെ കോവിഡ് ഇന്ത്യ സ്റ്റഡി ഗ്രൂപ്പ് ആണ് ഫെബ്രുവരി മുതല്‍ ഇന്നലെ വരെയുള്ള കേരളത്തിലെ രോഗവ്യാപന രീതിയും രോഗികളുടെ എണ്ണവും വിലയിരുത്തി റിപ്പോര്‍ട്ട് തയാറാക്കുന്നത്. ദിവസേനയുള്ള രോഗക്കണക്കുകള്‍ മാറുന്നതിനനുസരിച്ച് രോഗവ്യാപന സാധ്യതാ വിവരങ്ങള്‍ പുതുക്കുന്നുമുണ്ട്.