നിലവാരമില്ലാത്ത ചില്ലുവാതില്‍, ആശുപത്രിയില്‍ എത്തിക്കാന്‍ വൈകി...വീട്ടമ്മയുടെ മരണത്തില്‍ പരാതി
പെരുമ്പാവൂര്‍ എഎം റോഡിലെ ബാങ്ക് ഓഫ് ബറോഡ ശാഖയുടെ ഭാഗത്തു നിന്നുണ്ടായ വീഴ്ച അന്വേഷിക്കണമെന്നാവശ്യപ്പെട്ടു പരാതി നല്‍കുമെന്ന് ചില്ലുവാതില്‍ പൊട്ടി ഗ്ലാസ് കഷണങ്ങള്‍ ശരീരത്തില്‍ തുളച്ചു കയറി മരിച്ച ബീനയുടെ ബന്ധുക്കള്‍ പറഞ്ഞു. കനം കുറഞ്ഞ ചില്ലിന്റെ വാതിലാണ് അപകടകാരണമെന്ന ആരോപണം ശക്തമാണ്. കനം കൂടിയ ചില്ലായിരുന്നെങ്കില്‍ തകരില്ലായിരുന്നു.
7 അടിയോളം ഉയരത്തില്‍ ഒരു കഷണം ഗ്ലാസാണു വാതിലായി ഉപയോഗിച്ചിരുന്നത്. വാതിലില്‍ ഗ്ലാസ് ഉണ്ടെന്നു തോന്നത്തക്കവിധം സ്റ്റിക്കര്‍ പതിപ്പിച്ചിരുന്നില്ല. ഡബിള്‍ ലെയര്‍ ഗ്ലാസുകളോ വാഹനങ്ങളില്‍ ഉപയോഗിക്കുന്ന ടെംപേഡ് ഗ്ലാസുകളോ ഉപയോഗിക്കേണ്ട സ്ഥാനത്തു കനം കുറഞ്ഞ പ്ലെയിന്‍ ഗ്ലാസ് ഉപയോഗിച്ചാല്‍ ഇത്തരം അപകടങ്ങളുണ്ടാകാന്‍ സാധ്യത കൂടും
സംഭവം നടന്ന് 5 മിനിറ്റിനു ശേഷമാണു ബീനയെ പുറത്തേക്കു കൊണ്ടു പോകുന്നതെന്നു സിസിടിവി ദൃശ്യങ്ങളില്‍ വ്യക്തമാണ്. അങ്ങനെ യുവതിയെ ആശുപത്രിയിലെത്തിക്കാന്‍ വൈകിയെന്നും ആരോപണമുണ്ട്. അപകടം നടന്നു 10 മിനിറ്റിനു ശേഷമാണ് 200 മീറ്റര്‍ മാത്രം അകലെയുള്ള ആശുപത്രിയില്‍ എത്തിയത്.
വീട്ടമ്മയെ ആശുപത്രിയിലെത്തിക്കാന്‍ വൈകിയെന്ന ആരോപണം അടിസ്ഥാനരഹിതമാണെന്നും 5 മിനിറ്റിനകം ബീനയെ ആശുപത്രിയിലെത്തിച്ചെന്നും അദ്ദേഹം പറഞ്ഞു. വാതിലിന്റെ ഗ്ലാസിനു കനം കുറവായിയിരുന്നു എന്ന ആരോപണം പരിശോധിക്കുമെന്നും സംഭവം ദൗര്‍ഭാഗ്യകരമാണെന്നും അന്വേഷിക്കുമെന്നും ബാങ്ക് ഓഫ് ബറോഡ റീജനല്‍ മാനേജര്‍ ബാബു രവിശങ്കര്‍ പറഞ്ഞു.
ബാങ്കിനുള്ളില്‍ ചെലാന്‍ പൂരിപ്പിച്ചു കൊണ്ടിരുന്ന ബീന (43) ഇരുചക്ര വാഹനത്തില്‍ വച്ചു മറന്ന താക്കോല്‍ എടുക്കാന്‍ ധൃതിയില്‍ പുറത്തേക്കോടുകയായിരുന്നു. അടഞ്ഞു കിടന്ന വാതിലില്‍ ശക്തിയായി ഇടിച്ചതോടെ ചില്ല് തകര്‍ന്നു ദേഹത്തു തുളഞ്ഞു കയറി. പിടഞ്ഞെഴുന്നേറ്റെങ്കിലും നെഞ്ചിലും വയറിലും തുടയിലും ഗുരുതരമായി പരുക്കേറ്റ ബീനയെ ജീവനക്കാര്‍ കസേരയില്‍ ഇരുത്തി. തുടര്‍ന്നു ബാങ്ക് ജീവനക്കാരും എഎം റോഡില്‍ പട്രോളിങ് നടത്തുകയായിരുന്ന പൊലീസും ചേര്‍ന്നു താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
4 മില്ലിമീറ്ററോ 6 മില്ലിമീറ്ററോ കനമുള്ള അനീല്‍ഡ് ഗ്ലാസുകളാകാം ബാങ്കില്‍ ഉപയോഗിച്ചത്. ഇവ ഉപയോഗിച്ച് വാതില്‍ നിര്‍മിക്കരുത്. ശക്തിയായി ഇടിച്ചാല്‍ പൊട്ടി അപകടമുണ്ടാകും. വാതിലുകള്‍, ജനലുകള്‍, ഭിത്തികള്‍, പ്ലാറ്റ്‌ഫോം തുടങ്ങിയവയ്ക്കു ടഫന്‍ഡ്, സേഫ്റ്റി ലാമിനേറ്റഡ് ഗ്ലാസുകള്‍ തന്നെ വേണം. വാതിലുകള്‍ക്കു കുറഞ്ഞത് 12 മില്ലിമീറ്റര്‍ കനമുള്ള ടഫന്‍ഡ് ഗ്ലാസോ 10 മില്ലിമീറ്റര്‍ സേഫ്റ്റി ലാമിനേറ്റഡ് ഗ്ലാസോ ഉപയോഗിച്ചാല്‍ അപകടം ഒഴിവാക്കാം. പൊട്ടിയാലും തരികളായി പൊടിയുകയേയുള്ളൂ. 20 വര്‍ഷമായി ഗ്ലാസ് ഉപയോഗിച്ചുള്ള നിര്‍മാണരംഗത്തു പ്രവര്‍ത്തിക്കുന്ന ന്യൂട്ടെക് ഇന്റര്‍നാഷനലിലെ ഐ.സിദ്ദീഖ് ബാബു പറഞ്ഞു.
https://www.facebook.com/Malayalivartha
