കോവിഡ് ടെസ്റ്റിന്റെ കാര്യത്തില്‍ വി.മുരളീധരന്‍ സ്വന്തം വാക്കുകള്‍ വിഴുങ്ങുകയാണെന്ന് മുഖ്യമന്ത്രി പിണറായി വിജയന്‍. പ്രവാസികള്‍ക്ക് കോവിഡ് ടെസ്റ്റ് നടത്തുമെന്ന് മേയ് അഞ്ചിന് മുരളീധരന്‍ പറഞ്ഞിരുന്നു. രോഗികളെ രോഗമില്ലാത്തവര്‍ക്കൊപ്പം കൊണ്ടുവരില്ലെന്നും നിലപാടെടുത്തിരുന്നു. രോഗമുള്ളവരെ അവിടെ തന്നെ ചികിത്സിക്കുന്നതാണ് നല്ലതെന്നായിരുന്നു കേന്ദ്ര മന്ത്രിയുടെ നിലപാട്. ഇതേ കേന്ദ്രമന്ത്രിയാണ് ഇപ്പോള്‍ കേരളം കോവിഡ് ടെസ്റ്റ് ആവശ്യപ്പെടുന്നതിനെ എതിര്‍ക്കുന്നത്. മഹാദുരന്തത്തിന്റെ കാലത്ത് ജനങ്ങളുടെ ജീവന്‍വച്ച് രാഷ്ട്രീയം കളിക്കരുതെന്നും പിണറായി വിജയന്‍ പറഞ്ഞു.

കോവിഡ് ബാധിച്ച പ്രവാസികളെ കേരളം രണ്ടുകൈയ്യും നീട്ടി സ്വീകരിക്കുമെന്നും മുഖ്യമന്ത്രി വ്യക്തമാക്കി. കോവിഡ് ബാധിച്ച പ്രവാസികള്‍ക്കുവേണ്ടി കേന്ദ്രം പ്രത്യേകവിമാനം ഏര്‍പ്പെടുത്തണമെന്നും അദ്ദേഹം ആവശ്യപ്പെട്ടു.
രോഗമുള്ളര്‍ അവിടത്തന്നെ കഴിയട്ടെ എന്നു സംസ്ഥാനത്തിനു നിലപാടില്ല. രോഗമുള്ളവരെയും ഇല്ലാത്തവരേയും ഒരുമിച്ചു കൊണ്ടുവരാന്‍ സാധിക്കില്ല. രോഗമുള്ളവര്‍ വിദേശത്തു തന്നെ കഴിയട്ടെ എന്ന നിലപാട് ഒരു ഘട്ടത്തിലും സംസ്ഥാനം പറഞ്ഞിട്ടില്ല.