ക്വാറി മാഫിയയുമായി ചേര്‍ന്ന് കോടികളുടെ അഴിമതി നടത്തിയ ഉദ്യോഗസ്ഥന്‍ വകുപ്പിന്റെ ഡയറക്ടര്‍ സ്ഥാനത്ത്. സീനിയര്‍ ജിയോളജിസ്റ്റ് തലം മുതല്‍ അഴിമതി നടത്തിയ ഉദ്യോഗസ്ഥന്‍ ഇന്ന് വ്യവസായ വകുപ്പിന് കീഴിലുള്ള മൈനിംഗ് ആന്റ് ജിയോളജി വകുപ്പ് ഡയറക്ടര്‍ ഇന്‍ ചാര്‍ജ്. ഡോ. സി.കെ ബൈജുവാണ് രാഷട്രീയ നേതൃത്വം സംരക്ഷിക്കുന്ന ഈ അഴിമതിക്കാരനായ ഉദ്യോഗസ്ഥന്‍. ഐ.എ.എസ് ഉദ്യോഗസ്ഥര്‍ നേതൃത്വം നല്‍കേണ്ട ഡയറക്ടര്‍ സ്ഥാനത്തേക്കാണ് സിവില്‍ സര്‍വീസുകാരനല്ലാത്ത ഈ ഉദ്യോഗസ്ഥന്‍ ഇപ്പോള്‍ എത്തി നില്‍ക്കുന്നുവെന്നുള്ളതും ശ്രദ്ധേയമാണ്. കേരള കേഡറില്‍ ഐ.എസ്.എസ് ഉദ്യോഗസ്ഥരുടെ അഭാവമുള്ളതുകൊണ്ടാണ് സീനിയര്‍ ഡെപ്യൂട്ടി ഡയറക്ടറായ സി.കെ ബൈജുവിനെ ഡയറക്ടറുടെ പൂര്‍ണ ചുമതലയുള്ള ഡയറക്ടര്‍ ഇന്‍ ചാര്‍ജായി നിയമിച്ചതെന്നാണ് മാര്‍ച്ച് 20 ന് ഇറങ്ങിയ സര്‍ക്കാര്‍ ഉത്തരവില്‍ വ്യക്തമാക്കുന്നത്.
എറണാകുളം, കോട്ടയം, ഇടുക്കി ജില്ലകളില്‍ സീനിയര്‍ ജിയോളിസ്റ്റായി പ്രവര്‍ത്തിച്ചിരുന്ന കാലഘട്ടത്തില്‍ ക്വാറി മാഫിയുമായി ചേര്‍ന്ന് കോടിക്കണക്കിന് രൂപയുടെ അഴിമതിയാണ് ഈ ഉദ്യോഗസ്ഥന്‍ നടത്തിയത്. വിജിലന്‍സിലും ലോകയുക്തയിലുമായി ഇയാള്‍ക്കെതിരെ നിരവധി കേസുകളാണുളളത്. ഇതില്‍ വിജിലന്‍സ് കുറ്റക്കാരനാണെന്നും കണ്ടെത്തിയ കേസുമുണ്ട്. കോട്ടയത്ത് ജിയോളജിസ്റ്റായിരുന്ന 2012-13 കാലഘട്ടത്തില്‍ ജോബി മാത്യു എന്നയാള്‍ക്ക് ക്വാറിയിംഗ് പെര്‍മിറ്റ് അനുവദിച്ചതിലും രാമപുരത്ത് പാറ ഖനനത്തിന് ശേഷം പാറ കൊണ്ടു പോകുന്നതിനുള്ള പാസ് അനുവദിക്കുന്നതിലും ഉള്‍പ്പെടെ സി.കെ ബൈജുവിനെതിരെ കേസില്‍ ഇയാള്‍ കുറ്റക്കാരനാണെന്നും കണ്ടെത്തിയിരുന്നു.
2017 യിലാണ് ഇയാള്‍ ഡെപ്യൂട്ടി ഡയറക്ടറായി തിരുവനന്തപുരത്തേക്ക് എത്തുന്നത്. അതിന് ശേഷം തിരുവനന്തപുരത്തെ ഇയാളുടെ വീട്ടില്‍ വിജിലന്‍സ് നടത്തിയ റെയ്ഡില്‍ കണക്കില്‍പ്പെടാത്ത 35 ലക്ഷം രൂപ കണ്ടെത്തുകയും ചെയ്തിരുന്നു. എന്നാല്‍ ഇതൊന്നും ഇദ്ദേഹത്തിന്റെ നിയമനത്തെ ബാധിച്ചില്ല. ആ സാഹചര്യത്തില്‍ അന്ന് വട്ടിയൂര്‍ക്കാവ് എം.എല്‍.എയായിരുന്ന കെ.മുരളീധാരന്‍ ഇയാള്‍ക്കെതിരെ നടപടിയെടുക്കമെന്നാവശ്യപ്പെട്ട് മുഖ്യമന്ത്രിക്ക് കത്തു നല്‍കുകയും തുടര്‍ന്ന് നടപടി സ്വീകരിക്കുകയും ചെയ്തിരുന്നു. എന്നാല്‍ ഇപ്പോള്‍ ഡെപ്യൂട്ടി ഡയറക്ടര്‍ തസ്തികയില്‍ നിന്നും ഡയറക്ടര്‍ ഇന്‍ ചാര്‍ജിലെ തസ്തിക കയറ്റവും ഇയാള്‍ക്ക് ലഭിച്ചിരിക്കുന്നത്. കഴിഞ്ഞ നിയമസഭാ സമ്മേളനത്തില്‍ വയനാട്ടില്‍ നിന്നുള്ള ഐ.സി ബാകൃഷ്ണന്‍ എം.എല്‍.എ വിജിലന്‍സ് അന്വേഷണം നേരിടുകയും ശിക്ഷിക്കപ്പെടുകയും ചെയ്ത അനധികൃത സ്വന്ത് സമ്പാദനത്തിന് വിജിലന്‍സ് കുറ്റക്കാരനാണെന്ന് കണ്ടെത്തിയയൊരാളെ ഡയറക്ടറായി നിയമിച്ചതിനെതിരെ ചോദ്യം ഉന്നയിച്ചിരുന്നു. എന്നാല്‍ കോറോണകാരണം നിയമസഭാ സമ്മേളനം വെട്ടികുറച്ചതിനെ തുടര്‍ന്ന് ചോദ്യത്തിന് സര്‍ക്കാരിന്റെ ഭാഗത്തുനിന്നും നല്‍കിയിരുന്നില്ല.
സി.കെ ബൈജുവിന് സ്ഥാനകൈയറ്റം നല്‍കരുന്നതെന്ന് പി.എസ്.സി സര്‍ക്കാരിനോട് ശുപാര്‍ശ നല്‍കിയിരുന്നു. 76 വിജിലന്‍സ് കേസുകളാണ് ഇയാള്‍ക്കെതിരെ ഫയല്‍ ചെയ്യപ്പെട്ടിരിക്കുന്നത്. ഇതില്‍ പലതിലും ഇയാള്‍ കുറ്റക്കാരനാണെന്ന് ഇതിനോടകം തന്നെ വിജിലന്‍സ് കണ്ടെത്തിയിരുന്നു. കൂടാതെ നിരവധി ചട്ടലംഘനങ്ങളും ഇയാളുടെ ഭാഗത്തുനിന്നുമുണ്ടായിട്ടുണ്ട്. ക്വാറി മാഫിയയുടെ സ്വാധീനമാണ് ഇയാളെ സര്‍ക്കാര്‍ ഉന്നതതലത്തില്‍ നിയമനം നല്‍കാന്‍ കാരണമായത്. ക്വാറി മാഫിയെ സഹായിക്കുന്ന നിലപാടാണ് ഇയാള്‍ എല്ലാകാലത്തും സ്വീകരിച്ചിരുന്നത്. 300 കോടി രൂപയുടെ അഴിമതിയാണ് ക്വാറിമഫിയക്ക് വേണ്ടി ഇയാള്‍ നടത്തിയത്. ക്വാറി മാഫിയക്കെതിരെ ശക്തമായ നടപടിയെടുത്ത ഉദ്യോഗസ്ഥനെ മാറ്റിയാണ് ഇയാളെ നിയമിച്ചതെന്നത് ശ്രദ്ധേയമണ്.
നിരവധി അഴിമതി കേസുകളില്‍ പ്രതിസ്ഥാനത്തുള്ള ഉദ്യോഗസ്ഥന്‍ വീണ്ടും വീണ്ടും ഉന്നത സ്ഥാനങ്ങളിലേക്ക് ഇയാള്‍ എത്തുന്ന രാഷ്ട്രീയ- ക്വാറി മാഫിയയുടെ അവിശുദ്ധ ബന്ധത്തിന്റെ ഫലമാണ്. ഉദ്യോഗസ്ഥനെ സംരക്ഷിക്കുന്ന നിലപാട് സര്‍ക്കാരിനും ഈ വിഷയത്തില്‍ പലതും മറക്കാനുണ്ടെന്നതിന് തെളിവാണെന്നും ആരോപണമുണ്ട്. ഇയാള്‍ക്കെതിരായുള്ള അഴിമതി വിവരങ്ങള്‍ പുറത്തുകൊണ്ടു വരാന്‍ വ്യാവസായ വകുപ്പിന് വിവരാവകാശം നല്‍കിയ മൂവാറ്റുപുഴ കേന്ദ്രമായി പ്രവര്‍ത്തിക്കുന്ന ക്രിയ എന്ന സംഘടനയുടെ വി.ജെ പൗലോസിന് കൊടുക്കേണ്ടി വന്നത് 2800 രൂപയാണ്. കാരണം ഇത്രയും അധികം രേഖകള്‍ പ്രിന്റ് ഔട്ടായി ലഭിക്കേണ്ടിരുന്നുവെന്നതാണ് സത്യം. വകുപ്പിന്റെ തലപ്പത്ത് എത്തിയതോടെ ഇയാള്‍ തനിക്കെതിരായ അന്വേഷണങ്ങളും പരാതികളും അട്ടിമറിക്കുയാണെന്നും വി.ജെ പൗലോസ് ആരോപിക്കുന്നുണ്ട്.