രണ്ട് കിലോ വരുന്ന ഒരു പൊതി കഞ്ചാവിന് നൽകുന്ന പേരാണ് പാഴ്സൽ എന്ന്. ഏറ്റുമാനൂരിൽ അമ്മായിയമ്മയെ ചവിട്ടിക്കൊലപ്പെടുത്തിയ കേസിലെ പ്രതിയാണ് ആന്ധ്രയിലിരുന്ന് ജില്ലയിലേയ്ക്കു കഞ്ചാവിന്റെ വരവ് നിയന്ത്രിക്കുന്നത്. നിരവധി ക്രിമിനൽക്കേസുകളിൽ പ്രതിയായ ഇയാളെ നിയന്ത്രിക്കാൻ പൊലീസിനോ എക്സൈസിനോ സാധിക്കുന്നുമില്ല.

രണ്ടു കിലോ വരുന്ന ഒരു പാഴ്സലിന് 3000 മുതൽ 4000 രൂപ വരെയാണ് ആന്ധ്രയിൽ വിലയാകുന്നത്. ഈ കഞ്ചാവ് നാട്ടിലെത്തുമ്പോൾ കിലോയ്ക്കു പതിനായിരം രൂപയ്ക്കു മുകളിൽ വില വരും. കൊറോണക്കാലമായതോടെ ലോക്ക് ഡൗണിൽപ്പെട്ട് കഞ്ചാവിന്റെ വിലയും ഇരട്ടിയായി വർദ്ധിച്ചു. കടുത്തുരുത്തിയിൽ പിടികൂടിയ 60 കിലോ കഞ്ചാവിന് മുപ്പത് ലക്ഷം രൂപയെങ്കിലും ചില്ലറ വിപണിയിൽ വില ലഭിക്കുമെന്നാണ് വിലയിരുത്തൽ.

ആന്ധ്രയിൽ നിന്നും കയറ്റി വിടുന്ന കഞ്ചാവ് ജില്ലയിൽ എത്തണമെങ്കിൽ ആദ്യം പണം അക്കൗണ്ടിൽ എത്തണം. ഏറ്റുമാനൂരുകാരനായ കഞ്ചാവ് മാഫിയ തവന്റെ അക്കൗണ്ടിൽ മുഴുവൻ പണവും ഇട്ടു നൽകിയെങ്കിൽ മാത്രമേ ആന്ധ്രയിൽ നിന്നും പാഴ്സലുമായി വണ്ടി പുറപ്പെടൂ. ഈ കഞ്ചാവ് കച്ചവടക്കാരന് സംസ്ഥാനത്തെ എല്ലാ ജില്ലയിലും ഏജന്റുമാരുണ്ട്. നാഷണൽ പെർമിറ്റ് ലോറികളിലാണ് ഇയാൾ കഞ്ചാവ് കേരളത്തിലേയ്ക്കു കടത്തുന്നത്. രണ്ടു കിലോ വീതമുള്ള പാഴ്സലുകൾ ഓരോ ജില്ലയിലേയ്ക്കും വീതം വച്ചു നൽകിയിരിക്കും. അതത് ജില്ലയിലെ മൊത്ത വിതരണക്കാരന് ഈ മാഫിയ സംഘത്തലവൻ കഞ്ചാവ് എത്തിച്ചു നൽകുന്നത് മുൻകൂർ പണം കൈപ്പറ്റിയാണ്. ഇവിടെ നിന്നും പാഴ്സൽ വിഭജിച്ച് ചില്ലറ വിൽപ്പനക്കാരന് കൈമാറും. ആന്ധ്രയിൽ നിന്നും ലോഡ് പുറപ്പെടും മുൻപ് തന്നെ ചില്ലറ വിൽപ്പനക്കാരനും ആവശ്യത്തിനുള്ള തുക മൊത്തവിതരണക്കാരന് കൈമാറിയിരിക്കണം. ഈ ചില്ലറ വിൽപ്പനക്കാരാണ് ചെറുപൊതികളാക്കി കഞ്ചാവ് വിൽപ്പന നടത്തുന്നത്. ആഴ്ചയിൽ ആയിരം കിലോ വരെ കഞ്ചാവാണ് ആന്ധ്രയിൽ നിന്നും ഈ മാഫിയതലവനായ ക്രിമിനൽ കയറ്റി അയക്കുന്നത്. പൊലീസിനെയും എക്സൈസിനെയും കബളിപ്പിക്കാൻ ഇടയ്ക്കിടെ സംസ്ഥാനത്തിന്റെ വിവിധ ഭാഗങ്ങളിൽ ഇയാൾ കഞ്ചാവ് കേസുകൾ ഇട്ടു നൽകുകയും ചെയ്യും.

ആന്ധ്രയിൽ നിന്നും കഞ്ചാവ് എത്തിച്ചു നൽകാമെന്നു വാഗ്ദാനം ചെയ്തു കച്ചവടക്കാരിൽ നിന്നും 15 ലക്ഷം രൂപ വാങ്ങിയെടുത്ത കൊലക്കേസ് പ്രതിയായ ഗുണ്ടാ സംഘത്തലവൻ പകരം നൽകിയത് പുളിയില നിറച്ച പാഴ്സൽ....! ലോക്ക് ഡൗണിനിടെ ജില്ലയിലെ വിവിധ സ്ഥലങ്ങളിലുള്ള 15 കഞ്ചാവ് കച്ചവടക്കാരിൽ നിന്നായി ഓരോ ലക്ഷം രൂപ വീതം വാങ്ങിയ ഗുണ്ടാ സംഘത്തലവനാണ് പകരം പുളിയില നൽകിയത്. ഒരു ലക്ഷം രൂപയ്ക്കുള്ള കഞ്ചാവ് എത്തിച്ചു നൽകാമെന്ന ധാരണയിലാണ് ഇയാൾ മൊത്തവിതരണക്കാരിൽ നിന്നും പണം വാങ്ങിയത്. ഓരോ ലക്ഷം രൂപ വീതം നൽകിയ ഇവർ കഞ്ചാവിനായി കാത്തിരിക്കുന്നതിനിടെ, ഗുണ്ടാ സംഘത്തലവൻ അയച്ചതാണെന്നറിയിച്ച് കാറിൽ ഒരു യുവാവ് പാഞ്ഞെത്തി, മിന്നൽ വേഗത്തിൽ പാഴ്സൽ കൈമാറി പാഞ്ഞു. കഞ്ചാവ് വിതരണം ചെയ്യാനായി ഇടപാടുകാരൻ പൊതി അഴിച്ചപ്പോൾ കിട്ടിയത് പുളിയില. പോക്കറ്റിലിരുന്ന പണം പോയതിനെപ്പറ്റി ചോദിക്കാനെത്തിയ ഇടപാടുകാരെ തോക്ക് കാട്ടി വിരട്ടി ഗുണ്ടാ നേതാവ് ഓടിച്ചതോടെ പണവും പോയി കഞ്ചാവും പോയതായാണ് ഇടപാടുകാരുടെ പരാതി.