അമിത വൈദ്യുതി ചാര്‍ജ്; ഹൈക്കോടതി സര്‍ക്കാരിനോട് വിശദീകരണം തേടി
ലോക്ക് ഡൗണിനെത്തുടര്‍ന്ന് വൈദ്യുതിചാര്‍ജ് അമിതമായി വര്‍ദ്ധിച്ചെന്നും നിലവിലെ ദ്വൈമാസ ബില്ലിംഗിനുപകരം മാസാടിസ്ഥാനത്തില്‍ ബില്ല് തയ്യാറാക്കാന്‍ നിര്‍ദേശിക്കണമെന്നും ആവശ്യപ്പെട്ട് മൂവാറ്റുപുഴ സ്വദേശി വിനയകുമാര്‍ നല്‍കിയ ഹര്‍ജിയില്‍ ഹൈക്കോടതി സര്‍ക്കാരിനോട് വിശദീകരണം തേടി.
ഹര്‍ജി അടുത്ത ബുധനാഴ്ച വീണ്ടും പരിഗണിക്കും. മാര്‍ച്ച്‌ 24ന് ലോക്ക് ഡൗണ്‍ നിലവില്‍ വന്നതോടെ റീഡിംഗ് രേഖപ്പെടുത്തി ബില്‍ തയ്യാറാക്കുന്ന സംവിധാനം നിറുത്തിവയ്ക്കേണ്ടിവന്നിരുന്നു. തുടര്‍ന്ന് ശരാശരി ഉപഭോഗം കണക്കാക്കിയാണ് ബില്‍ തയ്യാറാക്കിയത്. 76 ദിവസങ്ങള്‍ക്ക് ശേഷമാണ് ഇപ്പോള്‍ മീറ്റര്‍ റീഡിംഗ് എടുത്തത്. ഈ ബില്ലിംഗ് രീതി ഇലക്‌ട്രിസിറ്റി റെഗുലേറ്ററി കമ്മീഷന്‍ അനുമതിയോടെയല്ലെന്നും ഹര്‍ജിയില്‍ ആരോപിക്കുന്നു. പ്രതിമാസം 250 യൂണിറ്റുവരെ ഉപയോഗിക്കുന്നവര്‍ക്ക് കുറഞ്ഞനിരക്കും (ടെലിസ്കോപ്പിക് റേറ്റ്) ഇതിനു മുകളില്‍ കൂടിയനിരക്കും ചുമത്തിയാണ് ബില്‍ നല്‍കുന്നത്. കുറച്ചു വൈദ്യുതി ഉപയോഗിക്കുന്നവര്‍ക്ക് ഗുണകരമാണെങ്കിലും ഭൂരിപക്ഷം ഗാര്‍ഹിക ഉപഭോക്താക്കള്‍ക്കും കൂടിയനിരക്ക് നല്‍കേണ്ടിവരുന്നെന്നും ഹര്‍ജിയില്‍ പറയുന്നു.
https://www.facebook.com/Malayalivartha
