കാര്‍ യാത്രക്കാര്‍ക്ക് അത്ഭുതരക്ഷപ്പെടല്‍, ഓടിക്കൊണ്ടിരുന്ന കാറിന് മുകളിലേക്ക് കൂറ്റന്‍ മരക്കൊമ്പ് ഒടിഞ്ഞുവീണു!
മലപ്പുറം ജില്ലയില്‍, ഓടുന്ന കാറിന് മുകളില്‍ കൂറ്റന്‍ മരക്കൊമ്പ് അടര്‍ന്നുവീണ് കാറ് തകര്‍ന്നെങ്കിലും യാത്രക്കാര്‍ അത്ഭുതകരമായി രക്ഷപ്പെട്ടു. പെരിന്തല്‍മണ്ണയില്‍ നിന്ന് അലനല്ലൂരിലേക്ക് പോവുകയായിരുന്ന പാലക്കാഴി സ്വദേശികളായ നാലംഗ കുടുംബം സഞ്ചരിച്ച കാറിന് മുകളിലേക്ക് ആണ് ഇന്നലെ വൈകിട്ട് പട്ടിക്കാട്- മേലാറ്റൂര്‍ റോഡില്‍ പട്ടിക്കാട് സ്‌കൂള്‍പടിക്ക് സമീപത്ത് വച്ച് റോഡരികിലെ കൂറ്റന്‍ മാവില്‍ പടര്‍ന്നു നിന്ന ആല്‍മരക്കൊമ്പ് പൊട്ടിവീണത്.
മരക്കൊമ്പ് പതിച്ച് കാറിന്റെ വാതിലുകളും ചില്ലുകളും മേല്‍ഭാഗവും തകര്‍ന്നെങ്കിലും യാത്രക്കാര്‍ക്ക് പരുക്കില്ല. തകര്‍ന്ന കാറില്‍ നിന്ന് സ്ത്രീകള്‍ ഉള്‍പ്പെടെയുള്ളവര്‍ കാറിന്റെ ഇടത് വശത്തെ ഡോര്‍ വഴി പുറത്തിറങ്ങുകയായിരുന്നു. ഈ സമയം തൊട്ടടുത്തുള്ള വൈദ്യുതി കമ്പിയിലും മരക്കൊമ്പ് പതിച്ചതിനാല്‍ പുകച്ചുരുളുകളും ഉയര്‍ന്നു. സംഭവം കണ്ട് നാട്ടുകാര്‍ ഓടിയെത്തി.
വൈദ്യുതി വകുപ്പ് ഉദ്യോഗസ്ഥരും പെരിന്തല്‍മണ്ണയില്‍നിന്ന് അഗ്‌നിശമന സേനയും മേലാറ്റൂര്‍ പൊലീസും സ്ഥലത്ത് എത്തി. നാട്ടുകാരുടെയും പാസ്‌ക് ക്ലബ് പ്രവര്‍ത്തകരുടെയും സഹായത്തോടെ അഗ്‌നി ശമന ഉദ്യോഗസ്ഥര്‍ കാറിന് മുകളില്‍ പതിച്ച മരക്കൊമ്പുകള്‍ മെഷീന്‍ ഉപയോഗിച്ച് വെട്ടിമാറ്റി. യാത്രക്കാരെ സുരക്ഷിതമായി തൊട്ടടുത്തുള്ള വീട്ടിലേക്ക് മാറ്റിയിരുന്നു.
ഈ റൂട്ടില്‍ ഒരു മണിക്കുര്‍ ഗതാഗതം തടസ്സപ്പെട്ടു. അതേ സമയം റോഡരികിലെ മാവില്‍ പടര്‍ന്നുകയറിയ കൂറ്റന്‍ ആല്‍മരം യാത്രികര്‍ക്ക് ഭീഷണിയായി തുടരുകയാണ്. സ്‌കൂള്‍ കുട്ടികള്‍ ഉള്‍പ്പെടെ നൂറുകണക്കിന് ആളുകള്‍ കാല്‍നടയായി ഇതുവഴി പോകാറുണ്ട്. മരം മുറിച്ചു മാറ്റാന്‍ വിവിധ വകുപ്പുകളില്‍ പരാതി നല്‍കിയിട്ടും സാങ്കേതിക പ്രശ്‌നം പറഞ്ഞ് നടപടികള്‍ വൈകുകയാണെന്ന് നാട്ടുകാര്‍ പറഞ്ഞു.
https://www.facebook.com/Malayalivartha
