തോട്ടപ്പള്ളി പൊഴിമുഖത്തുനിന്ന് കരിമണല്‍ കൊണ്ടുപോകുന്നത് താല്‍ക്കാലികമായി തടഞ്ഞ് ഹൈക്കോടതി
തോട്ടപ്പള്ളി പൊഴിമുഖത്തുനിന്ന് കരിമണല്‍ കൊണ്ടുപോകുന്നത് താല്‍ക്കാലികമായി തടഞ്ഞ് ഹൈക്കോടതി. പുറക്കാട് പഞ്ചായത്ത് സ്‌റ്റോപ് മെമ്മോ നല്‍കിയ സാഹചര്യത്തില്‍ മണല്‍ നീക്കം നിര്‍ത്തണമെന്ന് ജസ്റ്റിസ് അലക്‌സാണ്ടര്‍ നിര്‍ദേശിച്ചു.പൊഴിമുഖത്തെ മണല്‍ നീക്കം ചോദ്യംചെയ്ത് തോട്ടപ്പള്ളി സ്വദേശി എം.എച്ച്. വിജയന്‍ നല്‍കിയ ഹരജിയാണ് കോടതി പരിഗണിച്ചത്.
കേന്ദ്ര ആണവോര്‍ജ വകുപ്പിനെ കേസില്‍ കക്ഷിചേര്‍ത്തു. സര്‍ക്കാറിനോടും കെ.എം.എം.എല്ലിനോട് കോടതി വിശദീകരണം തേടി.കനാല്‍ വീതി കൂട്ടുന്നതിന് എതിരല്ലെന്നും ആണവ ധാതുമണല്‍ ഗണത്തില്‍പെടുന്ന കരിമണല്‍ കൊണ്ടുപോകാന്‍ പരിസ്ഥിതി അനുമതി ആവശ്യമാണെന്നുമായിരുന്നു ഹരജിക്കാരുടെ വാദം.
അനിയന്ത്രിത മണല്‍ ഖനനം കടപ്പുറത്തെയും പൊഴിമുഖത്തെയും സമീപപ്രദേശങ്ങളെയും ബാധിക്കും. പൊഴിമണല്‍ കടത്തിന് മൈന്‍സ് ആന്‍ഡ് മിനറല്‍സ് (ഡെവലപ്മന്റെ് ആന്‍ഡ് റെഗുലേഷന്‍) നിയമവും അറ്റോമിക് മിനറല്‍ കണ്‍സെഷന്‍ ചട്ടവും ബാധകമാണെന്നും ഹരജിക്കാര്‍ ചൂണ്ടിക്കാട്ടി. കുട്ടനാട്ടിലെ വെള്ളപ്പൊക്കം ഒഴിവാക്കാന്‍ സ്വാമിനാഥന്‍ കമീഷന്‍ റിപ്പോര്‍ട്ട് പ്രകാരം ദുരന്ത നിവാരണ നടപടികളുടെ ഭാഗമായി ചെയ്യുന്നതാണെന്നും പഞ്ചായത്തിന് ഇടപെടാനാവില്ലെന്നുമാണ് സര്‍ക്കാറിന്റെ വാദം.
https://www.facebook.com/Malayalivartha
