അന്ത്യചുംബനം നൽകാനോ ഒന്നു തൊടാനോ കഴിയാതെ ക്വാറന്റീൻ മുറിയിലിരുന്ന് അഖില പ്രിയപ്പെട്ട അമ്മയ്ക്ക് കണ്ണീരോടെ വിട നൽകി. തറവാട്ടുവീടിന്റെ രണ്ടാം നിലയിലെ ജനാലയിലൂടെ അഖില അമ്മയെ അവസാനമായി കണ്ടു.ബാങ്കിന്റെ ചില്ലുവാതിൽ തകർന്നു മരിച്ച ചേരാനല്ലൂർ മങ്കുഴി തേലക്കാട്ട് നോബിയുടെ ഭാര്യ ബീനയ്ക്ക് (43) നാടിന്റെ അന്ത്യാഞ്ജലി. മംഗളൂരുവിൽ നഴ്സായ മകൾ അഖില അപകടവാർത്ത അറിഞ്ഞു നാട്ടിലെത്തിയ ചൊവ്വാഴ്ച മുതൽ വീടിനു സമീപം തറവാട്ടു വീട്ടിൽ ക്വാറന്റീനിലാണ്. ചൊവ്വാഴ്ച വൈകിട്ട് പോസ്റ്റ്മോർട്ടത്തിനു ശേഷം കൊണ്ടുവന്നപ്പോഴും മൃതദേഹം തറവാട്ടു വീട്ടിലെത്തിച്ച് അഖിലയെ കാണിച്ചിരുന്നു.

സംസ്കാരം നടത്തിയ മങ്കുഴി തിരുകുടുംബ ദേവാലയത്തിലേക്ക് ഇന്നലെ രാവിലെ 10ന് മൃതദേഹം വിലാപയാത്രയായി കൊണ്ടുപോകുമ്പോഴും അഖിലയെ കാണിച്ചു.നോബി–ബീന ദമ്പതികളുടെ 25–ാം വിവാഹവാർഷികദിനത്തിലാണ് ബീനയുടെ സംസ്കാരമെന്നതും യാദൃച്ഛികം. 1995 ജൂൺ 17നായിരുന്നു അങ്കമാലി വേങ്ങൂർ മേനാച്ചേരി കുടുംബാംഗമായ ബീനയെ നോബി വിവാഹം കഴിച്ചത്. ചൊവ്വാഴ്ച വൈകിട്ട് വീട്ടിലെത്തിച്ച മൃതദേഹത്തിൽ ബെന്നി ബഹനാൻ എംപി, എംഎൽഎമാരായ എൽദോസ് കുന്നപ്പിള്ളി, റോജി എം.ജോൺ, എൽദോ ഏബ്രഹാം തുടങ്ങിയവരടക്കം ഒട്ടേറെപ്പേർ ആദരാഞ്ജലി അർപ്പിച്ചു. ഇന്നലെ രാവിലെ 10.30ന് തിരുകുടുംബ ദേവാലയത്തിൽ സംസ്കരിച്ചു.
കഴിഞ്ഞ ദിവസമാണ് ബാങ്ക് ഓഫ് ബറോഡ പെരുമ്പാവൂർ ശാഖയിൽ ദാരുണ സംഭവം ഉണ്ടായത്. എറണാകുളം റൂറൽ ജില്ലാ പോലീസ് മേധാവിയും പെരുമ്പാവൂർ നഗരസഭ സെക്രട്ടറിയും അന്വേഷണം നടത്തി മൂന്നാഴ്ചക്കകം റിപ്പോർട്ട് സമർപ്പിക്കണമെന്ന് കമ്മീഷൻ അധ്യക്ഷൻ ജസ്റ്റിസ് ആന്റണി ഡൊമിനിക് ആവശ്യപ്പെട്ടു.

ബാങ്കിലെ ഗ്ലാസ് ഡോറിന് കട്ടി കുറവാണെന്നാണ് ആരോപണം. കനം കുറഞ്ഞ ചില്ലിന്റെ വാതിൽ അപകടത്തിന് കാരണമായെന്നും വാതിലിൽ ഗ്ലാസ് ഉണ്ടെന്ന് തോന്നുന്ന രീതിയിൽ സ്റ്റിക്കർ പതിപ്പിച്ചിരുന്നില്ലെന്നും ബന്ധുക്കൾ ആരോപിക്കുന്നു. അപകടം നടന്നയുടൻ ആശുപത്രിയിൽ എത്തിക്കാൻ വൈകി എന്ന ആരോപണവും ബന്ധുക്കൾ ഉന്നയിച്ചു. സംഭവത്തിൽ ബന്ധുക്കൾ അന്വേഷണം ആവശ്യപെട്ടിട്ടുണ്ട്.നിലവാരമില്ലാത്ത ചില്ലുവാതിൽ സ്ഥാപിച്ചതിൽ ബാങ്ക് ഓഫ് ബറോഡ ശാഖയുടെ ഭാഗത്തു നിന്നുണ്ടായ വീഴ്ച അന്വേഷിക്കണമെന്നാവശ്യപ്പെട്ടു പരാതി നൽകുമെന്ന് ചില്ലുവാതിൽ പൊട്ടി ഗ്ലാസ് കഷണങ്ങൾ ശരീരത്തിൽ തുളച്ചു കയറി മരിച്ച ബീനയുടെ ബന്ധുക്കൾ പറഞ്ഞു. കനം കുറഞ്ഞ ചില്ലിന്റെ വാതിലാണ് അപകടകാരണമെന്ന ആരോപണം ശക്തമാണ്. കനം കൂടിയ ചില്ലായിരുന്നെങ്കിൽ തകരില്ലായിരുന്നു. വാതിലിൽ ഗ്ലാസ് ഉണ്ടെന്നു തോന്നത്തക്കവിധം സ്റ്റിക്കർ പതിപ്പിച്ചിരുന്നില്ല. 7 അടിയോളം ഉയരത്തിൽ ഒരു കഷണം ഗ്ലാസാണു വാതിലായി ഉപയോഗിച്ചിരുന്നത്. ഡബിൾ ലെയർ ഗ്ലാസുകളോ വാഹനങ്ങളിൽ ഉപയോഗിക്കുന്ന ടെംപേഡ് ഗ്ലാസുകളോ ഉപയോഗിക്കേണ്ട സ്ഥാനത്തു കനം കുറഞ്ഞ പ്ലെയിൻ ഗ്ലാസ് ഉപയോഗിച്ചാൽ ഇത്തരം അപകടങ്ങളുണ്ടാകാൻ സാധ്യത കൂടും .

യുവതിയെ ആശുപത്രിയിലെത്തിക്കാൻ വൈകിയെന്നും ആരോപണമുണ്ട്. അപകടം നടന്നു 10 മിനിറ്റിനു ശേഷമാണ് 200 മീറ്റർ മാത്രം അകലെയുള്ള ആശുപത്രിയിൽ എത്തിച്ചത്. സംഭവം നടന്ന് 5 മിനിറ്റിനു ശേഷമാണു ബീനയെ പുറത്തേക്കു കൊണ്ടു പോകുന്നതെന്നു സിസിടിവി ദൃശ്യങ്ങളിൽ വ്യക്തമാണ്.