മൂര്‍ഖന്റെ കടിയേറ്റിട്ടും കാഴ്ചക്കാര്‍ക്കു വേണ്ടി പ്രദര്‍ശിപ്പിക്കുന്നതിനിടെ വായില്‍ നിന്നു നുരയും പതയും...കടിയേറ്റ വിവരം സുഹൃത്തിനെ വിളിച്ച് പറഞ്ഞപ്പോഴേക്കും തളര്‍ന്നു വീണു, ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. 11 വര്‍ഷമായി പാമ്പുപിടിത്ത രംഗത്തുള്ള മംഗലപുരം ശാസ്തവട്ടം റബീന മന്‍സിലില്‍ സക്കീര്‍ ഹുസൈന്‍ (30) ആണു മരിച്ചത്.ഞായര്‍ രാത്രി എട്ടരയോടെ നാവായിക്കുളം 28-ാം മൈല്‍ കാഞ്ഞിരംവിളയിലാണു സംഭവം.
കൈക്കു കടിയേറ്റെങ്കിലും കാര്യമാക്കാതെ കാഴ്ചക്കാര്‍ക്കു പാമ്ബിനെ കാട്ടിക്കൊടുക്കുന്നതിനിടെ വായില്‍ നിന്നു നുരയും പതയും വരികയായിരുന്നു.സുഹൃത്ത് മുകേഷിനെ ഫോണില്‍ വിളിച്ച് സക്കീര്‍ തന്നെ പാമ്ബുകടിയേറ്റ വിവരം പറഞ്ഞെങ്കിലും ഉടന്‍ തളര്‍ന്നു വീണു. കയ്യില്‍ നിന്നു പാമ്ബും രക്ഷപ്പെട്ടു. കൂടി നിന്നവര്‍ പാരിപ്പള്ളി മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും മരിച്ചു. സംഭവമറിഞ്ഞു സ്ഥലത്തെത്തിയ വാവ സുരേഷാണു പാമ്പിനെ വീണ്ടും പിടികൂടിയത്.