ഞായറാഴ്ച രാത്രിയണ് നാവായിക്കുളം 28-ാം മൈലില്‍ പുത്തന്‍വീട്ടില്‍ രമയുടെ വീട്ടിലെത്തി പാമ്പിനെ പിടികൂടുന്നതിനിടെ സക്കീറിന് കടിയേറ്റത്. രമയും അമ്മയുമുള്‍പ്പെടെ പ്രായമായ രണ്ട് സ്ത്രീകള്‍ മാത്രമാണ് വീട്ടിലുണ്ടായിരുന്നത്. വീടിനു പുറത്തെ പടിക്കെട്ടിനടിയിലായിരുന്നു പാമ്പിരുന്നത്. പിടിച്ച പാമ്പിനെ പ്രദര്‍ശിപ്പിക്കുന്നതിനിടെ ശ്രദ്ധ തിരിഞ്ഞതു പാമ്പ് കടിച്ചതും ഒരുമിച്ച് പിന്നീട് സക്കാര്‍ സംഭവ സ്ഥലത്തുവച്ചുതന്നെ വായില്‍നിന്ന് നുരയും പതയും വന്ന് കുഴഞ്ഞുവീഴുകയായിരുന്നു.

ഈ ഒരു സംഭവത്തെ സംബന്ധിച്ച് വിശദീകരണം നല്‍കുകയാണ് വാവ സുരേഷ്. സക്കീറിന് കടിയേല്‍ക്കാന്‍ മൂന്ന് കാരണങ്ങളാണ് വാവ സുരേഷ് പറയുന്നത്. ഒന്ന് മുറിവേറ്റ പാമ്പിന്റെ തലയില്‍ അമര്‍ത്തിപ്പിടിച്ച് പ്രദര്‍ശിപ്പിച്ചു, മറ്റൊന്ന് പാമ്പിനെ പ്രദര്‍ശിപ്പിച്ചപ്പോള്‍ ശ്രദ്ധ പാളി, മൂന്നാമത്തേത് പടം പൊഴിക്കാനുള്ള സമയത്തായിരുന്നു മൂര്‍ഖനെ പിടിച്ചത്. ഈ സമയത്ത് പാമ്പ് ആക്രമിക്കാനുള്ള സാധ്യത കൂടുതലാണെന്നും വാവ സുരേഷ് പറയുന്നു.

സക്കീറിനെ കടിച്ച മൂര്‍ഖനെ വാവ സുരേഷ് എത്തിയാണ് കൊണ്ടുപോയത്. നേരത്തേ പിടികൂടിയ മറ്റൊരു മൂര്‍ഖനുമായാണ് സക്കീര്‍ നാവായിക്കുളത്തെ വീട്ടിലെത്തിയത്. സക്കീറിനെ ആശുപത്രിയില്‍ കൊണ്ടുപോയപ്പോള്‍ രണ്ടു പാമ്പുകളെയും വീടിനുസമീപം സൂക്ഷിച്ചു. രാത്രി 9.30-ഓടെ വാവ സുരേഷ് സ്ഥലത്തെത്തി രണ്ടിനെയും കൊണ്ടുപോകുകയായിരുന്നു.

നാട്ടുകാര്‍ അറിയിച്ചതിനെത്തുടര്‍ന്ന് രാത്രി എട്ടുമണിയോടെ സക്കീര്‍ ഈ വീട്ടിലെത്തുകയായിരുന്നു. ഏകദേശം അഞ്ചു വയസ്സും നല്ല നീളവുമുള്ള മൂര്‍ഖനെ ഉടന്‍ പിടികൂടി. തറയിലിരുന്ന് നാട്ടുകാര്‍ക്കുമുന്നില്‍ പാന്പിനെ പ്രദര്‍ശിപ്പിക്കുന്നതിനിടെ പെട്ടെന്നു തിരിഞ്ഞ് സക്കീറിന്റെ വലതു കൈത്തണ്ടയില്‍ കൊത്തുകയായിരുന്നു. ലോക്ഡൗണ്‍ പാന്പുപിടിത്തക്കാരനായ സക്കീര്‍ ഹുസൈന്റെ ജീവിതത്തെയും ബാധിച്ചിരുന്നു. കിട്ടുന്ന പണം കുടുംബച്ചെലവിനു തികയാത്ത സമയം. കൂട്ടുകാരുടെ എതിര്‍പ്പിനെ അവഗണിച്ച് അവന്‍ ഞായറാഴ്ച ചെന്നിറങ്ങിയത് മരണത്തിലേക്കായിരുന്നു.

വീട്ടില്‍ക്കണ്ട മൂര്‍ഖനെ പിടിക്കാന്‍വരുമോയെന്നറിയാനാണ് സക്കീറിനെ വിളിച്ചത്. സുഹൃത്തുക്കള്‍ അവനോട് പോകരുതെന്നു പറഞ്ഞു. പോക്കറ്റിലുള്ളത് മുപ്പതുരൂപ മാത്രം. ചെലവുകാശിനായി വല്ലതും കിട്ടുമല്ലോയെന്നു പറഞ്ഞ് അവന്‍ പോയി. എട്ടുമണിയോടെ അവിടെയെത്തി. ചെന്നപാടെ പാമ്പിനെ പിടികൂടി. നിമിഷങ്ങള്‍ക്കകം പാമ്പ് കൈയില്‍ കൊത്തി. ആറുമാസംമുമ്പ് സക്കീര്‍ ശാസ്തവട്ടത്ത് വാടകവീട്ടിലേക്കു മാറിയിരുന്നു. ഭാര്യ ഹസീനയുടെ രണ്ടാമത്തെ പ്രസവം കഴിഞ്ഞിട്ട് 40 ദിവസമായേയുള്ളൂ.

മൂത്തമകള്‍ ഏഴുവയസ്സുകാരി ബാപ്പയുടെ മരണമറിയാതെ വീട്ടില്‍ ഓടിനടക്കുന്നു. ലൈറ്റ്സ് ആന്‍ഡ് സൗണ്ട് ജീവനക്കാരനായിരുന്നു. ലോക്ഡൗണ്‍ വന്നതോടെ ആ ഉപജീവനമാര്‍ഗം നഷ്ടപ്പെട്ടു. എട്ടുവര്‍ഷംമുമ്പേ സക്കീര്‍ പാമ്പുപിടിത്തം തുടങ്ങിയിരുന്നു. പാമ്പുപിടിക്കാന്‍ ചെല്ലുന്നിടത്തെ വീട്ടുകാര്‍ കുറച്ചു തുകയെങ്കിലും പാരിതോഷികമായി നല്‍കും. ജീവിതച്ചെലവിന് ആ തുകകൂടി കിട്ടുമല്ലോയെന്നായിരുന്നു ആശ്വാസം. ആ പ്രതീക്ഷയോടെയാണ് രാത്രി നാവായിക്കുളത്തേക്കു പോയതും.