ചട്ടങ്ങള്‍ കാറ്റില്‍ പറത്തി കുസാറ്റിലെ ഓണ്‍ലൈന്‍ പരീക്ഷ
കോവിഡിന്റെ പശ്ചാത്തലത്തില്‍ പരീക്ഷ ഓണ്‍ലൈനാക്കുന്നതിന്റെ ഭാഗമായി നടത്തുന്ന പരീക്ഷയില്‍ വിദ്യാര്‍ഥികള്‍ക്ക് പുസ്തകം തുറന്നുവച്ച് അവസാന സെമസ്റ്റര്‍ പരീക്ഷയെഴുതാന്‍ കൊച്ചി ശാസ്ത്രസാങ്കേതിക സര്‍വകലാശാല അവസരമൊരുക്കുന്നതായി ആക്ഷേപം.
പരീക്ഷ ആരംഭിക്കുന്നതിനു തൊട്ടുമുന്‍പ് സര്‍വകലാശാല വെബ്‌സൈറ്റില്‍ അപ്ലോഡ് ചെയ്യുന്ന ചോദ്യപേപ്പര്‍ അടിസ്ഥാനമാക്കി വിദ്യാര്‍ഥികള്‍ക്ക് വീട്ടിലിരുന്ന് ഉത്തരമെഴുതാമെന്നാണ് വ്യവസ്ഥ. അവസാനവര്‍ഷ ബിരുദ കോഴ്‌സുകളുടെ ഓണ്‍ലൈന്‍ പരീക്ഷകളാണ് കേട്ടുകേള്‍വിയില്ലാത്ത മാതൃകയില്‍ നടത്തുന്നത്.
മൂന്നുമണിക്കൂര്‍ ദൈര്‍ഘ്യമുള്ള പരീക്ഷയുടെ ചോദ്യപേപ്പര്‍ പരീക്ഷാസമയം സര്‍വകലാശാല വെബ്‌സൈറ്റില്‍ അപ്ലോഡ് ചെയ്യും. പത്തുചോദ്യങ്ങളില്‍ രണ്ടുവീതം ഒരോ അരമണിക്കൂറിലും വെബ്‌സൈറ്റില്‍ വരും. ഈ ചോദ്യങ്ങള്‍ക്കുള്ള ഉത്തരം വീട്ടിലിരുന്ന് കുട്ടികള്‍ക്കെഴുതാം. നിലവിലുള്ള പരീക്ഷ ചട്ടങ്ങള്‍ക്കെല്ലാം വിരുദ്ധമാണെങ്കിലും പരീക്ഷയെഴുതുന്ന വിദ്യാര്‍ഥികള്‍ക്കും ഒരു വിഭാഗം അധ്യാപകര്‍ക്കും ഈ തീരുമാനത്തോട് യോജിപ്പാണ്.
എ ഫോര്‍ സൈസ് പേപ്പറിന്റെ ഒരു വശത്തുവേണം ഉത്തരമെഴുതാന്‍. തുടര്‍ന്ന് ഉത്തരകടലാസുകള്‍ സ്‌കാന്‍ചെയ്ത് സര്‍വകലാശാല വെബ്‌സൈറ്റില്‍ അപ്ലോഡ് ചെയ്യണം. വിദ്യാര്‍ഥികള്‍ ഒറ്റയ്‌ക്കോ കൂട്ടായോ പുസ്തകം നോക്കിയോ പരീക്ഷയെഴുതിയാലും കണ്ടെത്താനാകില്ല.
വിദ്യാര്‍ഥികള്‍ എഴുത്തുപരീക്ഷ നോക്കിയെഴുതിയാലും വാചാപരീക്ഷ കര്‍ശനമാക്കി ക്രമക്കേടുകളെ മറികടക്കാമന്നാണ് സര്‍വകലാശാലയിലെ വിവിധ വകുപ്പുകളുടെ നിലപാട്. ലക്ഷക്കണക്കിന് വിദ്യാര്‍ഥികള്‍ക്കായി ഹയര്‍സെക്കന്‍ഡറി പത്താംക്ലാസ് പരീക്ഷകള്‍ കുറ്റമറ്റരീതിയില്‍ നടത്തിയ കേരളത്തില്‍ തന്നെയാണ് ഒട്ടും ശാസ്ത്രീയമല്ലാത്ത ഈ പരീക്ഷരീതിയുമെന്നതാണ് ശ്രദ്ധേയം.
https://www.facebook.com/Malayalivartha
