കുടുംബവഴക്കിനെ തുടര്‍ന്നു പിണങ്ങിക്കഴിഞ്ഞിരുന്ന യുവാവിന്റെ ആക്രമണത്തില്‍ ഭാര്യയ്ക്കും ഒന്നരവയസ്സുള്ള മകനും പരുക്ക്. ബീയര്‍ കുപ്പികൊണ്ടുള്ള ആക്രമണത്തില്‍ ഗുരുതരമായി പരുക്കേറ്റ യുവതിയെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കുട്ടിയുടെ കൈയില്‍ ആഴത്തില്‍ മുറിവുണ്ട്.വരേണിക്കലുള്ള ഭാര്യയുടെ വീട്ടിലെത്തിയായിരുന്നു ആക്രമണം. ആക്രമണം നടത്തിയ ചങ്ങനാശേരി വാഴപ്പള്ളി തുരുത്തി വെച്ചൂത്തറമഠം പ്രവീണ്‍ കുമാറിനും (33) പരുക്കേറ്റു. ഇയാളെ കുറത്തികാട് പൊലീസ് കസ്റ്റഡിയിലെടുത്തു.

കുറത്തികാട് വരേണിക്കല്‍ തെറ്റിക്കുഴിയില്‍ രാഖിക്കും ഒന്നരവയസ്സുള്ള മകനുമാണ് പരുക്കേറ്റത്. രാഖിയുടെ കഴുത്തിനു പിന്നിലും പുറത്തും ചെവിയിലുമായി നാലു മുറിവുകളുണ്ട്. കുപ്പിയുടെ ചീളുകള്‍ നീക്കം ചെയ്തു. അപകടനില തരണം ചെയ്തിട്ടില്ലെന്ന് ഡോക്ടര്‍മാര്‍ അറിയിച്ചു. കുട്ടിയുടെ കൈക്ക് ഉണ്ടായ മുറിവില്‍ 8 തുന്നലുണ്ട്. പ്രവീണിന്റെ വലതു കൈയിലാണു പരുക്ക്. സംഭവം നടക്കുമ്പോള്‍ രണ്ടരവയസ്സുള്ള മൂത്തമകന്‍ സമീപത്തുണ്ടായിരുന്നെങ്കിലും പരുക്കേല്‍ക്കാതെ രക്ഷപ്പെട്ടു.

ഇന്നലെ പകല്‍ 12നാണു സംഭവം. രാവിലെ 10നു വീട്ടിലെത്തിയ പ്രവീണ്‍കുമാറും രാഖിയുമായി വാക്കുതര്‍ക്കം ഉണ്ടായി. തുടര്‍ന്നു പ്രവീണ്‍കുമാര്‍ ബീയര്‍ കുപ്പി പൊട്ടിച്ചു രാഖിയെ ആക്രമിച്ചു. ഇതിനിടെ രാഖിയുടെ കയ്യിലിരുന്ന കുട്ടിയുടെ ഇടതു കൈമുട്ടിനു മുകളില്‍ ആഴത്തില്‍ മുറിവേല്‍ക്കുകയായിരുന്നു. നിലവിളി കേട്ടെത്തിയ സമീപവാസികള്‍ പ്രവീണ്‍കുമാറിനെ തടഞ്ഞുവച്ചു. രാഖിയെയും കുട്ടിയെയും ബന്ധുക്കളാണ് മാവേലിക്കര ജില്ലാ ആശുപത്രിയിലെത്തിച്ചത്.

സിമന്റ് ഇഷ്ടിക കൊണ്ടു പ്രവീണ്‍കുമാര്‍ രാഖിയെ തലയ്ക്ക് അടിച്ചതായും ബന്ധുക്കള്‍ പറഞ്ഞു. ഒരു വര്‍ഷത്തിലേറെയായി രാഖി ഭര്‍ത്താവുമായി പിണങ്ങി സ്വന്തം വീട്ടിലാണ്. കഴിഞ്ഞ 6നു രാഖിയുടെ പിറന്നാള്‍ ദിനത്തില്‍ പ്രവീണ്‍കുമാര്‍ സമ്മാനം കൊടുത്തയച്ചിരുന്നു. ഭര്‍ത്തൃഗൃഹത്തില്‍ വച്ചും രാഖിയെ മര്‍ദിച്ചിരുന്നെന്നും മുന്‍പും പ്രവീണ്‍കുമാര്‍ വീട്ടിലെത്തി വഴക്കുണ്ടാക്കിയിരുന്നെന്നും ബന്ധുക്കള്‍ പറഞ്ഞു.