ക്വാറന്റീന്‍ കേന്ദ്രത്തിലെങ്കിലും കാമുകിയുടെ ഒപ്പം കഴിയാനുള്ള അവസരത്തിനായി യുവാവിന്റെ തട്ടിക്കൊണ്ടുപോകല്‍ നാടകം! രണ്ടു പേരെയും രണ്ടിടത്ത് ക്വാറന്റീനിലാക്കി
നേപ്പാള്‍ സ്വദേശിനിയായ കാമുകിയുടെ കൂടെ ക്വാറന്റീന്‍ കേന്ദ്രത്തില്‍ ഒരുമിച്ചു താമസിക്കാന്‍ വേണ്ടി കാസര്‍കോട് സ്വദേശിയായ യുവാവിന്റെ തട്ടിക്കൊണ്ടുപോകല്‍ നാടകം.
ഞായറാഴ്ച രാവിലെ മുംബൈയില്‍ നിന്നുള്ള നേത്രാവതി എക്‌സ്പ്രസ് ട്രെയിനില്‍ നേപ്പാള്‍ സ്വദേശിനി കോഴിക്കോട് സ്റ്റേഷനില്‍ ഇറങ്ങിയതോടെയാണ് നാടകത്തിന്റെ തുടക്കം. ഗര്‍ഭിണിയായ താന്‍ ട്രെയിനില്‍ ഉറങ്ങിപ്പോയതാണെന്നും, ഭര്‍ത്താവ് കാസര്‍കോട് സ്റ്റേഷനില്‍ കാത്തുനില്‍ക്കുന്നുണ്ടെന്നും പറഞ്ഞു യുവതി ബഹളം വച്ചു. തുടര്‍ന്നു റവന്യു ഉദ്യോഗസ്ഥരും പൊലീസും ചേര്‍ന്നു ടാക്‌സി ഏര്‍പ്പാടാക്കിക്കൊടുത്തു.
ടാക്‌സി ഡ്രൈവര്‍ക്കു ഭര്‍ത്താവെന്നു പരിചയപ്പെടുത്തിയ ആള്‍ ഫോണിലൂടെ വിശദമായി വഴി പറഞ്ഞു കൊടുക്കുകയും ചെയ്തു. കാസര്‍കോട് എത്താറായപ്പോള്‍, വഴിയില്‍ രണ്ടു പേര്‍ വന്ന് യുവതിയെ കൂട്ടിക്കൊണ്ടു പോകുമെന്നു 'ഭര്‍ത്താവ്' ഫോണില്‍ അറിയിച്ചെങ്കിലും പൊലീസ് സ്റ്റേഷനില്‍ വിടാമെന്നു ഡ്രൈവര്‍ മറുപടി നല്‍കി.
എന്നാല്‍ പുത്തൂര്‍ കടവത്ത് റോഡിനടുത്തെത്തിയപ്പോള്‍ ഒരു യുവാവു കൈകാണിച്ചു കാര്‍ നിര്‍ത്തിച്ചു പെണ്‍കുട്ടിയെ ഇറക്കി. കുറച്ചു പണം കാറിനുള്ളിലേക്ക് ഇട്ട് ഇരുവരും ഓടി രക്ഷപ്പെടുകയും ചെയ്തു. ഡ്രൈവര്‍ പുറകെ ഓടിയ സമയത്തു മറ്റൊരു യുവാവെത്തി പെണ്‍കുട്ടിയുടെ ഹാന്‍ഡ് ബാഗും കൊണ്ടു പോയി. തുടര്‍ന്നു കാസര്‍കോട് ടൗണ്‍ സിഐയുടെ നേതൃത്വത്തില്‍ നടത്തിയ അന്വേഷണത്തില്‍ മൊഗ്രാല്‍ പുത്തൂര്‍ റെയില്‍പാതയുടെ സമീപത്തു നിന്നു പെണ്‍കുട്ടിയെയും യുവാവിനെയും പിടികൂടിയപ്പോഴാണു നാടകം പുറത്തായത്.
യുവാവിന്റെ കാസര്‍കോട്ടെ വീട്ടില്‍ ജോലിക്കാരിയായിരുന്നു യുവതി. ഇരുവരും തമ്മിലുള്ള ബന്ധം മനസ്സിലാക്കിയ വീട്ടുകാര്‍ യുവതിയെ പറഞ്ഞു വിട്ടതിനെ തുടര്‍ന്നാണു കാമുകീകാമുകന്മാര്‍ നാടകം ആസൂത്രണം ചെയ്തത്. മുംബൈയില്‍ നിന്നു വരുന്ന യുവതിയെ തന്റെ വീട്ടുകാര്‍ വീട്ടില്‍ കയറ്റില്ലെന്നും, സര്‍ക്കാര്‍ ഇടപെട്ട് ഇന്‍സ്റ്റിറ്റിയൂഷനല്‍ ക്വാറന്റീനില്‍ വിടുമെന്നും, അവിടെ ഒന്നിച്ചു താമസിക്കാമെന്നുമായിരുന്നു യുവാവിന്റെ കണക്കുകൂട്ടല്‍.
പൊലീസ് ഇടപെട്ടു രണ്ടു പേരെയും രണ്ടിടത്തായി ക്വാറന്റീനിലാക്കി. മുംബൈയില്‍ നിന്നു വന്ന യുവതിയുമായി അടുത്തിടപഴകിയതു കൊണ്ടാണ് യുവാവിനെയും അധികൃതര്‍ ക്വാറന്റീനിലാക്കിയത്. ക്വാറന്റീനു ശേഷം അന്വേഷണവും നിയമനടപടിയുമുണ്ടാകും.
https://www.facebook.com/Malayalivartha
