കവളപ്പാറയിലെ ഉരുള്‍പൊട്ടലില്‍ വീടും സ്ഥലവും നഷ്ടപ്പെട്ട ആദിവാസി കുടുംബങ്ങള്‍ക്ക് മാതൃകാഗ്രാമം ഒരുക്കുമെന്ന ഒരു വര്‍ഷത്തോളം പഴക്കമുള്ള പ്രഖ്യാപനത്തില്‍ നിന്നും സര്‍ക്കാര്‍ പിന്‍മാറി. പകരം, സ്ഥലം വാങ്ങി വീടുവയ്ക്കാന്‍ ആദിവാസികള്‍ ഉള്‍പ്പെടെ കവളപ്പാറയിലെ 53 കുടുംബങ്ങള്‍ക്ക് 10 ലക്ഷം രൂപ വീതം അനുവദിക്കും. ഇന്നലെ മന്ത്രി കെ.ടി.ജലീലിന്റെ അധ്യക്ഷതയില്‍ ചേര്‍ന്ന യോഗത്തിലാണ് തീരുമാനം.

10 ലക്ഷം രൂപ അനുവദിച്ചാല്‍ ഭൂമി സ്വയം കണ്ടെത്താന്‍ സന്നദ്ധരാണെന്നു കവളപ്പാറ കോളനിയിലെ ഊരുമൂപ്പന്‍ ചാത്തന്‍ ഇന്നലത്തെ യോഗത്തില്‍ അറിയിച്ചിരുന്നു. എന്നാല്‍ 10 മാസത്തിലേറെ പദ്ധതികള്‍ക്കായി കാത്തിരുന്നു മടുത്തതിനാലാണു സര്‍ക്കാരിന്റെ സഹായധന വാഗ്ദാനം സ്വീകരിച്ചതെന്നാണു ചാത്തന്റെ വിശദീകരണം.

കവളപ്പാറ കോളനിയിലെ 29 ആദിവാസി കുടുംബങ്ങള്‍ക്കുള്ള മാതൃകാ ഗ്രാമത്തിനായി 2 തവണ ഭൂമി വാങ്ങാന്‍ വിജ്ഞാപനം പുറപ്പെടുവിച്ച സര്‍ക്കാരാണ് ഒടുവില്‍ പദ്ധതികളില്‍നിന്നു പിന്തിരിഞ്ഞത്. ആദിവാസികള്‍ക്കായുള്ള ഭവനനിര്‍മാണ പദ്ധതികള്‍ ഉപേക്ഷിച്ചെങ്കിലും ദുരിതാശ്വാസം അടിയന്തരമായി നല്‍കാനുള്ള തീരുമാനം കവളപ്പാറയിലെ മറ്റു ദുരിതബാധിതര്‍ക്ക് ആശ്വാസമാണ്.

പ്രളയത്തില്‍ വീടും സ്ഥലവും നഷ്ടപ്പെട്ടവര്‍ക്ക് നാളിതുവരെയായിട്ടും സര്‍ക്കാരിന്റെ സഹായം ലഭിച്ചിരുന്നില്ല. ഇതിനെതിരെ പ്രതിഷേധം വ്യാപകമായ സാഹചര്യത്തിലാണ് ഇന്നലെ മന്ത്രിയുടെ അധ്യക്ഷതയില്‍ യോഗം വിളിച്ചത്. എന്നാല്‍ പ്രളയത്തില്‍ വീടും സ്ഥലവും നഷ്ടപ്പെട്ടവര്‍ക്കു സംസ്ഥാന സര്‍ക്കാര്‍ പ്രഖ്യാപിച്ച സഹായ വാഗ്ദാനങ്ങളുടെ പുതുക്കല്‍ മാത്രമാണ് ഇന്നലെ നടന്നതെന്നു ആക്ഷേപമുയര്‍ന്നിട്ടുണ്ട്.