പ്രധാന നഗരങ്ങളെയും ജനവാസ മേഖലകളെയും ഒഴിവാക്കി പുതിയ കോഴിക്കോട്-പാലക്കാട് ദേശീയപാത ഒരുക്കുന്നതിനുള്ള അലൈന്‍മെന്റ് തയാറായി. മലപ്പുറം, പെരിന്തല്‍മണ്ണ, കൊണ്ടോട്ടി നഗരങ്ങളെ ഒഴിവാക്കിയുള്ള 4 വരി ഗ്രീന്‍ഫീല്‍ഡ് പാത നിര്‍മിക്കുന്ന പദ്ധതിയുടെ ഫയലുകള്‍ അതിവേഗത്തില്‍ മുന്നേറുകയാണ്. പാലക്കാട് ബൈപാസില്‍നിന്നു മുണ്ടൂര്‍, കല്ലടിക്കോട്, തെന്‍കര വഴി മലപ്പുറം ജില്ലയിലെത്തുന്ന പാത തുവ്വൂര്‍, കാരക്കുന്ന്, ചെമ്രക്കാട്ടൂര്‍, വാഴക്കാട് വഴി പന്തീരാങ്കാവിലെത്തി ദേശീയപാത 66-ല്‍ ചേരുന്ന രീതിയിലാണ് അലൈന്‍മെന്റ് തയാറാക്കിയത്.

123 കിലോമീറ്റര്‍ ദൈര്‍ഘ്യമുള്ള പാത മലപ്പുറം, പാലക്കാട് ജില്ലാ ആസ്ഥാനങ്ങളില്‍ തൊടില്ല. അലൈന്‍മെന്റ് റിപ്പോര്‍ട്ട് കോഴിക്കോട്, മലപ്പുറം, പാലക്കാട് കലക്ടര്‍മാര്‍ക്കു സമര്‍പ്പിച്ചു. ഇനി ജില്ലയിലെ ജനപ്രതിനിധികള്‍ക്കു മുന്‍പിലും അവതരിപ്പിക്കും. തുടര്‍ന്നു സര്‍ക്കാരിന്റെ നിര്‍ദേശങ്ങള്‍കൂടി പരിഗണിച്ച് ദേശീയപാതാ അതോറിറ്റിയാണ് അലൈന്‍മെന്റ് സംബന്ധിച്ച അന്തിമ തീരുമാനമെടുക്കേണ്ടത്. കേന്ദ്രസര്‍ക്കാരിന്റെ ഭാരത്മാല പദ്ധതിയില്‍ ഉള്‍പ്പെടുത്തിയാണ് 51-ാം പിറന്നാള്‍ ആഘോഷിക്കുന്ന മലപ്പുറം ജില്ലയിലൂടെ കോഴിക്കോട്- പാലക്കാട് ദേശീയപാത വികസിപ്പിക്കുന്നത്.

അലൈന്‍മെന്റ് തയാറാക്കിയത് ഇതിനുള്ള സാധ്യതാപഠനം നടത്തി വിശദമായ പദ്ധതിരേഖ തയാറാക്കാന്‍ ചുമതലപ്പെടുത്തിയ കണ്‍സല്‍റ്റന്‍സിയാണ്. പുതിയ പാതയെത്തുന്നതോടെ പാലക്കാട് മലപ്പുറം രാമനാട്ടുകര പാതയ്ക്കു ദേശീയപാത പദവി നഷ്ടമാകും. നേരത്തേ മലപ്പുറം, പെരിന്തല്‍മണ്ണ, ചെര്‍പ്പുളശ്ശേരി വഴിയുള്ള പാത പരിഗണിച്ചിരുന്നെങ്കിലും ഉയര്‍ന്ന ജനസാന്ദ്രതയും സ്ഥലമേറ്റെടുക്കുന്നതിനുള്ള ബുദ്ധിമുട്ടുകളും കണക്കിലെടുത്ത് പുതിയ അലൈന്‍മെന്റ് തയാറാക്കുകയായിരുന്നു.

നിര്‍ദിഷ്ട പാലക്കാട്- കോഴിക്കോട് ദേശീയപാത എടപ്പറ്റ പഞ്ചായത്തിലെ വെള്ളിയഞ്ചേരിയില്‍ വച്ചാണു മലപ്പുറം ജില്ലയിലേക്കു കടക്കുന്നത്. ഇരിങ്ങാട്ടിരി, തുവ്വൂര്‍, ചെമ്പ്രശ്ശേരി, വെട്ടിക്കാട്ടിരി വഴി മഞ്ചേരി കാരക്കുന്നില്‍ എത്തും. തുടര്‍ന്നു ചെമ്രക്കാട്ടൂര്‍, വാഴക്കാട്, വാഴയൂര്‍ പ്രദേശങ്ങളിലൂടെ പന്തീരാങ്കാവില്‍ എത്തും.