കോട്ടയം ജില്ലാ പൊലീസ് മേധാവിയുടെ സ്പെഷ്യല്‍ സ്‌ക്വാഡും കടുത്തുരുത്തി പൊലീസും ചേര്‍ന്ന് നാഷണല്‍ പെര്‍മിറ്റ് ലോറിയില്‍ കടത്തിക്കൊണ്ടു വന്ന അറുപത് കിലോ കഞ്ചാവുമായി രണ്ടു പേരെ പിടികൂടി. നാഷണല്‍ പെര്‍മിറ്റ് ലോറിയുടെ രഹസ്യ അറയില്‍ സൂക്ഷിച്ചിരുന്ന കഞ്ചാവാണ് അര്‍ദ്ധരാത്രിയില്‍ പൊലീസ് സംഘം പിടികൂടിയത്.

സംഭവവുമായി ബന്ധപ്പെട്ട് പേരൂര്‍ ആലഞ്ചേരി തെള്ളകം കളപ്പുരയ്ക്കല്‍ വീട്ടില്‍ ജോസ് (40), തലയാഴം തോട്ടകം തലപ്പുള്ളില്‍ ഗോപു (27) എന്നിവരെയാണ് ജില്ലാ പൊലീസ് മേധാവി ജി.ജയദേവിന്റെ നേതൃത്വത്തിലുള്ള സംഘം പിടികൂടിയത്.

ബുധനാഴ്ച പുലര്‍ച്ചെ രണ്ടു മണിയോടെയാണ് കുറുപ്പന്തറ മാര്‍ക്കറ്റിനു സമീപത്തു വച്ച് ലോറിയില്‍ നിന്നും കഞ്ചാവ് പിടിച്ചെടുത്തത്. ആന്ധ്രയില്‍ നിന്നും ആര്‍പ്പൂക്കരയിലെ ഗുണ്ടാ സംഘങ്ങള്‍ക്കു വന്‍ തോതില്‍ കഞ്ചാവ് എത്തുന്നതായി വൈക്കം ഡിവൈ.എസ്.പി സനില്‍കുമാറിനു രഹസ്യ വിവരം ലഭിച്ചിരുന്നു.

ഇതേ തുടര്‍ന്നു ദിവസങ്ങളായി കടുത്തുരുത്തി പൊലീസിന്റെ നേതൃത്വത്തില്‍ പ്രദേശത്ത് രഹസ്യ നിരീക്ഷണം നടത്തി വരികയായിരുന്നു. ഇതിനിടെയാണ് ആന്ധ്രയിലേയ്ക്കു പൈനാപ്പിളുമായി പോയ ശേഷം മടങ്ങിയെത്തിയ നാഷണല്‍ പെര്‍മിറ്റ് ലോറിയുടെ രഹസ്യ അറയില്‍ കഞ്ചാവ് സൂക്ഷിച്ചിരിക്കുന്നതായി പൊലീസ് സംഘത്തിനു രഹസ്യ വിവരം ലഭിച്ചത്.

തുടര്‍ന്നു കടുത്തുരുത്തി സ്റ്റേഷന്‍ ഹൗസ് ഓഫിസര്‍ ഇന്‍സ്പെക്ടര്‍ സി.എസ് ബിനു, എസ്.ഐ ടി.എസ് റെനീഷിന്റെ നേതൃത്വത്തില്‍ ജില്ലാ പൊലീസിന്റെ സ്പെഷ്യല്‍ സ്‌ക്വാഡ് അംഗങ്ങളായ ഗ്രേഡ് എസ്.ഐ വിജയപ്രസാദ്, എ.എസ്.ഐ സിനോയ്, സിവില്‍ പൊലീസ് ഓഫിസര്‍ അനീഷ്, രാഗേഷ് എന്നിവരുടെ നേതൃത്വത്തിലുള്ള സംഘം കുറുപ്പന്തറ മാര്‍ക്കറ്റില്‍ പരിശോധന നടത്തിയത്. ഇതോടെയാണ് നാഷണല്‍ പെര്‍മിറ്റ് ലോറിയുടെ രഹസ്യ അറയില്‍ നിന്നും കഞ്ചാവ് പിടിച്ചെടുത്തത്.

ആന്ധ്രയില്‍ നിന്നുള്ള മലയാളി യുവാക്കളാണ് രണ്ടു കിലോ വീതമുള്ള മുപ്പത് പാഴ്സലുകളിലായി കഞ്ചാവ് കടത്തിക്കൊണ്ടു വന്നത്. അതിരമ്പുഴ, ആര്‍പ്പൂക്കര പ്രദേശങ്ങളിലെ ഗുണ്ടകള്‍ക്കായി എത്തിച്ചതാണ് കഞ്ചാവ് എന്നാണ് പൊലീസിനു ലഭിച്ച വിവരം. ഈ പ്രതികള്‍ക്കായി പൊലീസ് സംഘം അന്വേഷണം ആരംഭിച്ചിട്ടുണ്ട്. കഞ്ചാവുമായി എത്തിയ ലോറിയിലെ ജീവനക്കാരായ രണ്ടു പേരെയും കോടതിയില്‍ ഹാജരാക്കി റിമാന്‍ഡ് ചെയ്യും.