കോവിഡ് 19 വ്യാപന പശ്ചാത്തലത്തില്‍ കഴിഞ്ഞ രണ്ടര മാസമായി മിക്ക ദിവസങ്ങളിലും മുഖ്യമന്ത്രി മാധ്യമങ്ങളെ കാണുമായിരുന്നു. എന്നാല്‍ ഇനി പ്രധാന പ്രഖ്യാപനങ്ങള്‍ ഉള്ള ദിവസങ്ങളില്‍ മാത്രമേ മാധ്യമങ്ങളെ കാണൂവെന്ന് മുഖ്യമന്ത്രി പിണറായി വിജയന്‍ പറഞ്ഞു. കോവിഡ് രോഗികളുടെ എണ്ണം വ്യാപിക്കുന്ന സാഹചര്യത്തില്‍ ഇതു പറയാനായി മാധ്യമങ്ങളെ കാണേണ്ടതില്ലെന്നാണ് മുഖ്യമന്ത്രിയുടെ നിലപാട്. എന്നാല്‍, പതിവ് മന്ത്രിസഭായോഗം ബുധനാഴ്ച നടക്കുന്നതിനാല്‍ അന്ന് വൈകുന്നേരം പത്രസമ്മേളനത്തിന് സാധ്യതയുണ്ട്. പ്രവാസികളുടെ വരവ് കൂടിയതോടെ കോവിഡ് വ്യാപനവും സംസ്ഥാനത്ത് കൂടുന്നുണ്ട്. രോഗനിയന്ത്രണത്തിന്റെ ഭാഗമായി സര്‍ക്കാര്‍ ചെയ്യാവുന്നതെല്ലാം ഇതിനകം ചെയ്തു കഴിഞ്ഞു. പുതിയതായി പ്രഖ്യാപിക്കാന്‍ മാത്രമുള്ള തീരുമാനങ്ങളില്ലാത്തതും ആകാം മുഖ്യമന്ത്രിയുടെ തീരുമാനത്തിനു പിന്നില്‍. ജൂലൈ പകുതി വരെ രോഗവ്യാപനത്തോത് ഉയരുമെന്നാണു സര്‍ക്കാര്‍ കരുതുന്നത്.